Swahili Bible2

14

Babaandu beluŋuunya

1Baryo babaandu ba Isiraeli nga baamala khuuwulila bilomo bye baalaambuuli babaatsya khuulaambuula Kanaani, baakhupa luwuungu lwe kamaani shiilo isho shoosi. 2Babaandu baatsya beluŋuunya isi Musa ni Aroni, nga baloma bari, “Ifwe khuba nga khukhwafwiila mu Misiri, khali sha khuyeeta! Namwe khuba nga khukhwafwiila ano mu mubiimbi! 3Lwashiina Umukasya ali khuukhuyila ifwe mu Kanaani, ari khutsye khwiiribwile iyo, ni baakyelama beefwe atweela ni babaana beefwe babawaambake? Shandibeele shilayi ifwe khukobolayo mu Misiri.” 4Lwanyuma kila beelomela bonyene bari, “Khayo khwiroborere umuraangilisi uweefwe, khwiileyo i Misiri.”

5Isho shaakila Musa ni Aroni beenamisa kimirwe kyaabwe khwiloba aasi mu khuloomba, nga bali iburaangisi we lituuli lye babaandu ba Isiraeli boosi. 6Yoswa umusooleli wa Nuni, ni Kalebu umusooleli wa Yefune, nga nibo babaaba batweela khuubo babaatsya khuulaambuula liiswa, boonuulaka bikwaaro byaabwe, 7nga balomela babaandu bari, “Ifwe liiswa lyeesi khwatsiile khuulaambuula lili liiswa liilayi naabi. 8Siinga Umukasya aba nga waakhusiimile ifwe, ilala kane akhuraangilile akhuyile, akhuwe liiswa ilyo lilitsuulemwo kamabeele ni bubuukhi bwe ntsukhi. 914.9: Heb 3.16Nashiryo, mukhamiinyaalila Umukasya ta. Naluundi mukharya lwe babaandu babaamenya khu liswa ilyo ta. Ifwe kane khutsye khubafuure, lwekhuuba Umukasya ali khu luwaande lweefwe, singene bakhunyale ta. Ni nashiryo, mukharya ta.”

10Ne lituuli lye babaandu bano lyoosi lyariisariisa khuukhupa Musa ni Aroni babeere. Ne khaangukho, shiriifwa sh’Omukasya sheetsa shaafusilisa Lisari Likhosefu.

Musa aloombela babaandu

11Kila Umukasya alomela Musa ari, “Babaandu kane boolese eena khukhuundekelesa ise bari? Kane boolese eena khuulekha khufukiilisa byeesi ise imbakholela, abe yakhaba nga nakhola bye khukhwiyaangisa biikali bibyeene mu moni tsaabwe? 12Ari indi khuutsya khuubahesa boosi nga mbasiindikhila buulwaale burafu naabi. Ne ari iwe ndi khuutsya khukhukalusa khuuba paapa we linaambo, liliili lye kamaani lilifuurakho lilyaabwe.”

1314.13: Luky 32.11-14Kila Musa elamwo isi Umukasya ari, “Iwe wamweene warusa babaandu bano khukhwaama mu Misiri, nga uraambisa kamaani koowo. Nashiryo siinga ba Misiri bawulila sheesi uli khuutsya khukhola, 14kane bashiboolelekho babaandu be mu Kanaani. Babaandu ba Kanaani bano baamala khaale khuushiwulilakho bari iwe Umukasya uli ni nafwe, lwekhuuba ubonekha mu tsimoni tse babaandu, ni baba nga baaboone lifuumbi lyoowo lyeemikhile angaaki eefwe, naluundi baakhubona nga ukyeenda utsya ibweeni weefwe, nga lifuumbi likhuraangilila kumuusi, ni kumulilo mu shilo. 15Nashiryo iwe siinga wiiraka babaandu boowo bano, kamanaambo kakaawulilaka lubuyi lwoowo kane kalome kari 16iwe wakhoonyakiile babaandu boowo mu mubiimbi, lwekhuuba waakhunyalisa khuuboolesa mu shibala sha Kanaani sheesi wabasuubisa khuubawa ta. 17Nashiryo, O Umukasya, ikhuloomba ndi iwe ukhwookesanise kamaani koowo, nga wamweene ni wakhulomela uri, 1814.18: Luky 20.5,6; 34.6,7; Maka 5.9,10; 7.9,10iwe uli Wele uwe shiisa naluundi uwiyakhila. Naluundi waloma uri iwe s’ukhalalaka khaangu ta, nga wiyakhila bubwoonaki ni bumiinyi bwoosi. Ne waloma uri uliwa shitaambiso buli mutweela ukhola buubi, khuutubaasakho ni babaana baabwe, ni babetsukhulu ni bimiila byeene. 19Ni naari, ikhuloomba ndi wiyakhile babaandu boowo, khuusiintsiila khu khukana khwoowo khuukali naabi khukhuukhawawo ta, nga n’ubeele ubeyakhilatsakila, khukhwaamila khu mbuka isi wabarusila mu Misiri.”

20Lwanyuma Umukasya naye weelamwo Musa ari, “Nga n’uloombile, naabeyakhiile. 2114.21: Heb 3.18Ne ikhusuubisa ndi nga ise n’ishiili Umukasya Umulamu, naluundi nga shiriifwa shase ni shishitsula mu shibala shoosi, 22ikhwitsubila ndi mbaawo na mutweela khu baandu bano uliinjilakho mu shibala isho ta. Lwekhuuba babaandu bano baboone shiriifwa shase, ni bye kamakaanga byase byeesi nakhola khu ba Misiri, ni byeesi ikholile mu mubiimbi muno, ne belooseele busa khukhuuminyaalila ni khukhuukhakilisa ise kimiluundi mikali. 23Sibakhenjileyo khuubonakho shibala sheesi nasuubisa khuushiwa bakuuka baabwe ta. Mbaawo na mutweela khuubo babaantsikaanile ise uliinjilamwo ta. 2414.24: Yos 14.9-12Ne umwakaanisi wase Kalebu s’ali nga babaandi babaaramile ta. Aryo lwekhuuba niye wabeele ni khuufukiilila musiise, khuuloondelela byoosi byeesi ingana, kane imufukiilile niye enjile mu shibala sha Kanaani, ni babetsukhulu beewe balimenya mu bweenemwo. 25Ne bona ba Amaleki ni ba Kanaani bamenya mu matila ke mu Kanaani. Nashiryo ikhukana kumukaamba kumutikhinyi, mwinyukhe mushuukhe mwibotokhelele, muwaambe intsila iye kumubiimbi, ilola kwe nyaantsa Imbesemu.”

Umukasya awa babaandu shitaambiso lwe khukhwiluŋuunya

26Lwanyuma Umukasya waakanikha isi Musa ni Aroni, 27nga abalomela khuuwa babaandu ba Isiraeli buurume buno, “Babaandu baboonaki bano kane boolese eena khukhuuntsiluŋuunyakho? Ise naaluwile lwe khukhwiluŋuunya khweesi baantsiluŋuunyakho! 28Ari tsya mubaboolele muri, ise netsuubiile ilala ndi indi khuutsya khubakholela sheesi mwakanile. 2914.29: Heb 3.17Mulikho mutsya khufwiila ano mu mubiimbi, ni kimilaambo kyeenywe kitsya khusaalanisibwa mu mubiimbi muno mwoosi. Khukhwaama nga nimwiluŋuunyile khusiise, mbaawo umusaani na mutweela khusiinywe uwoolesa kimiiko kabili ni khuufuurisawo, 30ulinyalisa khukhwiinjila mu shibala sheesi nabasuubisa khuubawa shibe shisheenywe ta, khuurusakho Kalebu, umusooleli wa Yefune, ni Yoswa umusooleli wa Nuni bonyene. 31Ne babaana beenywe bakyeekhe beesi mwaba mwaayiyembelela muri bakhaabawaambake, nibo beesi indereera bamenye mu shibala sheesi inywe mwalobile. 32Ne inywe mwabeene mutsya khufwiila ano mu mubiimbi, kimilaambo kyeenywe kisalanisibwe muno. 3314.33: Bur 7.36Babaana beenywe batsya khukyeendaana mu mubiimbi muno khuumala kimiiko kamakhumi kane, nga babonabona lwe bumiinyi bweenywe, khukhwoolesa inywe mweesi ni mulimala khuufwa muwewo. 34Mutsya khubonabona lwe bibyoonako byeenywe kimiiko kamakhumi kane kamabuufu, nga buli kumwiiko mutweela kubawo lwe shifukhu shitweela khu biifukhu kamakhumi kane, byeesi baalaambuuli baayila khuulaambuula shibala. Ni neesho kane mumanye khukhukhalasa ise sheesi khumanyisa. 35Iŋaŋasila ilala ndi babaandu bano babaali baboonaki, babewumbile atweela khukhuuntsiluŋuunyakho, batsya khuhelela ano mu mubiimbi. Ise Umukasya samweene niye ushikanikhile, ilala bakhaafwiile muno.”

36Baryo basaani likhumi khu beesi Musa aarumana khuutsya khuyama liiswa, nio lwanyuma bakobola nga bali ni kamakhuuwa kamabi kakaakila babaandu baarakikha khukhwiluŋuunya khu Mukasya, 37nibo babaakobola baakanikha buubi khu liswa, Umukasya waasiindikha buulwaale buubi naabi, bwaabahesa boosi. 38Ne Yoswa umusooleli wa Nuni, ni Kalebu umusooleli wa Yefune, waabalekhawo nga balamu.

Khukhwibwakala khwe shibala sha Kanaani khukhwanyoowa

(Kamakaambila 1.41-45)

39Aryo Musa n’amala khuuboolela babaandu ba Isiraeli bilomo bino byeesi Umukasya aabawa, baalila naabi. 40Kila benyukha kumutikhinyi mamilimili, beŋoonaŋoona khuuniina batsye mu shibala she tsingoongo sha Kanaani. Baaloma bari, “Ari ifwe khakhwinyukhe khutsye mu shibala sheesi Umukasya aakhusuubisa. Ilala ifwe khwayoonaka.”

41Ne Musa wabeelamwo ari, “Lwashiina ndi mulikho muminyaalila shilakilo sh’Omukasya? Byeesi mulikho mukhola sibinaraamba ta! 42Mukhakhakakho mwaatsya ta. Baasiku beenywe kane babafuuntsakilile, lwekhuuba Umukasya umweene s’ali ni nanywe ta. 43Nga ni mutsya, mulikho mutsya khwakaanana ni ba Amaleki, ni ba Kanaani, babaakane babaakhupe babawule muhele, lwekhuuba Umukasya umweene s’ali ni nanywe ta, lwekhuuba mwekaanile khuuloondelela Umukasya.”

44Ne babaandu ba Isiraeli baalekelesa byeesi Musa aababoolela, bekhuula baakhuumba baatsya mu shibala she tsingoongo sha Kanaani, abe yakhaba nga i Sanduuku iye Kamakaambila y’Omukasya siyaba ni nabo ta, ni Musa umweene naye s’aba ni nabo ta. 45Lwanyuma ba Amaleki ni ba Kanaani beekhaka khukhwaama mu shibala shaabwe she tsingoongo, baafuntsakilila ba Isiraeli, baabatimisa nga babaloondakho, khuutsya khwoolela ilala mu shiriimba sha Horuma.