Swahili Bible2

15

Kamakaambila kakawaamba khu Tsisaayilo

1Umukasya ndi waakanikha isi Musa 2khuutsya awe babaandu ba Isiraeli bilakilo bino bibiwaamba khu tsisaayilo nga bali mu shibala sheesi atsya khuubawa: 3Khuuwaanayo iwuunwa, namwe limiiku, namwe indurume, nga shiwaanwa sheesi munyala mwokhela khu sheeso, namwe isaayilo iye khukhuuntsikhoyesa ise. Naluundi munyala khuuwaanayo nga mwabeene mwikanisa, namwe lwekhuuba mwakholile shishitsubo, namwe lwekhuuba tsisaayilo itso tsili bye khukhwisaaya byeesi mukhola buli busheele. Isilikakha iyaama mu tsisaayilo tsino iniine mu ngaaki khukhuuntsikhoyesa ise. 4-5Buli muundu yeesi uwaanayo lisheese, namwe imbusi, khuuba nga shiwaanwa isi Umukasya, aakha khuureererakho ni kilo ndweela iye buufu buunose buulayi, nga waatubaasilemo ni kamafura ke kuusaala ku olivu. Muwaanayo bino nga mwareererekho ni lita ndweela iye viini, khuuba shiwaanwa she khuunywa. 6Nga umuundu ali khuuwaanayo limiiku, ali ni khuuwaanilakho tsikilo tsibili tse buufu, nga baatubaasilemo i lita ndweela ni shisiintsa iye kamafura ke kuusaala ku olivu, khuuba shiwaanwa she bilime bibyoomu, 7nga mwareererekho ivini iyoola i lita ndweela ni shisiintsa, khuuba nga shiwaanwa she khuunywa. Isilikakha iyaamamwo iniine mu ngaaki khukhuuntsikhoyesa ise. 8Naluundi siinga muba nga muli khuuwaanayo iwuunwa nga isaayilo intsoshe khukhuuntsikhoyesa ise, namwe lwe khukhwoolelesa shishitsubo, namwe nga shiwaanwa she lukoosi, 9yaakha khuutubaasakho ni tsikilo tsitaru tse buufu, nga tsaatubaasibwilemo ni lita tsibili tse kamafura ke kuusaala ku olivu. 10Biwaanwa bino byaakha khuureerebwelakho ni iviini iyoola tsi lita tsibili, nga shiwaanwa she khuunywa. Isilikakha iyaama mu biwaanwa bino iniine mu ngaaki khukhuuntsikhoyesa ise.

11Bye khuuwaanayo byoosi kane bibatsake biryo buli lweesi muwaanilayo iwuunwa, limiiku, namwe imbusi khuuba isaayilo. 12Ne siinga shiwaanwa sheesi muwayo shituumisa mu shaayo shitweela, bibiindu bibiindi bibitsiilakho nabyo byaakha khuuloosebwelakho mu bukali khuulekhaana ni bibyaayo. 13Babaandu babaali ba Isiraeli babeene, baakha khuukhola bibiindu musaambo yino, nga bawaanayo tsisaayilo tse kumulilo, nio isilikakha iwunya buulayi yamemwo iniine mu ngaaki isi Umukasya. 14Ne siinga ndi ibawo umwiitswa ukyeendela atweela ni nanywe, namwe uyo yeesi ukhalawo khuumenya akari eenywe, niye n’aba nga atsya khuwaanayo isaayilo intsoshe, nio isilikakha iniine isi indi, aakha aloondelele bilakilo nibyo bitweela byeene. 15Mu mbuka yoosi isi kane mumale, bilakilo bili bitweela byeene, bibikane bibawaambe khwiinywe mwabeene, atweela ni khu beetswa babaakane bamenye ni nanywe. 1615.16: Lev 24.22Kamakaambila kali matweela keene, ni biilakilo nabyo bili bitweela, bibikane bibawaambe khwiinywe mwabeene, atweela ni babeetswa babaakane bamenye akari eenywe.

17Umukasya ndi waalomela Musa 18khuuwa babaandu ba Isiraeli bilakilo bino byeesi bali ni khuuloondelela, nga boolile mu shibala sheesi abe atsya khubawa. 19Bilimwa byoosi bibilimibwa lwe khuulya nga biilyo, bilala khu nibyo byaakha khukhwaawulibwa bireerebwe nga shiwaanwa isi Umukasya. 20Khukhwaama khu bufu bwe ŋaano bweesi bakaanda, kumukaati kukuunyoowa khukholekha khukhwaama mu bufu ubwo, kwaakha khureerebwa nga shiwaanwa sha buraawa isi Umukasya. Shino shaakha khuuwaanibwayo musaambo niyo ndweela nga n’uwaanayo bilimwa byeesi umalile khuuwuula. 21Mu buli muboolo kukwiililakho kwe babetsukhulu beenywe, boosi baakha khuuloondelela likaambila lino, khubona bari bawaanayo shiwaanwa sha buraawa khukhwaama mu mikaati kyeesi baba bakhalaangile.

22Ne Umukasya waalooselakho ari, siinga ibawo umuundu yeesi ukhoolelesa bilakilo bino byeesi ise nawa Musa, nga waakhuŋalilamwo ta, 23namwe siinga mu biseela bye mu moni, babaandu bakhaasikha khuukhola byoosi byeesi Umukasya aalakila Musa, 24naluundi siinga nga khuukhaasikha ukhwo khubawo lwe khuulekha khumanya khwa boosi, babaandu boosi baakha khuuwaanayo iwuunwa khuuba nga isaayilo lwe khukhuuntsikhoyesa ise. Khu bino byoosi nga bareererakho shiwaanwa she bilimwa, atweela ni shiwaanwa she viini, khusiintsiila khu makaambila, naluundi barekho ni isaayilo iye mbusi khuuba nga isaayilo iye shishoonako. 25Aryo umusaayi aakha khuukhola kumukholo kwe khukhwipyeeluusa lwe babaandu ba Isiraeli boosi, nabo lwanyuma beyakhilwe. Ne ndi nga lwekhuuba bibyoonako byeesi bakholile byaakhukholekha lwe khuutsililila ta, ate nga baamalile khuuwaanayo tsisaayilo isi Umukasya, 26lituuli lye babaandu ba Isiraeli boosi, atweela ni babeetswa babaamenyamwo, kane boosi beyakhilwe bibyoonako byaabwe, lwekhuuba buli mutweela khu nibo ekhupila mu khukhaasikha ukhwo.

2715.27: Lev 4.27-31Ne siinga umuundu yeesi oneka nga waakhushitsililila ta, aakha khuuwaanayo imbusi iyoolesa kumwiiko mutweela nga isaayilo, khuuba isaayilo iye shishoonako. 28A sheeso awo, umusaayi ali ni khuukhola kumukholo kwe khuupyeeluusa, khuubona ari apyeeluusa umuundu uyo khukhwaama mu shonako sheewe, ni shishoonako sh’omuundu uyo kane shiyakhilwe. 29Likaambila lino litweela lyeene kane likhole khu muundu yeesi ukhola shishoonako nga waakhushitsililila ta, oba ali mutweela khu ba Isiraeli, namwe umwiitswa umenya atweela ni nanywe.

30Ne siinga umuundu yeesi akhola shishoonako nga waatsiililile khukhwooneka, umweene uyo oba ali mutweela khu ba Isiraeli, oba umwiitswa, aba webirisile buubi nga amiinyaalila kamakaambila k’Omukasya. Nashiryo, umuundu ufwaana aryo, s’akha khuuba mutweela khu baandu baase luundi ta. 31Lwekhuuba aba walekelesile sheesi Umukasya alomile, naluundi waaŋalilamwo khuufuniaaka kamakaambila kaase, mwaakha khuumuwoona abaruremo, alekhe khuba mutweela khu baandu baase ba Isiraeli ta.

Umusaani uweeribwa lwe khuureenya tsiikhu khu Sabato

32Aabawo lutweela, nga babaandu ba Isiraeli bashiili mu mubiimbi bakyeenda batsya, babaandu baanyoola umusaani mutweela khu nibo nga ali khuureenya tsiikhu khu shifukhu sha Sabato. 33Baryo baamuwaamba, baamuyila isi Musa ni Aroni, atweela ni lituuli lye babaandu boosi. 34Kila bamura mu shifwo she bubowe, lwekhuuba abe baashiili khumanya shiina she khuumukholela ta.

35Lwanyuma kila Umukasya alomela Musa ari, “Umusaani uyo mwaakha khumukhupa ni kamabaale afwe. Nashiryo lomela babaandu boosi bamukhupile ibulafu we kaambi kamabaale.” 36Baryo babaandu boosi baamurusa ibulafu we kaambi, baamukhupa kamabaale waafwa, nga Umukasya n’alakila Musa khuukhola.

Kamayeeye khu bikwaaro bye ba Isiraeli

37Umukasya waalomela Musa 3815.38: Maka 22.12khuboolela babaandu ba Isiraeli ari, “Ni muruungile kamayeeye khu buli soonda iye bikyele we bikwaaro byeenywe, lwanyuma mubowe lukoye lubuusi khu buli luyeeye. Shino mwaakha khushikhola mu miboolo kyeenywe kyoosi. 39Kamayeeye kano kakhaabe nga she khuubashebulisa, nga buli lweesi mukalolelakho, mushebulilatsaka kamakaambila k’Omukasya, ni khuukhola byeesi kaloma, nio mulekhe khuuloondelelatsaka byeesi kimyoyo kyeenywe kyambaasa, ni byeesi tsimoni tseenywe tsibona lwe kumuluungo ta. 40Kane mubatsake nga mushebulila luundi nga mukholatsaka byeesi kamakaambila kaase kaloma, mubatsake ilala bakhosefu baase. 41Ise ndi Umukasya Wele weenywe, uwabarusa khukhwaama mu shibala she Misiri, imbeele ilala Wele weenywe. Ise niye Umukasya.”