Swahili Bible2

11

Babaandu beluŋuunya

1Babaandu baarakikha khukhwiluŋuunya isi Umukasya lwe bikosi byaabwe. Umukasya n’abawulila, lirima lyeewe lyaamuniina, woosha ni kumulilo tsindulo tse bulafu tse kaambi yaabwe. 2Lwanyuma babaandu baatsya bekoontselela Musa, naye aryo waatsya waaloomba isi Umukasya, waasimisa kumulilo. 3Kila balaanga shiifwo lisiina bari Tabera11.3 Tabera: Lisiina lino limanyisa khukhwoosha, lwekhuuba mu lirima liikali Umukasya oosha i kaambi yaabwe ni kumulilo.

Babaandu beluŋuunya lwe ntsala

4Aabawo babaandu banaambo babaakyeendela atweela ni ba Isiraeli. Nibo baarakikha khukhwiwotooma nga bakana khuulya tsinyama, baakholeesa ba Isiraeli nabo khukhwiwotooma, nga beŋuluŋuunya bari, “Khuba nga khukhubeelekho ni tsinyama khulya! 5Nga ni khwaba mu Misiri, khwalyatsaka tsinyeeni tsoosi tseesi khwakanatsa busa, khwabatsaka ni suusuti, ni otameloni, buutungulu, ni galiki. 6Ne bona ari kamaani koosi kaakhuweelemo lwe ntsala. Ate mbaawo biilyo bibiindi byoosi byeesi khuli khuulyakho ta, khuurusakho imaanu yino isi khulya buli shifukhu.”

711.7: Luky 16.31Imaanu yino bwaba bumiitso bunyelele buri, abe buli bwe raangi ifwaanamwo nga iwaanga. 811.8: Luky 16.13-15Abe buli kumutikhinyi babaandu barura baatsya baabwangalaka, lwanyuma baabutsungila mu bibwiili, namwe baabusya bwekyela buufu, lwanyuma baabukyemusila mu saatsi tsaabwe, baakhola bukeeki. Kumuŋaawo kwe bukeeki buno abe kuli nga kwe tsikeeki tseesi bakhalaangile ni buto (kamafura kakaakhalaanga). 9Abe buli lweesi liime likwiila mu shilo, imaanu yino yakwiila atweela ni nalyo.

10Musa waawulila babaandu ba Isiraeli nga beluŋuunya, nga beemikhile mu bipuri, aambi ni kamasari kaabwe. Aryo Musa kumutaambo kwaamuwaamba, lwekhuuba nibo baakila Umukasya waakhalala naabi. 11Kila Musa atsya isi Umukasya waaloomba ari, “Umukasya, lwashiina ulikho umbirisaka ise buubi uryo? Shiina sheesi ise nakhola shishikila bino byoosi byaakholikhakho biri? Lwashiina kila umbeele ise buufunisi buukali buri bwe khuuloolelela babaandu bano? 12Shiili ise niye uwabasaala khuuba babaana baase ta! Shiina shikila iwe waandakho ise kumukuku kwe khuubalela, imbasute khuubayila mu shibala sheesi wasuubisa bakuuka baabwe? 13Ari ise intsya khwaamisa eena tsinyama tse khuukabila babaandu bano boosi? Lwekhuuba ari bona bekhala baaŋuunya ise nga baanoomba bari imbawe tsinyama balye. 14Buufunisi buno bweesi umaambisile buli bukali naabi. Ise senyene inanyalisa ndyeena khuuloolelela babaandu bano? 15Iwe siinga uba nga utsya khuumbirisatsaka uryo, maaya umaambile shiisa, untsire bwiiri busa aluno ari, nio indekhe khukhwiloosela khuubona kumutaambo nga kuno luundi ta.”

Musa arobora baaraangilisi kamakhumi musaafu khuumuyeetakho

16Kila Umukasya alomela Musa ari, “Roborayo luundi ubuusanise atweela basaani babaali baaraangilisi be lukoosi, baboola kamakhumi musaafu, utsye atweela ni nabo mu Lisari Likhosefu, ubalome beemikhe ibweene iyo ni nawe. 17Nase kane niikhe isi muli, inganikhe ni nawe. Kane imbukulekho umwoyo we bunyala uuli mwiiwe, imure mu baaraangilisi bano, nio nabo banyale khukabananila atweela ni nawe mu khufunisikha lwe babaandu baase. Nashiryo iwe singene ufunikhe ni kumukuku kwe khuubalolelela kuno wenyene ta. 18Boolela babaandu ba Isiraeli bano, bepyeeluuse babeene, lwekhuuba kumukaamba bakhaafune tsinyama balye. Lwekhuuba nawuliile khukhwiluŋuunya khwaabwe lwe khuukana khuulya tsinyama, ni khuuloma bari baaba bali buulayi nga ni baaba mu Misiri. Nashiryo Umukasya umweene atsya khuubawa tsinyama tseesi kane balye. 19Tsinyama tsino sibali khuutsya khutsiliila khu shifukhu shitweela, namwe mu biifukhu bibili, namwe biraano, namwe likhumi, namwe mu makhumi kabili ta. 20Ne batsya khulya tsinyama khuumala kumweesi kumubuufu, tsibalokhele, khukhwoolesa ni kane tsindala tsibarurakile mu moolu kaabwe, tsibalwaase. Shino kane shibakholekhekho lwekhuuba baakhalilewo khuuminyaalila Umukasya, uuli akari mu nibo, naluundi baakhalilewo khukhwiŋuluŋuunya nga baloma bari lwashiina baarura mu Misiri.”

21Ne Musa weelamwo isi Umukasya waamuloma ari, “Bona ise ano indi khuuraangilila basaani baakhulu babeene baboola kimyeeka kisesaba (600,000). Ari unyala uryeena waaloma uri kane ibewo tsinyama tsitsibamala nibo atweela ni be muungo mwaabwe khuulya, khuumalila ilala kumweesi kumubuufu? 22Ifwe abe khwaakhakhoonya kamasheese atweela ni tsikhaafu tseene tsoosi tseesi khuli natso, manya binyala byaabamala? Namwe abe khwaakhatsya khwawaamba tsinyeeni tsitsiili mu nyaantsa tsoosi khwaabawa, sitsinyala tsaabamala ta!”

23Umukasya naye weelamwo Musa ari, “Wambaasa uri iliwo shishinyala shakhaasa Umukasya? Ari iwe lolelela busa, kane ubone nga bilomo byase byoosi byeesi inomile, bitsya khwoolelela.”

24Aryo Musa waatsya waaboolela babaandu bilomo byoosi byeesi Umukasya aaloma. Lwanyuma waabuusanisa atweela baaraangilisi tsana kamakhumi musaafu, waatsya ni nabo isi i Lisari Likhosefu. 25Kila Umukasya eekhila mu lifuumbi waakanikha ni naye. Lwanyuma waabukulakho umwoyo uwe bunyala uwaba mu Musa, waamukwaarisa baraangilisi tsana bano. Aryo nga Umwoyo w’Omukasya n’abeekhakho, baarakikha khuukanikha bye buŋoosi. Ne shonyene indi, baashikhola kumuluundi kuno mutweela kwonyene.

26Ne batweela khu baaraangilisi nga nibo Elidadi ni Medadi baarama mu kaambi, baalekha khutsya isi Lisari Likhosefu ta. Ne Umwoyo w’Omukasya n’ekha, nabo waabafuusilisilamo, baarakikha khuukanikha bye buŋoosi nga bali mu kaambi. 27Yabawo umusooleli uwatimaka waatsya waaboolela Musa byeesi Elidadi ni Medadi baaba bali khuukhola.

28Kila Yoswa umusooleli wa Nuni, uwaba umwakaanisi wa Musa, khukhwaama nga ashiili mukyeekhe, alomela Musa ari, “Musakhulu, waakha khuubakamisa!”

29Musa naye waamwiilamwo ari, “Iwe shino shaakhuwaambilekho naabi khu lwase? Iba nga shishinyalikha, khali Umukasya atsukhiliile Umwoyo weewe khu baandu beewe boosi, banyalisa khuukanikha bye buŋoosi!” 30Lwanyuma lwayo Musa atweela ni baaraangilisi tsana kamakhumi musaafu beelayo mu kaambi.

Umukasya asiindikha binywiinywi tsisiindo

31Lwanyumakho Umukasya waasiindikha ikhuungu iyawuutsa yareera binywiinywi tsisiindo khukhwaama khu nyaantsa, yaatsireera tsaamalatana aambi ni kaambi iye ba Isiraeli. Binywiinywi bino byebuunga atweela nga bipamburukhila aasi busa, khuumala tsikilomita tsitsoolakho busa khu buli lubeka lwe kaambi. 32Baryo babaandu baatsya bawaambaka binywiinywi bino, khuumala biifukhu bibili bibuufu. Buli mutweela wawaambaka biikali khukhwoolesa mu kilo shikana shitweela (1,000). Baryo babyaanikhila ibulafu we kaambi khukhwooma. 33Baryo ni baaba nga bashiiliyo ni tsinyama tsino tsingali khuulya, lirima lyaaniina Umukasya khulwe babaandu bano, waabasiindikhila luufu luubi naabi mu kaambi yaabwe khuuhesa babaandu.

34Lwanyuma nga baamalile khuusiikhaka kimilaambo kye babaandu babaaba ni kumukhabyo kumukali lwe tsinyama, shiifwo isho baashilaanga bari Kiburosi Hataava (shishimanyisa shiri Tsiŋani tse kumukhabyo).

35Khukhwaama i Kiburosi Hataava iyo, babaandu ba Isiraeli baasiimbulawo beeloosela ni lukyeendo khuutsya i Hazerosi.