Swahili Bible2

6

Bakholela Nehemiya tsimbomelo

1Lwanyuma tsilomo tsyoolela Sanabalati, Tobiya, Gesheni, ni baasiku beefwe babaandi, nga tsiloma tsiri ise naamalile khaale khukhwoombakha litikiiyi bushaakha, nga mbaawo isi umuundu anyala waakhalisila wengila mukari ta. Ikhaba nga abweene awo abe ise ishiili khura kimilyaango mu bilibwa ta. 2Kila Sanabalati ni Gesheni baasiindikhila ise buurume nga buloma buri, “Ni wiitse mu shaalo shitweela she mu Litila lilaangibwa Ono, khwaakananemo.” Ne ise naashimanya ndi balikho bakana khukhuukhola ise buubi. 3Nashiryo ise nabasiindikhila baarume, baatsya baabalomela bari, “Ise ndi khuukhola buraambi kumulimo kumukhulu naabi, sinyala neetsa iyo ta. Ise sinyala nalekha buraambi bwase, bari niitse iyo khuubakaanana inywe ta.” 4Baasiindikhila ise buurume nibwo butweela kimiluundi kine, nga buli kumuluundi nase mbeelamo musaambo niyo ndweela.

5Ikhumaliilisa, Sanabalati waasiindikha umurume khukhwiitsa isi ise, nga waasutile mu mukhono mweewe ibaluwa intsikule, 6nga iloma iri, “Iliwo tsilomo tsitsimalataane mu manaambo kakaandi, nga tsiloma tsiri iwe ni Bayudaaya mulikho mwoombakha litikiiyi, khulwekhuuba mukana khuminyaalila umuyiinga, nio iwe wikyele umuyiinga. Ikhaba Geshemu aloma ari bibiindu bino bili bituufu. 7Bari uli ni baŋoosi nabo mu Yerusalemu, bababoolela babaandu bari, ‘Mu Yuda mulimo umuyiinga.’ Iwe waashimanyile uri umuyiinga uwa Pasiya kane awulile tsilomo tsino. Nashiryo yiitsa khuweesane kamakesi khu biindu bino.”

8Nasiindikhila Sanabalati buurume nga buloma buri, “Bibiindu byeesi iwe ulikho uloma ibyo sibili bituufu ta. Iwe ulikho ubyaamisa busa mu murwe kwoowo.”

9Baasiku beefwe abe balikho bakana khuukhuriisariisa ifwe nga bambaasa bari kane ifwe khube ni khuurya, khwaantsukhe buraambi. Ne ise naloomba isi Wele indi ambe kamaani ke khukhola buraambi ubwo.

10Shifukhu shitweela, natsya khukeniyilakho Shemayiya, umwaana uwa Delayiya, naluundi umwitsukhulu uwa Mehetabeli. Abe weyikaliliile muntsu. Kila anomela ise ari, “Khayo khutsye mu Lisaayilo Likhulu, nga nilili intsu ya Wele, kwiingile mu shifwo shishiminyisa bukhosefu6.10 Abe basaayi bonyene nibo babaafukiilisibwa khukhwiingila mu shifwo shishiminyisa bukhosefu. Umuundu ukuundi yeesi nashikhola, abe eribwa., khwifuungilemo. Khulwekhuuba baasiku boowo bakholile luwomelo lwe khukhwiira iwe mu shilo she shaleelo shino.”

11Ne ise naamureeba indi, “Umusaani nga ise, inyala naatitukha, naatsya neebisa mu Lisaayilo Likhulu, bari nio imbe umulamu? Singana ntsye ta!”

12Khaanguukho ise naashimanya, naabona nga Wele siwarumaane Shemayiya khukhuumba ise tsilomo tsye buŋoosi ta. Akhali ndi abe Tobiya ni Sanabalati, bamukulile khukhola shino. 13Abe bamukulile khukhuundiisariisa ise ikhole nga abe n’alomele, nio akile abe ise ikhole shishiindu shishikhali shilayi ta, akile boonakise lisina lyase.

14Ise naloomba Wele ndi awe Tobiya ni Sanabalati shitaambiso, khulweebyo byeesi baaba baakholile. Naluundi naloomba ndi Wele awe Nowadiya, umuŋoosi umukhasi shitaambiso, atweela ni baŋoosi boosi babaakhakakho khukhuundiisariisa ise.

Kumulimo kuwa

15Nga biifukhu kamakhumi kabili na biraano mu mweesi kukuulaangibwa Eluli,6.15 Kuno kuli kumweesi kukuukhola khasesaba mu khubala khwe ba Isiraeli, kubawo khukhwaama khukari khwa Akusito, khukhwoola khukari khwa Seputemba. khwaamaliilisa kumulimo kwe khukhwoombakha litikiiyi. Shakhuyilila ifwe biifukhu kamakhumi karaano na bibili (52). 16Ne baasiku beefwe boosi ni baawulila bari khwaamalile buraambi bwe khukhwoombakha litikiiyi, ikhaba kamanaambo koosi kakaakhwibotookhelele ifwe, kaarya naabi. Khulwekhuuba baamanya busa bari Wele weefwe niye uwakhuyeeta ifwe mu khwoombakha litikiiyi bushaakha.

17Naluundi mu mbuka iyo, abe baraangirisi be mu Yuda baaronera Tobiya tsibaluwa tsingali, ni naye nga abeelamo. 18Babaandu baakali mu Yuda abe beesamo Tobiya lukoosi khu lwe tsilomo tsibili: Tobiya abe waayila umukhaana uwa Shekanaya, umusoleeli uwa Ara; naluundi abe Yehohanani umusoleeli uwa Tobiya, abe waayila umukhaana uwa Mesulamu, umusoleeli uwa Berekiya. 19Nashiryo babaandu bamboolela bibiindu biilayi bibiwaamba khu Tobiya, ni naye baamuboolela bibimaamba khusiise. Shikila Tobiya asiindikhatsakila ise tsibaluwa nga akana khube basaale.