Swahili Bible2

8

Khuubiita basaayi tsiikhabi

(She Lukyeendo 29.1-37)

1Umukasya waalomela Musa ari, 2“Yila Aroni atweela ni babaana beewe. Yililakho ni bikwaaro bye busaayi, kamafura ke khuubiita basaayi, iwuunwa iye isaayilo irusawo bibyoonako, kamamiiku kabili, ni shishiipo nga shilimo kimikaati kikikhalimo kamamela ta. 3Lwanyuma ubuuse lituuli lye ba Isiraeli lyoosi a mulyaango we liisari likhosefu.” 4Musa waakhola nga Umukasya n’amulomela, waabusaasa ba Isiraeli boosi, a mulyaango we liisari likhosefu.

5Nga babaandu boosi baamalile khuubuusana, Musa waabalomela ari, “Umukasya waalakiile ari khukhole shishiindu shino.” 6Musa waaloma Aroni ni basoleeli beewe besiinga, khuuloondekhana ni bye kimisilo abe nga ni biloma. 7Lwanyuma waakwaarisa Aroni shikwaaro she busaayi, waamubowakho ni kumusipi kwakhwo, waalooselakho ni shikwaaro shileeyi, ni she khu ngaaki, waabibowela atweela ni bukosi bubwabakho. 8Waamukwaarisa ni she khu shifuba, waashiramo Urimu ni Sumimu8.8 Urimu ni Sumimu: Bino bili bibiindu byeesi basaayi baaraambisatsaka khuumanya sheesi Wele akana. 9Kila amubowa ingubo iye khu murwe. Ibweeni we ngubo iye khu murwe, abe baaruungilakho khakhuuma khaanyelele khe zaabu, khakhookesanisa khari ali umukhosefu. Musa waakhola nga Umukasya n’amulakila.

10Lwanyuma Musa waabukula kamafura ke khuubita, waabiita isaanduuku iye indakaano ni bibyabamo byoosi, waabiikesa bikhosefu. 11Kila asalaasakho kamafura kamalala khu sheeso sha buroonzi kimiluundi musaafu, waasalaasa ni khu biindu bibiraambisibwilakho, atweela ni pwaakhuli imboofu iya buroonzi, ni mu shisina shayo. 12Kila atsukhakho kamafura kamalala khu murwe khwa Aroni, waamubiita khuuba umukhosefu, isi Umukasya. 13Lwanyuma Musa waareera basoleeli ba Aroni, waabakwaarisa bikwaaro bye khu ngaaki, waababowa ni kimisipi, waabarakho tsingofwiila khu mirwe, nga Umukasya abe ni aalakila Musa.

14Lwanyuma Musa waayila iwuunwa iye isaayilo irusawo bibyoonako. Aroni ni basoleeli beewe baakitiilakho kamakono kaabwe, khu murwe kwayo. 15Nga baamalile khuukikhoonya, Musa waabukulakho kamalasile, waasiikhamo lulwaala lweewe, waatsya waawakha khu ntsika tsiine abe tsitsiili khu sheeso sha buroonzi, lwanyuma waatsukha kakaaramire mwisina mwe shisheeso. Mu saambo iyo, wekesa shisheeso khuuba shikhosefu, nga bali ni khuushiraambisa khuuwaanayo tsisaayilo. 16Waabukula kiminaawa khukhwaama khu by’enda, ni luwaande lwe aasi lwe shiini, ni tsiimbiko tsyoombi, atweela ni kiminaawa kikiitsilikho, waabira khu mulilo, waabyoosha. 17Ne lihaafu, n’inyama yoosi, ni kamasisye, waabiyila waabyookhela ibulafu we kaambi, nga abe Umukasya n’alakila Musa.

18Lwanyuma Musa waareera limiiku lye isaayilo intsoshe. Aroni ni babaana beewe baalirakho kamakhono kaabwe, khu murwe kwalyo. 19Musa waalikhoonya, waawaanyaka kamalasile khu sheeso. 20Nga baatanyakilemo inyama iyo, Musa waabukula kumurwe ni kiminaawa waabyookhela khu sheeso. 21Lwanyuma nga baamalile khuusiinga byeenda ni bileenge, Musa woosha inyama iramire yoosi, yaaba isaayilo intsoshe, isilikakha yayo yaaniina mu ngaaki, khukhwikhoyesa Umukasya. Shino shakholikha musaambo isi Umukasya aalakila Musa.

22Musa weelakho waareera limiiku liliindi, nga lino lili lye khuuraambisibwa khuubiita basaayi tsiikhabi. Aroni ni basoleeli beewe baara kamakhono kaabwe khu murwe kwe limiiku ilyo. 23Musa waalikhoonya, kila abukulakho kamalasile ni lulwaala lweewe, awakha khu luwaande lwe khu khuru khuuseetsa khukhuloleleele aasi, ni khu lwaala lukhuumwa lwe kumukhono kumulayi, ni khu lwaala lukhuumwa lwe shikele shiilayi. 24Musa waareera basoleeli ba Aroni, nabo buli mutweela waamukholako shishiindu nisho shitweela. Lwanyuma waawaamba kamalasile waakasalaasa khu soonda tsine tsye shisheeso. 25Waabukula kiminaawa kikiili khwisyeembe, ni kye khu byeenda, ni luwaande lwe aasi lwe shiini, ni tsiimbiko tsibili atweela ni kiminaawa kikiilikho, ni shinama sh’etakho, she luubeka luulayi. 26Khukhwaama mu shiipo she kimikaati kikikhalimo kamamela ta, nga shili ibweeni w’Omukasya, waabukula kimikaati kitaru, nga abukula mutweela khukhwaama khu buli shikuuka, abe bibyakholebwa khukhwaama mu bufu buunose naabi, waabira khu minaawa, ni khu nyama tsana iye shiinama. 27Bibiindu bino byoosi, Musa waabira mu makhono ka Aroni ni ke basoleeli beewe, baabyakaanisayo isi Umukasya, nga biwaanwa. 28Nio lwanyuma Musa waabibukula khukhwaama mu makhono kaabwe, waabyookhela khu sheeso, atweela ni isaayilo intsoshe, nga isaayilo iye khuubita basaayi tsiikhabi. Isaayilo intsoshe yino, yaamamo isilikakha, yaaniina mu ngaaki nga iwunyila Umukasya buulayi. 29Musa waabukula inyama iye shifuba, waakisuta angaaki waakiwuutsa, khukhwookesanisa ari yaawaanibwileyo isi Umukasya. Iyo yaba kumukabo kwa Musa khukhwaama khu nyama iye limiiku lye khuubita basaayi tsiikhabi. Isho shaba nga Umukasya n’alakila Musa ari akhole aryo. 30Ikhumaliilisa, Musa waabukulakho khu mafura ke khuubita tsiikhabi, ni khu malasile abe kakaali khu sheeso, waakahanyaka khu Aroni ni bikwaaro byeewe. Waakhola nisho shitweela ni khu basoleeli beewe. Musaambo iyo, Musa waaba waaroboore Aroni ni basoleeli beewe, ni bikwaaro byaabwe, nga ababiitakho tsikhabi.

31Musa waalomela Aroni ni basoleeli beewe ari, “Ni mututubisile inyama iyo amulyaango we liisari likhosefu, lwanyuma mwikhale abweene awo mukilye, nga muliilakho kimikaati kikiili mu shiipo she biwaanwa bye khuubita basaayi tsikhabi. Umukasya waayindakila ise ari, ‘Aroni ni basoleeli beewe nibo babaali ni khuulya inyama iyo.’ 32Ne inyama iramakho, muli ni khuukyookhela mu mulilo, ilale iwewo. 33Muli ni khuurama amulyaango we liisari likhosefu, khuumala biifukhu musaafu, khukhwoolesa nga bye kimisilo kye khuubiita basaayi tsiikhabi kyaaweele. Khulwekhuuba shikhaayile biifukhu musaafu, khuubabiita inywe tsiikhabi tsye busaayi. 34Umukasya waamala khuukhulakila ifwe khuukhola byeesi khukholile lwe shaleelo, nio akile abarusekho inywe bibyoonako byeenywe. 35Umukasya waanomeele ise ari, inywe muli ni khuurama amulyaango we liisari likhosefu, kumuusi ni shiilo, khuumala biifukhu musaafu, nga mukhola buuraambi bweesi Umukasya abaweele inywe. Ne busa ta, mwiitsa khufwa.”

36Nashiryo Aroni ni basoleeli beewe baaloondelela ibyo byoosi, byeesi Umukasya aalakila Musa ari bakhole.