Swahili Bible2

10

Tsikhoombi tse feetsa

1Umukasya waalomela Musa ari, 2“N’ukholeyo tsikhoombi tsibili nga utsikhola khukhwaama mu feetsa isi bakhupile buulayi. Kane muraambisatsake tsinyene tsino khukuukuula babaandu khukhwiitsa atweela, namwe khabe khaabonelo khe khuubakuukuula khukhwilooselayo ni lukyeendo. 3Tsikhoombi tsino tsoombi nga baatsifuurire kumuluundi mutweela, buli mutweela aakha khukhwiitsa akhwakaanane iwe abwinjililo e Lisari Likhosefu. 4Ne siinga bafuura ikhoombi ndweela yonyene, baaraangilisi be bikuuka likhumi na babili nibo babaakane beetse babusane isi uli. 5Siinga likono lilirura khukhwaama mu khoombi liba liliimbi, bikuuka bibiiba nga bili mu kaambi iye bwaamanyaanga, nibyo bibiiba ni khukhwiinyukha bikyeende bitsye. 6Ne siinga likono liliimbi lino balifuura kumuluundi kwe khabili, bikuuka bibiiba bili mu kaambi iye mwaalo, nibyo bibiiba ni khukhwinyukha bikyeende bitsye. Nashiryo, likono lilifuura, ne nga lili liliimbi, liba lye khukhwinyukha barakikhe khuukyeenda. 7Ne siinga mukana khufuura ikhoombi iye khukuukuula babaandu beetse atweela, muli ni khuukifuura musaambo ikiindi. 8Basaayi, nga nibo basooleli ba Aroni, nibo babaakane babe babafuura tsikhoombi. Lino kane libatsake likaambila lilikhashuukhakho ta biilo ni biilo.

9“Buli lweesi kane mube nga mutsya khusoolana ni baasiku babeetsa khuubebwakala mu shibala sheenywe, muli ni khufuura tsikhoombi tsitsireewula. Isho shikile ise Umukasya Wele weenywe, imbashebulile imbawulile, niitse mbaawonese khukhwaama isi baasiku beenywe beene. 10Ni mu mbuka yeenywe iye kumwikhoyo, nga nibyo biseela bye Kamayiiya ke Kumweesi Kumushaakha, ni kamayiiya kakaandi koosi, muli ni khufuura tsikhoombi, nga muwaanayo tsisaayilo tsintsoshe ni tsisaayilo tse lukoosi. Isho nasho kane shibe she khushebulililakho, imbawonese. Ise ndi Umukasya Wele weenywe.”

Ba Isiraeli basimbula khukhwilooselayo ni lukyeendo

11Khu shifukhu she kamakhumi kabili she kumweesi kwe khaabiili, mu mwiiko kukuukhola khabili, khukhwaama nga ba Isiraeli ni baama i Misiri, lifuumbi lyenyukha khukhwaama khu Lisari Likhosefu lyelooselayo. 12Baryo babaandu ba Isiraeli benyukha khukhwaama mu kaambi yaabwe, baatsya khuurura mu mubiimbi kwa Sinaayi. Lwanyuma lifuumbi lyaabaraangilila lyaatsya lyaawolela mu mubiimbi kwa Parani. 13Khukhwaamila abweenewo, bakyendatsaka khusiintsiila khu bilakilo by’Omukasya, bibyabaweebwa khubirira mu Musa.

14Shikuuka sha Yuda ni bikuuka bibiindi bibyaba mu tsikaambi tsitsesaanewo, nibyo bibyaraangila khuutsya, nga baasutile ibendela yaabwe. Nahashoni umusooleli wa Aminadabu, niye uwaba umuraangilisi we shikuuka sha Yuda. 15Nesaneli umusooleli wa Zuwari, niye uwaba umuraangilisi we shikuuka sha Isakaari, 16ni Eliyabu umusooleli wa Heloni, niye uwaba umuraangilisi we shikuuka sha Zebuluuni.

17Abe nga basaambuule weema, basooleli ba Gerishoni, ni basooleli ba Merari, nibo babaakisutatsaka, bakyeenda ni nayo.

18Shisheelakho, shaba shikuuka sha Rewubeni, ni bikuuka bibiindi bibyaba mu tsikaambi tsitsesaanewo, nabyo byaloondakho. Nabo baatsya nga baasutile ibeendela yaabwe. Elizuri umusooleli wa Shedewuri niye uwaba umuraangilisi we shikuuka sha Rewubeni. 19Ni Shelumiyeli umusooleli wa Zurishadaayi, niye uwaba umuraangilisi we shikuuka sha Simeoni, 20Eliyasaafu umusooleli wa Dewuweli, niye uwaba umuraangilisi we shikuuka sha Gadi.

21Lwanyuma shikuuka sha Kohasi nasho shaloondakho, nga baasutile bibiindu bikwalaafu bye mu Lisari Likhosefu. Abe imbuka isi batsya khwoolela mu shifwo e khuwolela luundi, abe baanyoola nga baamalile khaale khukhwombekha i weema.

22Shisheelakho shaba shikuuka sha Efurayimu, ni bikuuka bibiindi bibyaba mu tsikaambi tsitsesaanewo. Nabo baatsya nga baasutile ibendela yaabwe. Elishaama umusooleli wa Amihudi, niye uwaba umuraangilisi we shikuuka sha Efurayimu. 23Ni Gamaliyeli umusooleli wa Pedazuri niye umuraangilisi we shikuuka sha Manase, 24ni Abidani, umusooleli wa Gidiyoni niye uwaba umuraangilisi we shikuuka sha Benyamini.

25Shishakamisayo khukhwinyukha shaba shikuuka sha Dani, ni bikuuka bibiindi bibyaba mu tsikaambi tsitsesaanewo. Shikuuka sha Dani shino ni bikuuka bibiindi bino, nibyo byakyeenda nga byatseetile ba Isiraeli khukhwaamila inyuma waabwe. Nabo baatsya nga baasutile ibendela yaabwe. Ahiyezeri umusooleli wa Amishadayi, niye uwaba umuraangilisi we shikuuka sha Dani. 26Ni Pagiyeli umusooleli wa Okurani, niye uwaba umuraangilisi we shikuuka sha Asheri, 27ni Ahira umusooleli wa Enani, niye uwaba umuraangilisi we shikuuka sha Nafutaali.

28Luno nilwo lulwaba lulwantsaango mweesi ba Isiraeli boosi baaba nga bakhuumba khuukyeenda, buli lweesi baaba nga baarakikhile lukyeendo lwaabwe luundi.

29Lwanyuma Musa waalomela Hobabu, umusooleli wa paapawe umukhwe Rewuweli uwe Midiyani ari, “Bona khulikho khwinyukha ano khuutsya mu shifwo sheesi Umukasya aakhusuubisa ari atsya khuukhuwa ifwe. Naluundi umweene waakhuboolela ari byoosi bitsya khukhuutsiila ifwe buulayi. Nashiryo, ikhuloomba ndi utsye ni nafwe, kane khukhakekho khuubona khuri nawe bibiindu bikhutsiila buulayi.”

30Ne Hobabu waamwiilamo ari, “Sinatsya ni nanywe ta. Ise ndi khukhwiilayo iweefwe isi babaandu baase.”

31Ne Musa waamulomela ari, “Naakhwikoontseleele, ukhakhulekha ta, tsya ni nafwe! Iwe kane ukhwookesatsake eena akhulayi isi khura tsikaambi tseefwe, lwekhuuba iwe waamanya biifwo bye mu mubiimbi muno buulayi. 32Ni shishiindi, iwe siinga utsya ni nafwe, kane khukhuwekho bibiindu biilayi byoosi byeesi Umukasya kane akhuwatsake.”

Babaandu barakikha lukyeendo

33Baryo babaandu benyukha baarakikha lukyeendo lwaabwe khukhwaama khu lukiingi Sinaayi, Lukiingi lw’Omukasya. Baakyeenda lukyeendo lwe biifukhu bitaru, ni ba Levi babaasutatsaka Isanduuku iye Kamakaambila, nibo babaaraangilatsaka ibweeni, nio Umukasya waaba nga abokyesa eena isi banyala baafuna shiifwo e khuuwolela. 34Ni baaba nga bakyeenda buli oosi isi baatsyatsaka, lifuumbi ly’Omukasya lyabatsaka angaaki aabwe buli nyaanga.

3510.35: Zab 68.1Abe buli lweesi ba Isiraeli benyukhila baarakikha lukyeendo, Musa aloomba ari, “O Umukasya yinyukha ufuure baasiku boowo, ubasalanise! Abo boosi babaakhubiyila iwe, batitukhe!” 36Naluundi abe buli lweesi beemikhila khuuwolakho mu kaambi, Musa abe ndi aloomba ari, “O Umukasya, n’ukobole, ube aambi ni bikana ni bikana bye babaandu ba Isiraeli.”