Swahili Bible2

4

Baasiku ba Nehemiya

1Ari imbuka ni yoola, Sanabalati gafana wa Samariya waawulila bari ifwe khulikho khwoombakha bushaakha litikiiyi lilibotookhelela Yerusalemu. Shino shamukhalasa naabi, kila ananikha khuukhomyaasa ba Isiraeli. 2Kila alomela basaale beewe ni liiye lye ba Samariya ari, “Ne Biyudaaya bibikhali ni kamaani bino, nabyo bilikho bikhola shinaanu ishi? Bambaasa bari kane boombakhe litikiiyi ilyo lyoosi mu shifukhu shitweela, naluundi bawaaneyo tsisaayilo ni abweene? Bambaasa bari banyala khukhwinyusa kamabaale keesi kumulilo kwoosha ako, baamisamo shishiindu?”

3Tobiya uwaama i Amoni, uwaba wemikhile ni Sanabalati, waaloma ari, “Ne na khatikiiyi shiina kheesi balikho boombakha! Ikhaba ingokho yeemikhakho, khakwa aasi!”

4Ne ise naloomba nga inoma ndi, “Wele weefwe, iwe waamanya uri babaandu bano bakhulekelesa ifwe, naluundi sibakhukanisa ifwe biilayi ta. Khali iwe wililemo khuuloomba khweefwe, nio akile bisilaani ibyo bibakobolela babeene! Khali ibeelewo linaambo liliitsile libakhweesa libayila nibo mu bubowe. 5Isaambo isi bakhomyaasile babombakhi, iwe ukhabeyakhila bibyoonako byaabwe ta.”

6Nashiryo, nga babaandu baraambire ni kamaani, ifwe khwoombakha bushaakha litikiiyi lya Yerusalemu, khuuniina mu ngaaki lyoola shinakari.

7Ne Sanabalati, ni Tobiya, ni Bawarabu, ni ba Amoni, ni babaandu khukhwaama mu shiriimba she Ashidodi, ni baabona bari litikiiyi lilikho liniina, bari khulikho khwikalaka bisiintsa abe bibyafuniakikhaka, lirima lyaabawaamba. 8Nashiryo baakholela atweela luwomelo lwe khukhwiitsa khukhwibwakala Yerusalemu, bareeremo khuutumbuukha. 9Ne ifwe khwaaloomba isi Wele weefwe, naluundi khwaarawo umuliindi uwibuula, kumuusi ni shiilo.

10Ne Bayudaaya baaloma bari, “Babaandu balikho bawamo kamaani, ate nga iliwo liloba liikali busa lye khuuyoola. Singane khunyalise khuraamba khu litikiiyi ta.”

11Baasiku beefwe abe baalomile bari, “Bayudaaya bano batsya khukhubona, namwe baatsya khushimanya, khunaba nga khwaabeebinile khaale, khubeere, ni kumulimo kwaabwe kwaakame.”

12Lwanyuma Bayudaaya abe babaamenya aambi ni baandu abo, beetsa baakhuboolela ifwe khuuminyisa ni kimiluundi likhumi bari, “Abe khwaakhalola waahe, kane bakhwibwakale.”

13Nashiryo nawaamba babaandu batweela naabarawo khuuba inyuma we litikiiyi, mu bifwo mweesi lili aasikho. Nabarawo khuuloondekhana ni tsiingo tsyaabwe, nga buli baandu baatsya ni kamafumo, tsiindima, ni buyiingo. 14Nga naamalile khuulambuula buli shitweela, neemikha khu ngaaki naalomela be muungo mw’omuyiinga, ni baaraangirisi, ni babaandu boosi ndi, “Mukharya babaandu abo ta. Ni mushebulile Wele, uuli uwe kamaani, naluundi uriisaka naabi, musoolane khulwe baalebe beenywe, khulwe babaana beenywe, ni bakhasi beenywe, ni tsiingo tsyeenywe.”

15Baasiku beefwe baawulila bari ifwe abe khwaamanyile luwomelo lweesi abe balikho bakhukholela ifwe, naluundi Wele woonakisa byeesi abe batsya khukhola. Nashiryo buli mutweela khusiifwe weelayo khu buraambi bweewe, khweloosela khukhwoombakha litikiiyi.

16Khukhwaamila khu shifukhu isho, shisiintsa shitweela she baraambi abe babaaba khu mulimo kwe khukhwoombakha litikiiyi, ne shisiintsa abe babaaba baaliindile nga bali ni bye khukhwitseeta ni bye busoolo: kamafumo, tsingabo, ni buyiingo. Baraangirisi baaba nga bayeeta baraambi 17abe babaali khukhwoombakha litikiiyi bushaakha. Abe baraambi basuta mu mukhono mutweela bye khukhwoombakha, ne mu mukhono kukuundi bye busoolo. 18Ikhaba abe abo babaali khukhwoombakha, buli mutweela abe weesabikhile lurima khu nduukhu. Umuraambi abe ufuura ikhoombi ikuukuula babaandu, abe ali atweela ni nase.

19Kila ise inomela be muungo mw’omuyiinga ni baraangirisi ni babaandu boosi ndi, “Kumulimo kuli kumukali naluundi khwasalaniile naabi, nga khwikhalakhalanamo khu litikiiyi. 20Nga mwaawuliile likono lye khoombi, yiitsa waangu mubuusanile isi ise ndi. Wele weefwe kane akhusoolanile!”

21Nashiryo khweloosela ni buraambi, nga shisiintsa shitweela she baraambi shaawaambile bye busoolo, khukhwaama mamilimili, khukhwoolisa antsye ni bwiilabula.

22Naluundi khu mbuka iyo, naalomela babaandu ndi, “Mu shilo, buli mutweela khu baraangilisi ni baraambi beewe, bali ni khuukona mu Yerusalemu mukari, nio banyalise khuuba baaliindi mu shilo, ne kumuusi babe baraambi.” 23Nashiryo, mbaawo na mutweela, oba ise samweene, namwe babaana baase, namwe baraambi, namwe baaliindi, abe uwifuula bikwaaro mu shilo ta; abe khukona mu bikwaaro byeesi khuraambiiremo. Buli mutweela abe akona ni she busoolo sheewe mukhono mweewe.