Swahili Bible2

12

Luruungo lwe basaayi ni ba Levi

1Aabawo basaayi baakali ni ba Levi babaakobola khukhwaama mu bubowe mu Babulooni, ni Zerubabeli umusooleli wa Sheyatiyeli, nga Yesuwa niye uwaba umuraangirisi waabwe. Basaayi abo baaba nibo bano: Serayiya, Yeremiya, Ezira, 2Amariya, Maluku, Hatushi, 3Shekaniya, Rehumu, Meremosi, 4Ido, Ginesoyi, Abiya, 5Miyamini, Mayadiya, Biliga, 6Shamayiya, Yoyaribu, Yedayiya, 7Salu, Amoki, Hilikiya, ni Yedayiya. Bano baaba abe nibo baraangirisi mu basaayi, atweela ni bayeeti baabwe, mu biseela bya Yesuwa.

8Ba Levi babaakobola baaba nibo: Yesuwa, Binuyi, Kadimiyeli, Sherebiya, Yuda, ni Mataniya. Abe bano atweela ni bayeeti baabwe, nibo babaakhola khu bye kimyeenya kye khuruuya, mu Lisaayilo. 9Ne Bakibukiya ni Uni, ni bayeeti baabwe abe nibo babaakaanila kimyeenya ni khukhwiilamo kamakono.

Lisaaye ly’omusaayi umukhulu Yesuwa

10Yesuwa niye uwasaala Yoyakimu, Yoyakimu wasaala Eliyashibu, Eliyashibu wasaala Yoyada. 11Yoyada wasaala Yonasani, Yonasani wasaala Yaduwa.

12Mu mbuka isi Yoyakimu aba nga ali umusaayi umukhulu, abo babaaba baraangirisi be tsiingo tsye basaayi nibo bano: muungo mwa Serayiya, abe Merayiya; muungo mwa Yeremiya, mwabamo Hananiya; 13muungo mwa Ezira, mwabamo Meshulamu; muungo mwa Amariya, mwabamo Yehohanani; 14muungo mwa Maluki, mwabamo Yonasani; muungo mwa Shebaniya, mwabamo Yusufu; 15muungo mwa Harimu, mwabamo Adina; muungo mwa Merayiyosi, mwabamo Helikayi; 16muungo mwa Ido, mwabamo Zekariya; muungo mwa Ginesoni, mwabamo Mesulamu; 17muungo mwa Abiya, mwabamo Zikiri; muungo mwa Miniyamini ni mwa Mowadiya, mwabamo Pilitayi; 18muungo mwa Biliga, mwabamo Shamuwa; muungo mwa Shemayiya, mwabamo Yehonasani; 19muungo mwa Yoyaribu, mwabamo Matenayi; muungo mwa Yedayiya, mwabamo Uzi; 20muungo mwa Salayi, mwabamo Kalayi; muungo mwa Amoki, mwabamo Eberi, 21muungo mwa Hilikiya, mwabamo Hashabiya; muungo mwa Yedaya, mwabamo Nesaneli.

Tsiingo tsye ba basaayi ni ba Levi

22Mu mbuka isi basaayi baakhulu baaba nga nibo: Eliyasashibu, Yoyada, Yohanani, ni Yaduwa, yabawo luruungo lwe baraangirisi be ba Levi ni be tsiingo tsyaabwe, lulwakholebwa. Ni khukhwoolisila ilala imbuka isi Dariusi, aabeela nga ali umuyiinga wa Pasiya. 23Kamasina ke baraangirisi be tsiingo tsye ba Levi, kaaronebwa mu Shiitabo she Bibyakholikha khaale bya Isiraeli, khukhwakama nga Yohanani, umwaana uwa Eliyashibu abe ashiili umulamu. Lwanyuma lwayo, sikaaronebwa ta.

24Hashabiya, Sherebiya, ni Yeshuwa umwaana uwa Kadimiyeli, atweela ni bayeeti baabwe, baakholawo kamatuuli kabili ke ba Levi babeembi be kimyeenya, nga baruuya Wele. Shino shaba nga umuyiinga Dawudi, umwakaanisi uwa Wele abe n’alakila.

25Abo abe babaali ni buraambi bwe khuliinda kamabiikhilo abe kakaali aambi ni bilibwa bye Lisaayilo Likhulu, baaba nibo: Mataniya, Bakubukiya, Obadiya, Mesulamu, Talumoni, ni Akubu.

26Bano boosi baakhola bubwakaanisi bwaabwe mu mbuka iya Yoyakimu, umwaana uwa Yeshuwa, uwaba umwaana uwa Yozadaki, aabeelawo. Mu mbuka iyo Nehemiya abe niye gafana, nga Ezira abe ali umusaayi naluundi umuroni.

Nehemiya awaanayo litikiiyi mu mikhono kya Wele

27Khu shifukhu she khuuwaanayo litikiiyi mu mikhono kya Wele, baabuusa ba Levi khukhwaama buli aandu mu Yuda, baabayila mu Yerusalemu khuutsya khwituba khu mayiiya ako. Beemba kimyeenya kye khuuruuya, nga baraambisa bye khuusakayisa, kamatuungu, ni biiyilili. 28Babeemba kimyeenya bano baababuusa atweela khukhwaama mu shisiintsa she Yerusalemu, ni mu byaalo bibilaangibwa Netofasi, 29ni khukhwaama i Besi Giligali, ni khukhwaama mu shisiintsa she Geba ni Azimafesi. Shino shaba shiryo khulwekhuuba abe babeemba kimyeenya bano bamenya mu byaalo bibiibotookheleele Yerusalemu. 30Nga basaayi ni ba Levi baamalile khukhwipyeluusa, baatsya bapyeluusa babaandu babaaramire, ni biilibwa, ni litikiiyi nalyo.

31Lwanyuma ise naareera baraangirisi be mu Yuda, baaniina khu ngaaki khwe litikiiyi. Naabawaambisa khuuraangirira kamatuuli kabili ke babaandu, khuukhuuumbila khu litikiiyi khu ngaaki, nga beemba kimyeenya kikiruuya Wele. Lituuli litweela lyaakhuumba nga litsya khu mukhono kumulayi, nga litsya luwaande lwe Shiilibwa she Kamasisye. 32Hoshayiya ni shisiintsa shitweela she baraangirisi, baatsya nga baloonda khu lituuli lino. 33Lwanyuma basaayi bano baloondakho: Azariya, Ezira, Mesulamu, 34Yuda, Benyamini, Shemayiya, ni Yeremiya. 35Basaayi babaaba ni tsikhoombi mwabamo Zekariya, umwaana uwa Yonasani. Bakuuka beewe baaba nibo: Shemayiya, Mataniya, Mikayiya, Zakuri, ni Asafu; 36baalebe ba Zekariya babaaba ni tsikhoombi nibo: Shemayiya, Azareli, Milalayi, Gilalayi, Mayi, Nesaneli, Yuda, ni Hanani. Abe bali ni bibiitsiila khu myeenya byeesi Dawudi, umwakaanisi uwa Wele, aalakila ari bali ni khuuraambisa. Bano boosi baakhuumba nga baaloondile khu Ezira, umuleekeli uwe Kamakaambila ka Musa. 37Nga ni boola khu Shilibwa she Sebele, baaniina kamataala beengila mu shiriimba sha Dawudi, baatsya baabira khu lubili lw’omuyiinga. Beemikha khu shilibwa sheesi balaanga bari she kameetsi, aambi ni litikiiyi liliili i bwaamanyaanga.

38Lituuli lilikhola khabili lyaakhuumbila khu litikiiyi khu ngaaki, nga balola luwaande luluundi. Ise samweene, atweela ni shisiintsa shishiramire she baaraangirisi ba Yuda, khwaabaloondakho. Khwaatsya khwaabira i kumunaala isi balaanga bari Tanuuru, Liitikiiyi Libalaayi. 39Shiilibwa sha Efurayimu, Shiilibwa Shiikhale, Shiilibwa sheesi balaanga bari Nyeeni, Kumunaala Hananeli, ni kumunaala isi balaanga bari Shitoondo, khukhwoolisa Shiilibwa she Kamasheese. Khwaatsya khukhwoolisa ni khweema khu Shilibwa she Khuutseeta.

40Nashiryo kamatuuli koombi abe kakaali khukhwiimba nga karuuya Wele, keengila mu Lisaayilo Likhulu, buli babaandu baatsya mu bifwo byaabwe. Ikhaba nase, atweela ni shisiintsa shitweela she baaraangirisi babaaba ni nase; 41ni basaayi babaaba nga bali ni tsikhoombi nibo: Eliyakimu, Mayaseyiya, Miniyamini, Mikayiya, Eliyonayi, Zekariya, ni Hananiya, 42Mayaseyiya, Shemayiya, Eliyazari, Yehohanani, Malikiya, Elamu, ni Ezeri. Yezarahiya, niye uwaba umuraangirisi uwe babeemba kimyeenya. 43Wele abe waabanyalisile khuuba ni kumwikhoyo kumukali naabi, nashiryo bawaanayo tsisaayilo tsingali khu shifukhu isho, nga beekhoya. Ikhaba bakhasi ni babaana boosi beekhoya. Likono lye kumwikhoyo lilyaba mu Yerusalemu, abe liliwulilikhana khukhwoola aleeyi naabi.

Khurengekharengekha khukhwiisaaya

44Khu shifukhu sheene isho, aabawo baraangirisi batweela beesi baarobora, baabawa buraambi bwe khuubiikha biwaanwa bye mu Lisaayilo, ni khukhwakaanila bibyaama mu likesa, ni bibyaayo, nga bino baaba babyakaanisileyo isi Wele. Baraangirisi beene bano nibo babaabusaasa biilimwa khukhwaama mu baandu, byeesi Kamakaambila ka Musa kaaloma kari bali ni khuubiwa ba Levi. Buli mutweela mu Yuda waaba musangaafu naabi khulwe buraambi buulayi bweesi basaayi ni ba Levi baakhola. 4512.45 a 1 Kim 25.1-8; b: 1 Kim 26.12Nashiryo baakhola bye bubwakaanisi bwaabwe isi Wele, ni bwe khupyeluusa, nga babeemba kimyeenya ni babaliinda khu bilibwa nabo ni baakhola, khuuloondekhana ni likaambila lilyarusibwa Dawudi n’umwaana weewe Solomoni. 46Khulwekhuuba, amataayiko, nga Dawudi ni Asafu bashiili baalamu, aabawo umuundu uraangirira bye khukhwiimba kimyeenya kikiiruuya ni khuusiima Wele. 47Mu mbuka isi ise ni Zerubabeli khwaba nga khuli baraangirisi, buli mutweela mu Isiraeli aawaanaayo isho abe sheesi akhiile khuuwaanayo buli busheele, nga biweebwa babeemba kimyeenya ni babaaliinda khu Lisaayilo Likhulu. Bano abe baama mu shikuuka she ba Levi. Lwanyuma abe ba Levi bawa basaayi kumukabo kwaabwe, khukhwaama khu sheesi baaba bafunile.