Swahili Bible2

SHIITABO SHA

NEHEMIYA

KHUKHWAANTSULA

Lwanyuma lwe kimiiko likhumi na kibili nga bibiindu byeesi bakanikhakho mu Shiitabo sha Ezira byabeelewo, aabawo Umuyudaaya mutweela bari Nehemiya, waafuna buurume bubuwaamba khu Yerusalemu. Abe buloma buri, kamatikiiyi ke shiriimba kaamala khaale khuuwumbukhaka, ni biilibwa bye shiriimba byeesi boosha ni kumulilo, babaandu bashiili khubyoombakha bushaakha ta.

Nehemiya yuno abe amenya mu Pasiya, mu shiriimba shishilaangibwa shiri Susa. Abe niye ali uwakaanisa umuyiinga Ahasweero, uwa Pasiya. Nashiryo lutweela Nehemiya waaloomba Wele, ari Ahasweero amufukiilise atsye ombakhe bushaakha shiriimba Yerusalemu. Lwanyuma Ahasweero waasiindikha Nehemiya khuutsya, naluundi waamuwa ni bibikanibwa mu mulimo ukwo.

Lwanyuma lwa Nehemiya khukhwoola mu Yerusalemu, naluundi nga waamalile khuurakikha kumulimo kwe khukhwombakah bushaakha, baraangirisi be kamanaambo kakaabebotookhelele baalekelesa naabi Bayudaaya, naluundi baabakhupa liyino bari balikho bakana khuuminyaalila umuyiinga wa Pasiya luundi. Baasiku bano khaba baakhakakho khukhwibwakala Yerusalemu, nga bakana beere Nehemiya. Ne ikhumaliilisa, bombakha kamatikiiyi bushaakha, baaramo ni biilibwa, bawaanayo shiriimba bushaakha isi Wele. Khano khaaba khaabonelo khari Wele waweele babaandu beewe tsikhabi.

Ne Nehemiya waashimanya ari akhali nga babaandu beloseele khuuwulila Wele, Wele singane abawe tsikhabi ta.

Inoondekhana iye bibiilimwo

Umuyiinga Ahasweero asiindikha Nehemiya mu Yerusalemu (1.1—2.10)

Khukhwoombakha litikiiyi bushaakha (2.11—4.23)

Nehemiya enaanayo khu bataambi (5.1-19)

Bamaliilisa litikiiyi (6.1—7.3)

Babaandu babaakobola khukhwaama mu bubowe (7.4-73)

Ezira asoma kamakaambila ka Wele (8.1-18)

Babaandu beebiyisa bibyoonako byaabwe (9.1-37)

Babaandu bakhola indakaano iye khuuwulila Wele (9.38—10.39)

Babaandu babeetsa khuumenya mu Yerusalemu ni Yuda (11.1-36)

Basaayi ni ba Levi baabakobola (12.1-26)

Nehemiya awaanayo shiriimba isi Wele (12.27-47)

Byeesi Nehemiya aashusaŋanamo (13.1-31)