Swahili Bible2

16

Bumiinyi bwa Kora, Dasani, ni Abiramu

116.1: Yuda 1.11Kora umusooleli wa Iziha, aaba umu Levi, uwe mu shikuuka sha Kohasi, atweela ni Dasani ni Abiramu, basooleli ba Eliyabu, atweela ni Oni, umusooleli wa Pelesi, nga boosi be mu shikuuka sha Rewubeni. 2Basaani bano baabuusanisa babaandu babaandi atweela, ni kutuuli kwe baaraangilisi babaandi baboola bitoondo bibili ni kamakhumi karaano (250), babaamanyikhaane buulayi, benyukhilamwo khukhaandisa Musa. 3Baatsya isi Musa ni Aroni babalomela bari, “Inywe nga mwatsiile aleeyi naabi! Lwashiina inywe mwiyila khuuba be angaaki naabi khufuurisakho babaandu babaaramile boosi? Ni mumanye muri babaandu bano boosi nabo bali bakhosefu, na buli mutweela khu nibo ali uw’Omukasya.”

4Kila Musa nga waawuliile bilomo bino, weenamisa kumurwe kweewe aasi waaloomba. 5Lwanyuma waalomela Kora atweela ni baloondeleli beewe ari, “Kumukaamba kumutikhinyi Umukasya umweene akhookyese muundu shiina isi arobore khuuba uweewe, luundi umusaayi weewe unyala weetsa aambi ni naye khuumwakaanisatsaka. 6-7Ari iwe Kora atweela ni baloondeleli boowo mwaakha khukhwiitsa nga mwasutile bipaati bye kumulilo, nga mwareeremo kamaanda ke kumulilo ni bubaane, mubireere, mubire isi shisheeso sh’Omukasya. Abweene awo, umuundu isi Umukasya kane arobore, umweene uyo niye ukane abe umusaayi weewe. Ilala iwe Kora ni ba Levi bashoowo, mwatsiile aleeyi naabi!”

8Musa weeloosela khuukanikha isi Kora ari, “Ni mundekeerese buulayi inywe ba Levi! 9Inywe mwashiyilile khuuba shishiindu shikyeekhe naabi, khuubona nga Wele wa Isiraeli wabaawula inywe khuuba babaandu ba buraawa khu ba Isiraeli boosi, nio munyalise khukhwisyeenda aambi ni naye, khuukhola kumulimo mu lisari lyeewe likhosefu, ni khukhwakaanisatsaka mu moni tseewe? 10Umukasya waabawa inywe ba Levi kumulimo kwa buraawa naabi, ari mwakana ni khuuyila kumulimo kwe busaayi nakwo! 11Ari ni muba nga mwiluŋuunya, mwakhwiluŋuunya khu Aroni ta, ne ilala mweluŋuunyile khu Mukasya umweene isi mulikho muminyaalila.”

12Lwanyuma Musa waarumanisa Dasani ni Abiramu, basooleli ba Eliyabu, ari beetse is’ali, ne nibo beelamwo bari, “Sikhuneetsa ta! 13Abe sishimala iwe khuuba nga waakhurusa khukhwaama mu Misiri, mu mikuunda kyeefwe kimilayi, khuukhureera ifwe khufwiile mu mubiimbi muno. Ne ari bona ndi ukana khukhwikhola wamweene khuuba umuraangilisi weefwe! 14Iwe bona ushiili khukhwoolesa ifwe mu shibala shilayi mumulimo kamabeele ni bubuushi bwe ntsukhi, ni kimikuunda kye kimizabibu khuuba busikha bweefwe. Ari kili waheena? Yaakamisa khuuwombesawombesa babaandu bano. Ifwe sikhuneetsa ta.”

15Musa lirima lyaamuniina naabi, kila alomela Umukasya ari, “Ukhafukiilisa shiwaanwa she basaani bano ta. Ise siindikho na mutweela isi nabukulakho inyuumbu yeewe, namwe isi nakholakho buubi bwoosi ta.”

16Kila Musa alomela Kora ari, “Ingana kumukaamba iwe ubewo atweela ni baloondeleli boowo bitoondo bibili ni kamakhumi karaano (250), mubuusanile isi Lisari Likhosefu ly’Omukasya. Aroni naye akhaabewo. 17Buli mutweela khusiinywe aakha khukhwiitsa ni shipaati she kumulilo, atweela ni bubaane mu nisho, nio mwiitse mubuwaaneyo khu sheeso sh’Omukasya.”

18Baryo khu shifukhu shisheelakho, buli mutweela weetsa ni shipaati she kumulilo, nga bareerekho kamaanda ke kumulilo ni bubaane, baatsya beemikha ni Musa, ni Aroni, amulyaango kwe Lisari Likhosefu. 19Lwanyuma Kora waabuusanisa lituuli lyoosi lye babaandu, beemikha iburaangisi we Lisari Likhosefu, khukhaandisa Musa ni Aroni. Lubaluba, shiriifwa she khuubawo khw’Omukasya sheetsa shaamulikha khu baandu boosi babaabawo. 20Umukasya waalomela Musa ni Aroni ari, 21“Nimwiyawule khu baandu bano boosi, nio nase imbakhoonyakilewo khaangukho!”

22Ne Musa ni Aroni beenamisa kimirwe kyaabwe aasi, bekoontselela Wele nga baloma bari, “O Wele, iwe niye ukabila babaandu boosi buulamu. Ari lwashiina ukana khuwa babaandu boosi shitaambiso, ate nga Umuundu mutweela yenyene uwoonakisile?”

23Umukasya naye welamwo isi Musa ari, 24“Ari boolela babaandu babaaramile boosi besyeende, barure isi kamasari ka Kora, ni Dasani ni Abiramu.”

25Lwanyuma Musa wenyukha waatsya isi Dasani ni Abiramu, nga baaraangilisi babaandi ba Isiraeli, baamuloondelekho. 26Kila alomela babaandu boosi ari, “Ngana mwiyawule, mwisyeende murure isi kamasari ke basaani banywaanywa bano. Mukhawaambakho khu shiindu shaabwe shoosi ta, nanywe munyala mwahelela atweela ni nabo lwe bunywaanywa bwaabwe.” 27Baryo babaandu boosi besyeenda baarurawo isi kamasari ka Kora, ni Dasani, atweela ni Abiramu. Kila basaani beene Kora, Dasani ni Abiramu baarura beemikha mu milyaango kye kamasari kaabwe atweela ni baakyelama baabwe, ni babaana baabwe beene.

28Musa waalomela babaandu boosi ari, “Ari mulikho mutsya khuumanya muri Umukasya niye uwandumana ise khuukhola buraambi buno bwoosi, naluundi kane mushimanye muri, sikali kamakyesi kaase busa ta. 29Siinga nga basaani bano bafwa khuufwa khwa busheele khweesi babaandu boosi bafwamwo, nga yaakhubawo shitaambiso shoosi shishiboolelekho ta, awo kane mumanye muri, Umukasya waakhundumana ise ta. 30Ne siinga Umukasya akhola shishiindu shoosi shishikhaabatsakawo ta, wareerawo luufwa luukali lulweene nga liloba lyaasamile, ni basaani bano baamilikhilamwo atweela, ni bibiindu byaabwe byoosi byeesi bali ni nabyo, baryo beekha i makoombe nga baalamu, abweene awo nio isi kane mumanyile muri, basaani bano ilala babeele baanywaanywa isi Umukasya.”

31Aryo Musa n’amala khuukanikha ari, liloba khweesi baaba nga beemikhile, lyaasama 32luufwa luukali lwaatikhawo, nabo boosi baamilikhilamwo nga baalamu, atweela ni be muungo mwaabwe boosi, ni khuutubaasakho baloondeleli ba Kora beene, atweela ni bibiindu byaabwe byoosi. 33Baryo boosi beekha i makoombe nga baalamu, atweela ni bibiindu byaabwe byoosi. Lwanyuma liloba lyaabeliilisa, lyaababiimbakho boosi, baaba nga baaweelelewo ilala.

34Lwanyuma babaandu ba Isiraeli babaaramile babaabawo, bekhuuna tsiindimo, ni baawulila khulila khwaabwe. Baryo bekhuuna tsiindimo nga balookha bari, “Nafwe liloba linyala lyaasama lyaakhumila!”

35Khaangukho Umukasya waasiindikha kumulilo khukhwaama mu ngaaki, kwoosha basaani tsana bitoondo bibili ni kamakhumi karaano (250), babaaba balikho bawaanayo bubaane khu sheeso.

Bipaati bye kumulilo

36Lwanyuma Umukasya waalomela Musa ari, 37“Lomela Eliyazari, umusooleli wa Aroni, abukule bipaati bye kumulilo ibyo, khukhwaama mu mulilo kukuuli khukhwaaburukha, asalanisake kamaanda koosi. Bipaati ibyo bili bikhosefu 38lwekhuuba byaraambisibwile khuuwaanayo bubaane khu sheeso shase. Nashiryo yila bipaati bino, ubikhupake bikyelemo bupaati bunyelele buri, ubukhole bwikyele shishibiimba khu sheeso. Basaani bano baafwa lwe bunywaanywa bwaabwe, nashiryo bupaati bwe kumulilo buno bwikyele she khureewula isi babaandu ba Isiraeli boosi.”

39Aryo Eliyazari waabukula bupaati buno, waalakila baabukhupaka, baabwikyelisamwo bupaati bunyelele buri, waabukhola khuuba shishibiimba khu sheeso. 40Shino shaaba nga she khuureewula isi ba Isiraeli boosi, khuubokyesanisa bari babetsukhulu ba Aroni bonyene nibo babafukiilisibwa khukhwisyeenda aambi n’Umukasya nga bawaanayo bubaane. Nashiryo umuundu ukuundi yeesi ukhakakho khuushikhola, naye aba aweebwa shitaambiso nga Kora ni baloondeleli beewe ni baaba. Bino byoosi byakholebwa khusiintsiila khu bilakilo byeesi Umukasya aawa Eliyazari khuubirira mu Musa.

Ba Isiraeli babaaminyaala bafuna shitaambiso

41Ne khu shifukhu shisheelakho, babaandu ba Isiraeli boosi ndi luundi baarakikha khukhwiluŋuunya khu Musa ni Aroni, nga baloma bari, “Inywe bona mwaakhoonyakile babaandu b’Omukasya!”

42Ne babaandu boosi ni baamala khuubuusana khuulomanisa Musa ni Aroni, baatsya isi i Lisari Likhosefu. Lwanyuma abonekhawo lifuumbi lye shiriifwa sh’Omukasya, lyaabiimba khu lisari lyeene. 43Baryo Musa ni Aroni beetsa beemikha iburaangisi we lisari, 44kila Umukasya abalomela ari, 45“Ni mwiyawule mwilekho inyuma! Ingana khuhesa babaandu bano boosi kumuluundi mutweela.”

Isho shaakila Musa ni Aroni beenamisa kimirwe kyaabwe aasi baloomba. 46Kila Musa alomela Aroni ari, “Bukula khaangu shipaati she kumulilo, ushitsusemo kamaanda ke kumulilo khukhwaama khu sheeso. Lwanyuma uremo bubaani, uyuubekho khaangu utsye isi babaandu bali, ukhole kumukholo kwe khubapyeeluusa. Yuubakho lwekhuuba lirima ly’Omukasya bona lilikho litindiima, ni buulwaale ari bona bwaarakikhile.”

47Aryo waloondelela sheesi Musa aamulomela, wasuta shipaati sheewe she kumulilo, watimaka waatsya akari mu baandu babaaba baabusanile. Niye n’abona nga buulwaale bwarakikhile khaale, wahaambisa bubaane, wakholelawo khaangu kumukholo kwe khupyeeluusa babaandu. 48Aryo wemikha akari e baafu, ni babaandu babaaba bashiili baalamu, buryo buulwaale ubwo bwakama nakhwakama. 49Bukali bwe babaandu babaafwa lwe buulwaale buno bwaba kumukaanda mutweela, bikana bine ni bitoondo musaafu (14,700), nga waakhubalilakho abo babaafwila atweela ni Kora ni baloondeleli beewe ta.

50Lwanyuma nga buulwaale buno bwaakamile, Aroni waakobola weemikha atweela ni Musa mu mulyaango kwe Lisari Likhosefu.