Swahili Bible2

11

Babaandu babaakhalawo khuumenya mu Yerusalemu

1Baraangirisi be linaambo lye ba Isiraeli ni babaandu be tsiingo tsyaabwe, bakhalawo khuumenya mu Yerusalemu. Ne abe babaandu boosi siboolamo ta, nga abe tsiingo tsitsiramire khu buli babaandu likhumi, mutweela yenyene niye abe unyala waaramamo. Nashiryo baakhupa bukokha khuukhalawo babaarama ni babaatsya. 2Lwanyuma buli mutweela waaloomba Wele khuuwa tsikhabi, abo abe babafukiilila khuumenya mu Yerusalemu.

311.3: Neh 7.73Batweela khu ba Isiraeli, ni basaayi, ni ba Levi, ni baraambi be mu Lisaayilo, ni be lisaaye lye baraambi ba Solomoni, abe buli mutweela amenya ingo weewe, mu Yuda. Ne baraangirisi be mu buwuli ni be tsiingo tsyaabwe, baarama nga bamenya mu Yerusalemu.

Khukhwaama mu shikuuka sha Yuda

4Batweela khu be lisaaye lya Yuda ni lya Benyamini, abe bamenya mu Yerusalemu. Be lisaaye lya Yuda baaba nibo bano: Asayiya umwaana uwa Uziya, nga bakuuka beewe baaba nibo: Zekariya, Amariya, Shefatiya, Mahalaleli, ni Perezi. 5Ukuundi aba Mayaseyiya umwaana uwa Baruku. Bakuuka beewe baaba nibo: Koloze, Hazayiya, Adayiya, Yoyaribu, ni Zekariya uwaama i Shilo. 6Be lisaaye lya Perezi abe babaamenya mu Yerusalemu boola basoolani bitoondo bine ni kamakhumi kasesaba na shinaane (468).

7Khukhwaama mu lisaaye lya Benyamini, mwabamo Salu, umwaana uwa Meshulamu. Bakuuka beewe baaba nibo: Yowedi, Pedayiya, Kolayiya, Mayaseyiya, Isiniyeli, ni Yeshayiya. 8Babaandi khukhwaama mu lisaaye lya Benyamini, abe bari Gabayi ni Salayi, nga atweela bali babaandu bitoondo syeenda ni kamakhumi kabili na shinaane (928). 9Abe ubaraangirira bari Yoweli, umwaana uwa Zikiri. Yuda umwaana uwa Hasenuwa, abe niye umwiilakho mu buraangirisi ubwo.

Basaayi

10Basaayi babaarama khuumenya mu Yerusalemu: Umukiboole niye Yedayiya, nga ali umwaana uwa Yoyaribu ni Yakini. 11Umusaayi uwiilakho bari Serayiya, umwaana uwa Hilikiya. Bakuuka beewe baaba Meshulamu, Zadoki, Merayosi, ni Ahitubu, uwabakho umusaayi umukhulu. 12Atweela, babaandu khukhwaama mu shikuuka sheewe, abe babaali babaakaanisi mu Lisaayilo abe boola bitoondo shinaane ni kamakhumi kabili na babili (822). Umusaayi ukuundi aaba bari Adayiya, umwaana uwa Yerohamu. Bakuuka beewe abe nibo: Pelaliya, Amizi, Zekariya, Pashuri, ni Malikiya. 13Atweela, mu balebe beewe abe mulimo baraangirisi baboola bitoondo bibili ni kamakhumi kane na babili (242). Umusaayi ukuundi aaba bari Amashisayi, umwaana uwa Azareli. Bakuuka beewe baaba nibo Ahizayi, Meshilemosi, ni Imeri. 14Atweela, abe khukhwaama mu bikuuka byaabwe, mulimo basaani basoolani banyindaalifu shitoondo shitweela ni kamakhumi kabili na shinaane (128). Umuraangirisi waabwe abe bari Zabudiyeli, umwaana uwa Hagedolimu.

Ba Levi

15Aabawo ba Levi baakali abe babaamenya mu Yerusalemu. Mutweelakho bari Shemayiya, umwaana uwa Hashubu. Bakuuka beewe baaba nibo: Azirikamu, Hashabiya, ni Buni.

16Babaandi baaba bari Shabesayi ni Yozabadi. Abe bano nibo babaraangirira buraambi ibulafu we Lisaayilo.

17Ukuundi bari Mataniya, umwaana uwa Mika. Bakuuka beewe baaba nibo Zabudi ni Asafu. Abe Mataniya niye uraangirira babeembi be kimyeenya ni khuuloomba khwe khuuruuya, mu Lisaayilo Likhulu. Bakubukiya, uwaba umuyeetakho mu buraambi buno, abe naye amenya mu Yerusalemu. Umumaliilisi, abe bari Abada, umwaana uwa Shamuwa, umwaana uwa Galali. Galali aaba umwaana uwa Yedusuni.

18Ba Levi boosi atweela abe babaali mu shiriimba shikhosefu, abe boola bitoondo bibili ni kamakhumi shinaane na bane (284).

19Akubu, Talumoni ni baalebe baabwe abe nibo babaaliinda khu bilibwa, nga bali shitoondo shitweela ni kamakhumi musaafu na babili (172).

20Ba Isiraeli babaaramire, atweela ni basaayi ni ba Levi, abe bamenya muungo tsaabwe mu biriimba bye mu Yuda. 21Ne baraambi be mu Lisaayilo, abe bamenya mu shisiintsa sha Yerusalemu shishilaangibwa bari Ofeli. Baraangirisi baabwe abe nibo Ziha ni Gishipa. 22Uzi umwaana uwa Bani, abe niye umuraangirisi uwe ba Levi mu Yerusalemu. Bakuuka beewe baaba nibo: Hashabiya, Mataniya, ni Mika. Uzi abe ali uwe mu shikuuka sha Asafu, abe babaraangirira bye khukhwiimba kimyeenya mu Lisaayilo Likhulu, 23ikhaba nga abe umuyiinga uwa Pasiya niye abe ulakila kimyeenya kikiili ni khukhwiimbibwa.

24Pesahiya umwaana uwa Meshezabeli, khukhwaama i Zera, nga ali uwe mu shikuuka sha Yuda, abe niye umubakha uwa ba Isiraeli mu buyiinga bwe ba Pasiya.

Babaandu be mu biriimba bibiindi

25Batweela khu be lisaaye lya Yuda abe bamenya mu biriimba bino, nga bili aambi ni kimikuunda kyaabwe: Kiriyasi Araba, Diboni, Yekebuzeli, 26Yeshuwa, Molada, Besi Peleti, 27Hazari Shuwali, Basisheba, 28Zikulaga, Mekona 29Enirimoni, Zora, Yarimusa, 30Zanowa, Adulamu, Lakisi, ni Azeka. Nashiryo baaba bamenya mu biriimba khukhwaamila i Basisheba shishiili ibikele, khuutsya khwoola khu Litila lye Hinoni, shishiili imurwe.

31Be lisaaye lya Benyamini, abe bamenya mu biriimba bino: Geba, Mikamasi, Ayiya, ni Beseli, ni mu byaalo bino: 32Anasosi, Nobu, Ananiya, 33Hazori, Rama, Gitayimu, 34Hadadi, Zeboyimu, Nebalati, 35Lodi, ni Ono, ni mu Litila lye Buubasi. 36Ba Levi baakalikho busa baasiindikhibwa khuutsya khuumenya atweela ni babaandu be lisaaye lya Benyamini.