Swahili Bible2

2

Nehemiya atsya i Yerusalemu

1Nga umuyiinga Ahasweero woolisile kimiiko kamakhumi kabili mu buyiinga, mu mweesi kukuunyoowa, nga nikwo kwa Nisani, ise naba nga indikho nakaanisa umuyiinga iviini, nga abe n’ikholatsaka busheele. Ne kuno kwaba nikwo kumuluundi kukuunyoowa khuubonekha nga ndi mu mutaambo kumukali naabi. 2Kila umuyiinga andeeba ari, “S’uuli umutsiina ta, ne shiina kila wakhalaale? Ili ni khuubawo shishiili khuukhutaambisa iwe mu mwoyo kwoowo.”

Naba abe indi ni khuurya khuukali naabi. 32.3: 2 Bay 25.8-10; 2 Kim 36.19; Yer 52.12-14Kila niilamo umuyiinga nga inooma ndi, “Umuyiinga, khali upilewo khabili! Ise newuumbile, khulwekhuuba shiriimba shishiilimo biilindwa bye bakuuka baase, shili busa nga kamakubili, ni biilibwa byasho, baamala khaale khuubyoosha.”

4Kila umuyiinga andeeba ise ari, “Shiina sheesi ukana ise ikhukholele?”

Nanyoowa naaloomba isi Wele uwabuumba likulu. 5Kila ise niilamo umuyiinga, naloma ndi, “Ise inoomba ndi, abe noola abe umuyiinga waaboone ari shili shiilayi, naluundi abe nga wamaambiile ise shiisa, ufukiilise intsye mu Yuda, intsye noombakhe bushaakha shiriimba shishiilimo biliindwa bye bakuuka baase.”

6Nabakyelema naye aaba nga wekhaale mu mbafu mw’omuyiinga, kila umuyiinga andeeba ari, “Shino shinakhuyilila iwe imbuka iyoola iryeena? Naluundi ukhaakobole liina?” Umuyiinga waafukiilisa ise khuutsya; naluundi nase namuwa niye imbuka isi ikhaakobolelemo.

7Lwanyuma ise naalomela umuyiinga ndi, “Abe noola shinyalikha, khali umbeele ibaluwa imbilila umuwuli uwe shisiintsa shishiili shangelekha we luluutsi Efurati, nio afukiilise ise imbirire mu shisiintsa sheewe, nga intsya mu Yuda. 8Naluundi khali umbeele ibaluwa ikiindi imbilila Asafu, uliinda shisaali sh’omuyiinga, nga umulakila uri ambe tsimbaawo tsye khuuraambisa mu khwoombakha biilibwa, lumako, n’intsu isi ise samweene intsya khumenyamo.”

Wele waaba umulayi waanjeeta, umuyiinga waamba ibyo byoosi byeesi ise namuloomba.

9Umuyiinga waamba basilikhale nga balikho ni baraangirisi baabwe, ni naabo babaakyeendela khu ŋwaŋwa, naatsya. Ni naba nga imbira mu shisiintsa she Shangelekha we Luluutsi Efurati, nakaanisayo isi bawuli, tsibaluwa tseesi abe umuyiinga ambeele. 10Ne Sanabalati abe uuli umuraangirisi uwe mu shisiintsa she Horoni, ni Tobiya abe uuli mutweela khu baawuli beewe ni baawulila bino, bakhalala. Ni baabona bari iliwo umuundu uuli khuutsya khuyeeta babaandu be mu Isiraeli, nibo shaababirisa buubi naabi.

11Ni nashiryo, ni noola mu Yerusalemu, nanyoowa naamala biifukhu bitaru. 12Nio lwanyuma ise samweene nenyukha mu shilo atweela ni babaandu beesi naba ni nabo. Ise sinaboolelakho umuundu yeesi abe sheesi Wele wase areere mu mwoyo kwase, ari ikholele Yerusalemu ta. Shishaayo sheesi natsya nasho shonyene yaba isikilya isi ise neekhalakho nga ingeendelakho. 13Narura mu shilo nga imbirira mu Shilibwa she Litila, shishiili ibukwanyaanga, neekha imwaalo naabirira khu Sebele iye Duragoni, lwanyuma noola khu shilibwa sheesi balaanga bari Shilibwa she Kamasisye. Ni naba nga nibotookhelela, nemenieelesa litikiiyi nga ni lyawumbukhaka, naluundi naabona nga biilibwa ni byookhebwa ni kumulilo. 14Luwaande lwe bwaamanyaanga, naniina shangaaki, naatsya noola khu bilibwa bibiindi bibili, ne intsila yaba nga ifundeefu naabi, nga isikilya yase sinyala yakyeendelakho ta. 15Nashiryo mu shilo umwo nakyeenda neekha mu litila, nemenieelesela lumako khukhwaama ibweene iyo. Lwanyuma nafuumba neelayo, nga ningilila mu shilibwa sheesi naruriramo. 16Mbaawo na mutweela khu baawuli be mu shiriimba babaamanya isi natsya, namwe abe sheesi ise ndikho ta. Abe ishiili khuboolelakho ikhaba na mutweela khu Bayudaaya ta, ikhaba ba basaayi, namwe baraangirisi, namwe Bayudaaya boosi abe babaatsya khuyeetakho mu buraambi ubwo ta.

Shishambaaso she khukhwoombekha litikiiyi bushaakha

17Lwanyuma ise naabalomela ndi, “Nanywe nga ni mumanyile, Yerusalemu shaayonakisibwa naabi, ni biilibwa byasho byayooshebwa sibiliwo ta. Ni mwinyukhe khwoombakhe kamatikiiyi ka Yerusalemu bushaakha, nio akile shiriimba sheefwe shibe ni lukoosi nga khaale.”

18Kila imbaboolela biilayi byeesi Wele abe akholela ise ni tsikhabi tsyeesi abe ambeele, ni biilomo byeesi umuyiinga Ahasweero abe amalile khukhuumboolela ise. Khaangukho, babaandu baaloma bari, “Khayo khurakikhilewo anariha khukhwoombakha!” Nashiryo bewaanayo khuukhola kumulimo ukwo.

19Ne Sanabalati umuwuli uwe Horoni, ni Tobiya mutweela khu baraangirisi be Amoni, ni Gesheni, abe uuli umuwuli waabwe, nga ali Umuwarabu, ni baawuli be shisiintsa shino, bakhulekelesa ifwe naluundi nga bakhutsekhelela. Baaloma bari, “Mulikho mutsya khukhola shinaanu shisheene isho? Mulikho mwoombakha buyaakha liitikiiyi ilyo, nio lwanyuma mwiyawule khu muyiinga?” 20Ne ise naabeelamo ndi, “Wele uwabuumba likulu, niye umweene ukane akhunyalise ifwe khuukhola kumulimo kuno. Ifwe babaakaanisi beewe, fwabeene nibo babaatsya khukhola kwe khukhwoombakha Yerusalemu buyaakha. Inywe simulikho ni buunyala, namwe ni kumukabo khu Yerusalemu ta, khulwekhuuba bye khaale byasho sibibawaamba khu siinywe ta.”