Swahili Bible2

5

Nehemiya ayeeta bataambi

1Lwanyuma aabawo basaani batweela ni bakhasi baabwe, babeŋuluŋuunya khu baraangirisi be Bayudaaya, 2nga baloma bari, “Ifwe baalala khuli ni babaandu baakali muungo tsyeefwe. Khuuliisa babaandu abo boosi nio babe baalamu, shikanibwa biilyo biikali naabi.”

3Aabawo babaandi babaaloma bari, “Khulwe ntsala, khulikho khuwaanayo kimikuunda kyeefwe, ni biilimwa byeefwe, ni tsiingo tsyeefwe khuri nio khufune biilyo.”

4Aabawo babaandu babaandi babaaloma bari, “Khwaayikopa kamapeesa khuri nio khusasule abo babaali mu buwuli, khulwe kimikuunda ni biilimwa byeesi khuli ni nabyo. 5Ikhaba nga nafwe khuli Bayudaaya nga baawuli beefwe ni bali, naluundi ikhaba nga babaana beefwe nabo bali busa nga babaabwe, ne ifwe khuli ni khusiindikha babaana beefwe mu bukulwa. Babaana beefwe bakhaana batweela, babaandu baamala khaale khuubayila mu bukulwa. Ne mbaawo sheesi ifwe khunyala khwaakhola ta, khulwekhuuba kimikuunda kyeefwe ni biilimwa byeefwe, khwaabiwaanayo isi babaandu babaandi.”

6Ise ni nawulila byeesi baaloma, ni byeesi beŋuluŋuunya, lirima lyamaamba liikali. 75.7: Luky 22.25; Lev 25.35-37; Maka 23.19,20Nanyoowa nambaasa khu biindu bino mu mwoyo kwase, kila lwanyuma inomela be mu ntsu iy’omuyiinga ni baraangirisi ndi, “Inywe munyala muryeena mwarusa khu baandu babeenywe babeene kamafuurisa?”

Kila inaanga lubuusano lwe babaandu boosi, nga ingana inganikhe khu baraangirisi abo. 8Kila ise inoma ndi, “Ifwe khwakhakakho nga ni khunyala, khuusikula Bayudaaya basheefwe abe babaakulisibwa mu manaambo kakaandi. Ari inywe mulikho mukulisa babandaayeenywe babeene, nio lwanyuma babareere bakhukulise ifwe!” Ni naloma isho, be muntsu iy’omuyiinga ni baraangirisi baasila busa, khulwekhuuba baamanya bari byeesi naloma abe bili byaŋali.

9Kila ise niloosela inoma ndi, “Shishiindu sheesi mulikho mukhola seshilikho shiilayi nakhari ta! Khuubirira mu buulamu bweefwe bweesi khumenya, ifwe khuli ni khukhwiisamo Wele shiriifwa. Shino kane shikile kamanaambo kakaandi kakhulekelese ifwe. 10Ikhaba ise, ni baalebe baase, ni basaale baase, nafwe khulikho khwikopisa kamapeesa ni biilyo, ne khuli ni khuulekhelawo khuubabaantsa khuri bakhuliyile. 11Lwe shaleelo luno, ni mubakoboseleyo kimikuunda kyaabwe, ni biilimwa byaabwe, ni tsiintsu tsyaabwe, ni byeesi mubabaantsa byoosi, atweela ni kamafuurisa keesi baamala khaale khuubasasula.”

12Kila baraangirisi baantsilamo bari, “Kane khukhole nga iwe n’ulomile, khwiseyo bibiindu byaabwe, khulekhe khusaba khuri bakhuliyile ta.” 13Lwanyuma nasisakula tsisawu tsye khu ngubo yase nga inoma indi, “Ni mulekha khuuloondelela sheesi musuubisile khuukhola, nanywe Wele kane abakholele aryo; kane abarusekho byoosi byeesi muli ni nabyo, ikhaba tsiintsu tsyeesi muli ni natsyo.”

Kila babaandu boosi beelamo nga baloma bari, “Kane khukhole sheesi khusuubisile.” Lwanyuma baruuya Umukasya, baakhola nga abe ni baaloma.

Nehemiya ali umuundu uwaanayo khu byeewe

14Ise naroborebwa khuuba Gafana uwa Yuda, mu mwiiko kweesi umuyiinga Ahasweero olisila kimiiko kamakhumi kabili kye buyiinga. Ise neloosela khukhwoolisa niye n’amala kimiiko kamakhumi kataru na kibili, nga ise noolisile likhumi na kibili. Ne mu mbuka iyo yoosi, ise samweene atweela ni baalebe baase, khwaloba khuulya kumukabo abe kukuuweebwa Gafana. 15Ne abe ba Gafana boosi babaanyoowa khuubawo nga ise ishiili khubawo ta, abe baara khu baandu kamakatala kamasiro naabi, nga babarusakho biilyo n’iviini, ni khuubasasulisa kamawumule k’efeetsa kamakhumi kane, buli shiifukhu. Ikhaba baraangirisi baabwe abe baara kumukheemba kumukali khu baandu. Ne ise khulwe khuurya Wele, nabona ndi seshili shituufu khukhola shishiindu nga isho ta. 16Ise naaraambisa imbuka yase mu khwoombakha litikiiyi, nalekha ikhaba khukhwikulila samweene liloba ta. 17Ni khuuminyisawo, abe ise ndiisa babaandi shitoondo shitweela ni kamakhumi karaano (150) muungo mwase, nga mulimo Bayudaaya ni naabo abe babaama mu manaambo kakaakhwibotookheleele. 18Nga buli shifukhu, khulya iwuunwa indweela, kamasheese kakaaroborebwa kasesaba, ni tsingokho tsingali naabi. Khuulooselakho, lwanyuma lwa buli biifukhu likhumi, abe bareera iviini ingali naabi. Ise namanya ndi shino shaba shiisiro naabi isi babaandu, nashiryo naalekha khuloma ndi baambe kumukabo kwase nga Gafana ta.

19Kila ise inoomba nga inoma ndi, Wele khali ambeele tsikhabi khulw’ebyo byoosi byeesi ise ikholeele babaandu baase.