Swahili Bible2

3

Khukhwoombekha litikiiyi buyaakha

1Babaandu babayeeta mu khwoombakha litikiiyi lya Yerusalemu, ni biilibwa byakhwo baaba baakali. Umusaayi umukhulu Eliyashabu, ni basaayi basheewe, boombakha bushaakha Shiilibwa she Kamasheese, baaramo ni kimilyaango kyamwo. Kila baloombela shiilibwa isho ikhabi, ni kusiintsa kwe litikiiyi kweesi baaba nga boombakhile, khukhwaama khu tawa isi balaanga bari Shitoondo, khukhwoola khu Hananeli tawa. 2Babaandu khukhwaama i Yeriko boombakha shisiintsa she litikiiyi shishiilakho, ni Zakuri umusoleeli uwa Imuri woombakha shisiintsa shishiindi shishiilooselakho.

3Be nda ya Hasena boombakha Shilibwa isi balaanga bari she Inyeeni. Baarakho kimisaala kikikhiikha ni kimilyaango kyamwo, atweela ni kimisumaari kimiboofu, ni kimibya kikikhiinga imulyaango. 4Meremosi, umusoleeli wa Uriya naluundi nga ali umwitsukhulu uwa Hakozi, woombakha shisiintsa shishilooselakho. Mesulamu, umwaana uwa Berekaya naluundi nga ali umwitsukhulu uwa Meshezabeli, woombakha shisiintsa shishilooselakho, ni Zadoki, umwaana uwa Baana, woombakha nga alooselakho. 5Basaani khukhwaama i Tekowa, bombakha khuuloosela khu bano. Ne akhali ndi baraangirisi be mu shiriimba shaabwe baaloba khukhola kimilimo kimisiro, kyeesi abe baabalakila khukhola.

6Yoyada, umusooleli wa Paseya, ni Mesulamu, umusooleli wa Besodeya boombakha bushaakha shiilibwa shishilaangibwa shiri Shikhale. Baarakho kimisaala kikikhiikha ni kimilyaango kyamwo, atweela ni kimisumaari kimiboofu, ni kimibya kikikhiinga imulyaango. 7Melatiya khukhwaama i Gibiyoni, Yadoni khukhwaama i Meronosi, ni basaani babaandi khukhwaama i Gibiyoni ni Mizipa, boombakha bushaakha shisiintsa shishilooselakho. Shisiintsa shino abe shitsya shoolela ilala khu ntsu ya Gavana abe uwula Ibukwanyaanga we Luluutsi Efuraati. 8Uziyeli, umusooleli wa Harahaya umubasi, woombakha shisiintsa shishilooselakho. Hananiya, mutweela khu babaakhola bye khukhwiyakha bibiwunya buulayi, woombakha shisiintsa shishilooselakho, nga besawo bushaakha Yerusalemu, khuutsya khukhwoola khu Litikiiyi Libalaayi. 9Refayimu, umusooleli wa Huru abe uli umuwuli uwe shisiintsa she khabili sha Yerusalemu, woombakha bushaakha shisiintsa shishalooselakho. 10Shisiintsa shisheelakho abe shili aambi ni muungo mwa Yedaya, umusooleli wa Harumafu. Nashiryo Yedaya woombakha bushaakha shisiintsa isho. Hatusi, umwaana uwa Hasabeneya, woombakha shisiintsa shishilooselakho. 11Malikiya, umwaana uwa Harimu, ni Hasubu, umwaana uwe Pahasi Mowabu, boombakha bushaakha shisiintsa shishilooselakho. Boombakha ni tawa isi balaanga bari Tanuuru. 12Shalumu, umwaana uwa Halohesi, abe niye uwula shisiintsa shishiramire sha Yerusalemu. Uyuno woombakha bushaakha shisiintsa shisheelakho. Kumulimo kuno Shalumu aakuraamba ni babaana beewe bakhaana.

13Hanuni ni babaandu babaamenya mu shiriimba she Zanowa, boombakha bushaakha Shiilibwa sheesi balaanga bari she Mwitila. Baashoombakha bushaakha, baarakho kimisaala kikikhiikha ni kimilyaango kyamwo, atweela ni kimisumaari kimiboofu, ni kimibya kikikhiinga imulyaango. Beeloosela bombakha bushaakha litikiiyi, nga batsya tsifuuti shikana shitweela ni bitoondo biraano (1,500), khukhwoolisila ilala khu Shilibwa sheesi balaanga bari she Kamasisye.

14Malikiya, umwaana uwa Rekabu, abe ali umuwuli uwe shisiintsa sheesi balaanga bari Besi Hakeremu. Yuno woombakha bushaakha Shiilibwa sheesi balaanga bari she Kamasisye. Waashoombakha bushaakha, waaramo kimilyaango, ni kimisumaari kimileeyi, ni kimibya kikikhiinga imulyaango.

15Shalumu, umwaana uwa Kolohoze, abe niye ali umuwuli uwe shisiintsa shishilaangibwa Mizipa. Yuno woombakha bushaakha Shiilibwa sheesi balaanga bari she khu Khasebele. Waashoombakha bushaakha, waabiimbakho khu ngaaki, waaramo kimilyaango, ni kimisumaari kimileeyi, ni kimibya kikikhiinga imulyaango. Weloosela wombakha bushaakha litikiiyi mu shifwo shilaangibwa shiri Litibo lye Shela. Shisiintsa shino she litikiiyi abe shikobolela khu bulime bw’omuyiinga, naluundi abe shiiloosela shaatsya khukhwoola khu biniinilo bibiikha mu Yerusalemu. 16Nehemiya, umwaana uwa Azibuku, abe ali umuwuli uwe shisiintsa shiilaangibwa shiri Besi Zuri. Yuno woombakha bushaakha shisiintsa she liitikiiyi shiilooselakho. Waayila woolesela ilala khu biliindwa bye bayiinga nga mumuuli Dawudi, ni khu litibo lyeesi baalima busa, ni mu kaambi isi abe basilikhale bamenya.

Ba Levi babaraamba khu Litikiiyi

17Ba Levi babaaraamba khu shisiintsa she litikiiyi shishalooselakho baaba nibo Rehumu, umwaana uwa Bani; Hashibaya, abe uli umuwuli uwe shisiintsa she shiifwo shishilaangibwa shiri Keyila. Kumulimo kuno Keyila aakukhola mu lisina lye shisiintsa sheesi abe awula. 18Khweelakho umulebe waabwe Binuyi, umwaana uwa Henadadi. Binuyi abe ali umuwuli uwe shisiintsa she shiifwo shishilaangibwa shiri Keyila. 19Ezeri, umwaana uwa Yesuwa, nga abe niye umuwuli uwe Mizipa, woombakha bushaakha shisiintsa she litikiiyi shishiili ibweeni we libiikhilo lye bye busoolo, waatsya khukhwoola mu soonda (mu khoonyo). 20Baruku, umwaana uwa Zabayi, ni kumwikhoyo kumukali, woombakha shisiintsa she litikiiyi khuutsya khukhwoola khu mulyaango kwe lulwiitsi lulwingila muntsu iya Eliyashibu, Umusaayi umukhulu. 21Meremosi, umwaana uwa Uriya, naluundi nga ali umwitsukhulu wa Hakosi, woombakha bushaakha litikiiyi khuutsya khukhwoolisila ilala nga waabirisilekho khu ntsu ya Eliyashibu.

Basaayi babaraamba khu Litikiiyi

22Basaayi be mu shisiintsa isho, babaraamba khu litikiiyi baaba nibo bano: 23Benyamini ni Hashubu, nga bano boombakha bushaakha litikiiyi ibweeni we intsu yaabwe. Azariya, umwaana uwa Maseya, naluundi nga ali umwitsukhulu uwa Ananiya, waalooselakho khukhwaamila awo, nga ombakha bushaakha shisiintsa shishaba ibweeni we ntsu yeewe.

24Binuyi waalooselakho, nga ombakha bushaakha litikiiyi khukhwaamila khu ntsu iya Azariya, khuutsya khukhwoolisa mu soonda iye litikiiyi.

25Palali, umwaana uwa Uzayi, waalooselakho, khukhwaamila mu soonda, ni she khukhwikheetselakho baasiku mu lubili, aambi ni lulwaanyi lwe baaliindi. Lwanyuma Pedaya, umwaana uwa Parosi woombakha bushaakha shisiintsa she liitikiiyi shishilooselakho. 26Umweene yuno waatsya waakamila mu shifwo shishilaangibwa shiri Shiilibwa she Kameetsi, shishiili ibwaamanyaanga, ni khukhwoola khu shisiindi sheesi babaaliinda khu Lisaayilo Likhulu, bekheetselakho baasiku. Shino abe shili aambi ni shisiintsa shishilaangibwa shiri Ofeli, abe isi baraambi be mu lisaayilo bamenya.

Baraambi babaandi babaakhola kumulimo khu Liitikiiyi

27Babaandu khukhwaama i Tekowa baalooselakho, nga ano bakhola likatala lyaabwe liliikhola khabili. Baarakikhila aambi ni shishiindi shibalaayi sheesi babaaliinda khu Lisaayilo Likhulu bekheetselakho baasiku, bebotokhelesa baatsya khukhwoolela ilala aambi ni liitikiiyi liliili i Ofeli.

28Khuukobolela lwangaaki lwe Shiilibwa she Tsiŋwaaŋwa, buli musaayi ombakha liitikiiyi bushaakha, khu luubeka lulukobolela khu ntsu yeewe. 29Zadoki, umwaana uwa Imeri, woombakha liitikiiyi bushaakha, khu luubeka lululoleleele intsu yeewe. Lwanyuma Shemayiya, umwaana uwa Shekaniya, nga abe niye uliinda Shiilibwa she Bwaamanyaanga, waalooselakho khukhwaamila abweene awo. 30Lwanyuma, Hananiya umwaana uwa Shelemayiya, ni Hanuni nga niye ukhola khasesaba muunda ya Zalafu, boombakha bushaakha shisiintsa shishilooselakho. Mesulamu, umwaana uwa Berekayiya, woombakha bushaakha shisiintsa shishiloleleele intsu yeewe. 31Malukiya, uwaba mutweela khu babasi, woombakha liitikiiyi bushaakha, waatsya woolela ilala ni khu ntsu tsyeesi baraambi be mu Lisaayilo Likhulu ni babaakhola bye busubuusi, bamenya. Shisiintsa shino abe shaloleelela Shilibwa she Khubuusanilawo, ni khaseenge khe musoonda khu ntsu khu ngaaki. 32Baabasi ni babaakhola bye busubuusi, boombakha bushaakha shisiintsa shishiili akari e khaseenge khe musoonda khu ntsu khu ngaaki, ni Shiilibwa she Kamasheese.