Swahili Bible2

2

Biilakilo bye khuurawo tsi kaambi tse ba Isiraeli

1Lwanyuma Umukasya waawa Musa ni Aroni biilakilo 2bibiwaamba khusaambo isi ba Isiraeli baakha khuurekekhamwo tsikaambi tsaabwe: “Nga ba Isiraeli bakhola tsikaambi tsaabwe, buli shikuuka shaakha khuukhwiireerawo ibendela, ni aasi a buli bendela, abewo tsiingo tse mu shikuuka isho. Tsikaambi tsino tsaakha tsirekekhebwe khukhwibotokhelela Lisari Likhosefu, ne nga sitsaakha khuuba aambi ni nalyo ta.

3“Ibwaamanyaanga we Lisari Likhosefu, yaakha khuurebwayo lituuli lye bikuuka bibiili aasi e bendela ya Yuda. Ne umuraangilisi we babaandu be mu shikuuka sha Yuda niye Nahashoni, umusooleli wa Aminadabu. 4Lituuli lyeewe kane lyoolese baselikhale kimikaanda musaafu, bikana bine, ni bitoondo bisesaba (74,600).

5Shikuuka shishikane shiilekho kane shibe shikuuka sha Isakaari. N’umuraangilisi waabwe kane abe Nesaneli, umusooleli wa Zuwari. 6Lituuli kane lyoolese baselikhale kimikaanda kiraano, bikana bine ni bitoondo bine (54,400).

7Shikuuka shishikane shiilekho kane shibe shikuuka sha Zebuluni. N’umuraangilisi waabwe kane abe Eliyabu, umusooleli wa Heloni. 8Lituuli lino kane lyoolese baselikhale kimikaanda kiraano, bikana musaafu, ni bitoondo bine (57,400).

9Baryo baselikhale boosi babaareebwawo be mu kaambi ya Yuda yoosi, iyabamo bikuuka bitaru ibyo, atweela boola kumweeka mutweela, kimikaanda shinaane, bikana bisesaba, ni bitoondo bine (186,400). Baselikhale bano be mu kaambi ya Yuda nibo babanyoowa khuuraangila khukhuumba khukhwiiloosela ni lukyeendo.

10“Khu lubeka lwe mwaalo, yaakha khuureebwayo lituuli lye bikuuka bibiili aasi e bendela ya Rewubeni. Ne umuraangilisi we babaandu be mu shikuuka sha Rewubeni niye Elizuri, umusooleli wa Shedewuri. 11Lituuli lyeewe kane lyoolese baselikhale kimikaanda kine, bikana bisesaba, ni bitoondo biraano (46,500).

12Shikuuka shishikane shiilekho kane shibe sha Simeoni. N’umuraangilisi waabwe kane abe Shelumieli, umusooleli wa Zurishadaayi. 13Lituuli lino kane lyoolese baselikhale kimikaanda kiraano, bikana syeenda, ni bitoondo bitaru (59,300).

14Shikuuka shishiindi shishiilakho kane shibe sha Gadi. N’umuraangilisi waabwe kane abe niye Eliyasafu, umusooleli wa Dewuweli. 15Lituuli lino kane lyoolese baselikhale kimikaanda kine, bikana biraano, bitoondo bisesaba, ni kamakhumi karaano (45,650).

16Baryo baselikhale boosi babaareebwawo be mu kaambi ya Rewubeni, iyabamo bikuuka bitaru ibyo, atweela boola kumweeka mutweela, kimikaanda kiraano, shikana shitweela, bitoondo bine ni kamakhumi karaano (151,450). Baselikhale be mu kaambi ya Rewubeni bano boosi nibo babeelakho khuuba be khabili khukhuumba khukhwiiloosela ni lukyeendo.

17“Lwanyuma ba Levi batsye nga baasutile Lisari Likhosefu, atweela ni tsibendela tsaabwe, nga bakyeendela akari e tsikaambi tsino. Bikuuka bibiramile byoosi bikyeendele mu lwantsaango, nga tsikaambi tsaabwe ni tsili, buli muungo nga muli aasi e bendela yaabwe.

18“Khu lubeka lwe bukwanyaanga, yaakha khuureebwayo lituuli lye bikuuka bibiili aasi e bendela ya Efurayimu. Ne umuraangilisi we shikuuka sha Efurayimu niye Elishama, umusooleli wa Amihudi. 19Lituuli lino kane lyoolese baselikhale kimikaanda kine, ni bitoondo biraano (40,500).

20Shikuuka shishikane shiilekho kane shibe sha Manase. N’umuraangilisi waabwe kane abe Gamalyeli, umusooleli wa Pedahizuri. 21Lituuli lino kane lyoolese baselikhale kimikaanda kitaru, bikana bibili, ni bitoondo bibili (32,200).

22Shikuuka shishikane shiilekho nisho sha Benyamini. N’umuraangilisi waabwe kane abe Abidani umusooleli wa Gidiyoni. 23Lituuli lino kane lyoolese baselikhale kimikaanda kitaru, bikana biraano, ni bitoondo bine (35,400).

24Baryo baselikhale babareebwawo be mu kaambi ya Efurayimu, iyabamo bikuuka bitaru ibyo, atweela boola kumweeka mutweela, bikana shinaane, ni shitoondo shitweela (108,100). Baselikhale be mu kaambi ya Efurayimu bano boosi nibo babeelakho khuuba be khaataru khukhuumba khukhwiiloosela ni lukyeendo.

25“Khu lubeka lwe ngaaki yaakha khuureebwayo lituuli lye bikuuka bibiili aasi e bendela ya Dani. Ne umuraangilisi we shikuuka sha Dani niye Ahiyezeri umusooleli wa Amishadayi. 26Lituuli kane lyoolese baselikhale kimikaanda kisesaba, bikana bibili, ni bitoondo musaafu (62,700).

27Shikuuka shishikane shiilekho nisho sha Asheri. N’umuraangilisi waabwe kane abe niye Pagieli umusooleli wa Okurani. 28Lituuli lino lyoolesa baselikhale kimikaanda kine, shikana shitweela, ni bitoondo biraano (41,500).

29Shikuuka shishikane shiilekho nisho sha Nafutali. N’umuraangilisi waabwe niye Ahira umusooleli wa Enani. 30Lituuli lino lyoolesa baselikhale kimikaanda kiraano, bikana bitaru, ni bitoondo bine (53,400).

31Baryo baselikhale babareebwawo mu kaambi ya Dani, iyabamo bikuuka bino bitaru, atweela boola kumweeka mutweela, kimikaanda kiraano, bikana musaafu, ni bitoondo bisesaba (157,600). Baselikhale be mu kaambi ya Dani bano boosi nibo babaakane baseembeyo khukhuumba khukhwiiloosela ni lukyeendo.”

32Khuuyilila atweela, babaandu ba Isiraeli boosi, baabalibwa nga basintsiila khu tsiingo tsaabwe. Baselikhale baaruungikhibwa nga basiintsiila khu matuuli kaabwe, nga boosi atweela boola kimyeeka kisesaba, bikana bitaru, bitoondo biraano ni kamakhumi karaano (603,550). 33Babaandu beesi bakhaabala ta, baaba nibo ba Levi bonyene, khuusiintsiila khu bilakilo byeesi Umukasya aawa Musa.

34Musaambo iyo, ba Isiraeli baakhola bibiindu byoosi byeesi Umukasya aalakila Musa. Baryo baaruungikha tsikaambi tsaabwe nga baasiintsiila khu bukuuka bukyeekhe ni tsiingo tsaabwe, nga buli shikuuka shili aasi e bendela yasho. Musaambo iyo baaba nga bakhuumba khukhwiiloosela ni lukyeendo.