Swahili Bible2

SHIITABO SHA MUSA SHE KHATARU SHEESI BALAANGA BARI

BA LEVI

KHUKHWAANTSULA

Shiitabo she Ba Levi shikhuleekela nga Umukasya n’eloosela khuuwa Musa kamakaambila ni biilakilo. Kumurwe kwe shiitabo shino kwe “Ba Levi,” kwaama mu lisina “Umu Levi,” shishimanyisa umuundu uwe mu shikuuka sha Levi. Ba Levi abe bali babaakaanisi ba buraawa isi Umukasya, mu biwaambakana ni n’ebyo abe bibiikholikha mu lisari lyeesi Umukasya akaananilamo babaandu. Basaayi abe baama muntsu indweela iye shikuuka sha Levi. Bibiindu bibifuura buukali mu shitabo shino, bikanikha khu makatala ke basaayi ni ba Levi babaandi. Bino bilimo bibiindu nga: Biwaanwa bye khuuwa Umukasya, ni biifukhu bikhulu bye khukhwisaayilakho Umukasya. Shiitabo shino shilimo ni bibiwaamba khu bisolo shiina byeesi babaandu banyala baalya, biindu shiina byeesi banyala baaraambisa nga bikwaaro, n’isaambo iye khukhwiinaanayo isi abo babaali bataambi.

Bibifuura buukali mu shitabo shino biwaamba khu makaambila, ne mulimo tsilomo tsitsiwaamba khu biindu abe bibiikholikha khu baandu, namwe basaayi, nga baaminyaliile Wele. Wele abe enyukhilamo khaangu khuuwa shitaambiso isi abo abe babaamuminyaalila, ne abo abe babaamuwulila nabo waabasuubisa nga aloma ari: “Kane ise imbaatsake Wele weenywe, ni nanywe kane mubatsake babaandu baase. Ise ndi niye Umukasya Wele weenywe uwabamusa inywe khukhwaama mu Misiri, nio mulekhe khubatsakakho baakulwa luundi ta. Ise nabakaangulula inywe khukhwaama mu bukulwa, ari muli ni khuuba ni kumwikhoyo.”

Inoondekhana iye bibiilimwo

Kamakaambila kakawaamba khu bye tsisaayilo (1.1—7.38)

Khuubiita basaayi tsikhabi (8.1-36)

Tsisaayilo tsya Aroni tsitsinyoowa (9.1-24)

Khukhwiiribwa khwe basaayi babili (10.1-20)

Kamakaambila khu bifukiilisibwa ni bibikhafukiilisibwa ta (11.1—15.33)

Kamakaambila kakawaamba khu bye khukhwiyakhila (16.1-34)

Kamakaambila kakawaamba khu biindu bibikhali bitweela ta (17.1—20.27)

Kamakaambila keesi basaayi bali ni khuutsiilakho (21.1—22.33)

Bibiwaamba khu mayiiya ke khukhwisaaya (23.1—25.55)

Tsiikhabi ni bitaambiso (26.1-46)

Kamakaambila kakawaamba khu bye khuuwaanayo isi Umukasya (27.1-34)