Swahili Bible2

13

Barumana basaani likhumi na babili i Kanaani

(Kamakaambila 1.19-33)

1Umukasya waakanikha isi Musa ari, 2“Khukhwaama mu buli shikuuka she ba Isiraeli, roboramo umuraangilisi mutweela tweela, ubarumane i Kanaani, khuutsya khulaambuula liiswa lyeesi intsya khubawa.”

3Aryo Musa waarumana baaraangilisi bano khukhwaama mu mubiimbi kwe Parani, isi i kaambi ye ba Isiraeli yaba, nga Umukasya n’amulomela. 4Kamasiina kaabwe kaaba kari: Shamuwa umusooleli wa Zakuri, khukhwaama mu shikuuka sha Rewubeni; 5Shafati umusooleli wa Hori, khukhwaama mu shikuuka sha Simeoni; 6Kalebu umusooleli wa Yefune, khukhwaama mu shikuuka sha Yuda; 7Igali umusooleli wa Yusufu, khukhwaama mu shikuuka sha Isakaari; 8Hosheya umusooleli wa Nuni, khukhwaama mu shikuuka sha Efurayimu; 9Paliti umusooleli wa Rafu, khukhwaama mu shikuuka sha Benyamini; 10Gadiyeli umusooleli wa Sodi, khukhwaama mu shikuuka sha Zebuluuni; 11Gadi umusooleli wa Susi, khukhwaama mu shikuuka sha Yusufu (nisho shikuuka sha Manase); 12Amiyeli umusooleli wa Gemali khukhwaama mu shikuuka sha Dani; 13Sesuri umusooleli wa Mikaeli, khukhwaama mu shikuuka sha Asheri; 14Nahabi umusooleli wa Vofusi, khukhwaama mu shikuuka sha Nafutaali; 15Gewuweli umusooleli wa Maki, khukhwaama mu shikuuka sha Gadi; 16Kano niko kamasiina ke babaandu beesi Musa aarumana khuutsya khuulaambuula liiswa. Waashuusa lisiina lya Hosheya umusooleli wa Nuni, waamulaanga ari Yoswa.

17Nga Musa n’arumana babaandu bano mu shibala sha Kanaani, aabalomela ari, “Nga mwaamile ano, ni mutsye kwe ngaaki, mutsye mwoole mu mubiimbi kwe Mwaalo wa Kanaani, mwiilooseleyo khukhwoola mu shibala she tsingoongo. 18Mutsye mubone shibala isho nga ni shili. Mwaakha mumanye babaandu babashiilimo boola beenga, be kamaani namwe sibali be kamaani ta. 19Mutsye mubone oba liloba lyamwo liilayi namwe liibi, ni khuumanya babaandu baamwo bamenya mu kaambi busa, namwe mu biriimba bibiilikho tsimako. 20Mutsye mumanye oba liloba lyamwo litsowakho biilyo buulayi namwe ta, ni khuumanya nga shibala isho shilimwo kimisaala namwe ta. Ngana mube banyindaalifu, musuteyo ni kamatuunda kakaatsowa mu shibala sheene isho.” Shaba shiryo, lwekhuuba imbuka iyo yaba imbuka iye kimizabibu khuuroba.

21Baryo basaani likhumi na babili bano baatsya balaambuula liiswa ilyo, khukhwaamila ilala mu mubiimbi kwa Zini, khu luwaande lwe mwaalo, khuutsya khwoola khu shiriimba Rehobu, shishaba aambi ni bwinjililo wa Hamasi, khu luwaande lwe ngaaki. 22Khuunyoowa baatsya boola mu mubiimbi kwe Mwaalo we shibala isho, lwanyuma baatsya boola khu shiriimba sha Heburoni, shishaba shifuurisakho shiriimba sha Zowaani mu Misiri kimiiko musaafu. Ibweene mu Heburoni iyo, baabonayo babetsukhulu be bikuuka bye ba Anakimu bitaru nga nibo Ahimani, Sheshayi, ni Talumayi 23Baryo ni boola Mwitila Eshikolu, baremayo kusakya kukwaba kulikho kamatuunda ke kimizabibu, kukwaba kusiro naabi, shaakila shaayilila basaani babili khuukusuta nga baakubowele khu kuusaala. Khuuyililakho khu mizabibu kino, baasuta ni kamatuunda pomeguraneti ni kimifigi.

Basaani bakobosa alipoota iye khuulambuula

25Lwanyuma lwe khuulaambuula liiswa ilyo mu biifukhu kamakhumi kane, basaani tsana baakobola. 26Beetsa isi Musa ni Aroni, atweela ni babaandu ba Isiraeli boosi, i Kadeshi mu mubiimbi kwa Parani, baababoolela byoosi byeesi baabonayo. 27Baalomela Musa bari, “Khwatsiile khwoola mwiiswa lyeesi wakhurumaane khuulaambuula. Ilala lili liiswa liilayi lilirurukukhamwo kamabeele, ni bubuushi bwe ntsukhi. 28Ne khuurusakho ndi babaandu babaalimenyamwo bali be kamaani, ni biriimba byaabwe bili biboofu naluundi bilikho kamatikiiyi. Naluundi khwabooneyo babetsukhulu ba Anaki. 29Ba Amaleki nibo babaamenya mu Mubiimbi kukuuli i bikyele we linaambo ilyo, ne ba Hiti, ni ba Yebusi, ni ba Amori nibo baamenya mu shibala she mu ngoongo, ne ba Kanaani nibo baamenya khu ndulo khwe Nyaantsa imboofu Meditereniani ni luluutsi Yorudaani.”

30Ne Kalebu waabasilisa khaangu nga aloma ari, “Khakhwinyukhilemo khutsye khuyile liiswa ilyo! Naamanyile ndi khuunyalisa buulayi naabi khuuliwaamba.”

31Ne basaani tsana beelamwo bari, “Ifwe singene khunyalise khuuwaamba liiswa ilyo ta, lwekhuuba babaandu baayo bali be kamaani naabi khuukhufuurakho ifwe.” 32Baryo kila basaani tsana bano barakikha khuusaalanisa bilomo bye bubeeyi nga baloma bari, “Liiloba lyeesi khwaboone silinyala ni khuutsowamwo biilyo bibinyala khuuliisa babaandu babaalilimwo ta. Ni babaandu beesi khwabooneyo bali basaani baboofu be kamaani. 3313.33: Rak 6.4Ilala khwaboone ni ba Nefilimu, babetsukhulu ba Anaki. Baakhubonekheele nga baaboofu luukali, ni nafwe khwaboombele khwebona nga khufwaana busa nga kamateete, ni nabo nga baakhuboone, ifwe khwabafwaaniile khuryo.”