Swahili Bible2

8

Ezira elwaatsila babaandu Kamakaambila ka Wele

1Kumweesi kwe kumusaafu kwe Bayudaaya ni kwoola, babaandu boosi baabuusanila mu shifwo shilaangibwa Shiilibwa she Kameetsi. Lwanyuma balomela Ezira khuureera shiitabo she kamakaambila k’Omukasya, keesi aawa ba Isiraeli nga abirira mu Musa.

2Nashiryo, khu shifukhu shishinyoowa mu mweesi kwe kumusaafu, umusaayi Ezira, waareera kamakaambila ako isi lituuli lye babaandu. Muno mwabamo basaani ni bakhasi, babanyala khuutekeela byeesi baabasomela. 3Ezira welwaatsa kamakaambila ako ni likono lye angaaki, khukhwaama kumutishinyi, khukhwoolisa mwihangilwe, nga waloleleele mu shibaanga isi babaandu baaba. Babaandu boosi baarekeeresa ibyo bibyaba mu Shiitabo she Kamakaambila buulayi bubweene. 4Ezira aasoma bino nga weemikhile khu sikuusi she bisaala, sheesi yaba baakhola khulwe kumulimo kweene kuno. Abo babaaba nga beemikhile khu mukhono kweewe kumulayi baaba nibo: Matisiyiya, Shema, Ananiya, Uriya, Hilikiya, ni Mayaseya. Abo abe babeemikhile khu mukhono kweewe kumunyeletsi baaba nibo: Pedayiya, Mishayeli, Malikiya, Hashumu, Hashi, Badana, Zekariya, ni Mesulamu.

5Ezira waaniina khu sikuusi, weemikha isi babaandu boosi banyala baamubonela buulayi, kila abiikula shitabo nga babaandu boosi babona. Nga waashibikuule, babaandu boosi benyukha beemikha khu ngaaki. 6Kila Ezira asiima Umukasya Wele uwe kamaani. Babaandu boosi beelamo bari, “Amiina, Amiina.” Beenamisa kimirwe kyaabwe aasi, besaaya Umukasya.

7-8Nga babaandu baaramire mu bifwo byaabwe mweesi baaba, aabawo ba Levi babaasontsoola byeesi abe Ezira alikho asoma. Baaba nibo: Yeshuwa, Bani, Sherebiya, Yamini, Akubu, Shabesayi, Hodiya, Maseyiya, Kelita, Azariya, Yozabadi, Hanani, ni Pelayiya.

9Babaandu ni baawulila Kamakaambila ka Wele nga ni kaasomebwa, baarakikha khuulila kamasika. Ne Nehemiya uwaba niye gafana, ni Ezira uwaba umusaayi naluundi umuroni, ni ba Levi abe babaali khuuleekela babaandu, balomela babaandu boosi bari, “Shifukhu shino shili shikhosefu isi Umukasya Wele weefwe. Ni nashiryo mukhalila kamasika namwe mwaba mu mutaambo ta.”

10Kila Nehemiya alomela babaandu ari, “Ni mutsye tsiingo tsyeenywe, muteekhe biilyo biilayi, mulye naluundi munywe iviini. Isi uyo ukhali na shoosi ta, ni mumukabilekho. Khulwekhuuba shifukhu shino shili shikhosefu isi Umukasya weefwe. Nashiryo mukhaba mu mutaambo ta, khulwekhuuba isangaalo y’Omukasya niko kamaani keefwe.”

11Ba Levi boosi baawoleelesa babaandu, nga babalomela bari, “Shino shili shifukhu shikhosefu. Nashiryo mukheyembelela, namwe mwaaba mu mutaambo ta!” 12Lwanyuma babaandu boosi nga beelileyo tsiingo tsyaabwe, baaba mu mwikhoyo kwe khuulya ni khuunywa, ni khuukabilakho abo babaakhaaba ni she khuulya ta. Khulwekhuuba baaba batekeelile buulayi ibyo byeesi baabasomela khukhwaama mu Makaambila k’Omukasya.

Kamayiiya ke Biisari

13Khu shifukhu shishakhola khabili she kumweesi mweene ukwo, baraangirisi be tsiingo tsyoosi, atweela ni basaayi, ni ba Levi, baatsya baabuusanila isi umuroni Ezira, bari nio beyike bilomo bibiili mu Makaambila ako. 148.14: Lev 23.33-36,39-43; Maka 16.13-15Baanyoola nga shaaronebwa mu Makaambila keesi Umukasya aawa Musa, shiri babaandu ba Isiraeli nga balikho bakhola kamayiiya ke kumweesi kukuukhola musaafu, bali ni khuumenya mu masari. 15Naluundi bali ni khuushikuukuulila mu buli shiriimba ni mu Yerusalemu nga baloma bari, “Ni mutsye mwirome, buli mutweela afune tsisakya khukhwaama khu misaala kimi olivu, ni khukhwaama khu mi olivu kikitsowa kyonyene busa, ni khukhwaama khu makheendu, mwoombakhemo biisari.”

16Nashiryo babaandu baafuna tsisakya, buli mutweela woombakha khasari khu ngaaki khwe ntsu yeewe, ni khu lwaanyi khweewe, ni khu lwaanyi lwe ntsu ya Wele, mu shibaanga she Shiilibwa sha Kameetsi, ni shibaanga she Shiilibwa sha Efurayimu. 17Buli mutweela abe uwakobola khukhwaama i Babulooni, ombakha liisari. Baamenya mubweene umwo ni kumwiikhoyo, nga balya Kamayiiya ke Biisari. Kuno kwaba kumuluundi kwaabwe kukuunyoowela ilala, khukhwaama nga abe Yoswa, umwaana uwa Nuni, n’afwa. 18Mu biifukhu bibyanyoowa musaafu bye kamayiiya ako, abe buli shifukhu Ezira elwaatsila babaandu Kamakaambila ka Wele. Nio uri khu shifukhu shishikhola shinaane, boosi baabuusana khukhwisaaya Wele, khuuloondekhana ni shisharonebwa mu Makaambila.