Swahili Bible2

20

Kameetsi khukhwaama mu lwaanda

(She Lukyeendo 17.1-7)

1Baryo babaandu ba Isiraeli, lituuli lyoosi, beetsa boola mu mubiimbi kwa Zini, mu mweesi kukuunyoowa, baakhola i kaambi yaabwe i Kadeshi. Nga bali ibweene iyo, Miriamu waafwa, baamusiikha iyo.

220.2: Luky 17.1-7Ibweene iyo babaandu bano sibaabayo ni kameetsi ta, kila beetsa baabuusana isi Musa ni Aroni, 3beluŋuunya luukali nga baloma bari, “Khali shaba shilayi ifwe nafwe khuba khukhwafwiila atweela ni babandaayeefwe babaafwiila iburaangisi we lisari ly’Omukasya! 4Lwashiina inywe mwakhureerire ifwe ano mu mubiimbi kuno? Ari bona ifwe atweela ni bibyaayo byeefwe khutsya khuhela! 5Lwashiina mwakhurusa ifwe mu Misiri, khukhureera mu shifwo shino she kumutaambo? Bona mbaamwo biilyo bibyoomu, mbaamwo kimifigi, namwe kimizabibu, namwe kamatuunda kakafwaana biibeya ta. Naluundi bona muno mbaamwo kameetsi ke khuunywa ta!”

6Lwanyuma Musa ni Aroni baarura isi lituuli lye babaandu bano lyaba, baatsya a mulyaango kwe lisari, bewunamila kimirwe kyaabwe aasi khwiloba. Shiriifwa sh’Omukasya shabafusilisa, 7kila Umukasya alomela Musa ari, 8“Bukula imiimbo yoowo iye khukhwitiila. Lwanyuma iwe ni waandaayo Aroni mulaange babaandu boosi beetse atweela, ulakile lulwaanda lwamemo kameetsi, nga boosi baloleleele. Musaambo yino kane ubawe kameetsi ke khuunywa nibo babeene, atweela ni bibyaayo byaabwe.” 9Aryo Musa waatsya, waabukula imiimbo yeewe, nga Umukasya n’amulakila.

10Kila Musa ni Aroni balaanga atweela lituuli lye babaandu boosi, baabuusana iburaangisi we lulwaanda. Musa waabalomela ari, “Inywe banabumiinyi, ni mureekerese! Ifwe khunyala khwabarusila kameetsi khukhwaama mu lwaanda luno?” 11Lwanyuma wenyusa imiimbo yeewe mu ngaaki, waatoongola lulwaanda kimiluundi kibili, kameetsi kapomookha khuulwaamamwo, babaandu boosi baanywa atweela ni bibyaayo byaabwe byeene.

12Ne Umukasya wekiitsa Musa ni Aroni, nga aloma ari, “Lwekhuuba inywe simubeele ni khuufukiilila musiise ta, muryo mwalekha khumbeesa ise shiriifwa mu moni tse babaandu ba Isiraeli bano, ari singene mubaraangilile khuubayila mu shibala isho sheesi nabasuubisa khuubawa ta.”

13Shino shakholekha mu shifwo she Meriba20.13 Meriba: Meriba shimanyisa khukhwiluŋuunya namwe khukhaandisa, mweesi babaandu ba Isiraeli beluŋuunyila khu Mukasya, ni naye aryo wabokesanisa ari ali umukhosefu.

Umuyiinga wa Edomu akhaangabisa ba Isiraeli khuubira

14Musa waarumana baarume khukhwaama mu kaambi yaabwe iyaba i Kadeshi, khuutsya isi umuyiinga wa Edomu, nga bamuyilila buurume bari, “Ifwe khuli babandaayo babeene, babaandu ba Isiraeli. Waamanya buulayi bukosi bwoosi bweesi khwabiramo. 15Bakuuka beefwe baatsya bamenya i Misiri, khuumala imbuka indeeyi. Ne ba Misiri baakyelawo baakhubirisa buubi naabi, 16ne ni khwelootsela Umukasya lwe buyeeti, aakhuwulila khulila khweefwe. Lwanyuma waarumana malayika, uweetsa wakhuraangilila wakhurusayo mu Misiri. Ni aluno ari, bona khuli ano i Kadeshi, khu lwaakha khu bweene ni linaambo lyoowo. 17Ari khukhuloomba khuri ukhufukiilise khubirirekho mu linaambo lyoowo ilyo. Ifwe atweela ni bibyaayo byeefwe, singene khuborokhekho khukhwaama khu ntsila, khutsye mu nimilo tseenywe, namwe mu matuunda keenywe ta. Naluundi singene khunywekho kameetsi khukhwaama musebele tseenywe ta. Ifwe kane khumenyatsake khu ntsila khwonyene, khukhwoolesa ni khulibiramwo busa khutsye.”

18Ne umuyiinga wa Edomu wabeelamwo ari, “Ise sinabafukiilisakho khuubirira mu shibala shase shino ta! Ne siinga mukhakakho muri, ise kane ikhuumbe ni liiye lyase khubebwakale.”

19Babaandu ba Isiraeli nabo baamwiilamwo bari, “Ifwe khukhusuubisa khuri kane khumenye busa khu ntsila, ne siinga ifwe babaandu, namwe bibyaayo byeefwe bitsya byaanywa khu meetsi koowo, khulikasasulila. Ne sheesi khuloomba busa khuri, ukhufukiilise khubire.”

20Ne Umuyiinga wa Edomu welamwo luundi ari, “Inywe simunyala mwabirira mu shibala shino ta!”

Lwanyuma ba Edomu bano baakhuumba ni liiye lye kamaani lilyeene, baatsya khukhwibwakala babaandu ba Isiraeli. 21Musaambo iyo, babaandu ba Edomu baakhaasisa babaandu ba Isiraeli khuubirirakho mushibala shaabwe. Baryo ba Isiraeli bakhalawo khuutsya khuubirira khu ntsila ikiindi.

Khuufwa khwa Aroni

22Lwanyuma lwayo babaandu boosi ba Isiraeli baakyeenda, baama i Kadeshi baatsya boola khu lukiingi Hori, 23lulwaba khu lwaakha ni shibala sha Edomu. Ibweene iyo khu lukiingi Hori, Umukasya waalomela Musa ni Aroni ari, 24“Aroni, s’utsya khwambukha, winjile mu shibala sheesi nasuubisa khuuwa babaandu baase ba Isiraeli ta. Ari bona utsya khufwiila ano, lwekhuuba iwe atweela ni Musa mwaminyaalila shilakilo shase sheesi nabawa khu meetsi ke Meriba. 25Nashiryo iwe Musa, yila Aroni, atweela n’umusooleli weewe Eliyazaari, mwiitse khu ngaaki khu lukiingi Hori. 26Lwanyuma waabulekho khu Aroni bikwaaro ibyo bye busaayi, ubikwaarise umusooleli weewe Eliyazaari. Abweene awo niwo isi Aroni atsya khufwiila.”

27Aryo Musa waawuliilisa byeesi Umukasya aamulomela, baaniina khu lukiingi Hori, nga babaandu boosi baloleleele. 2820.28: Luky 29.29; Bala 33.38; Maka 10.6Ni boolayo, Musa waabulakho khu Aroni bikwaaro bye busaayi, waabikwaarisa umusooleli weewe Eliyazaari. Lwanyuma Aroni wafwiila ibweene iyo khu lukiingi.

Baryo Musa ni Eliyazaari baakobola khukhwaama khu lukiingi. 29Ne babaandu ba Isiraeli ni baashimanya bari Aroni waamalile khuufwa, baasola khulweewe khuumala biifukhu kamakhumi kataru.