Swahili Bible2

6

Bibyoonako bibiindi bibikanisa khuuwayo tsisaayilo

16.1: Bala 5.5-8Umukasya waalomela Musa ari, 2Umuundu anyala woonaka khuubirira mu khufuniaaka kamakaambila, namwe nga waalyakhaane uwashe, namwe waanuulile, namwe nga waamiinikhilisile uwashe. 3Namwe lukanile nga wangaale shishiindu sha beene ne waashibisa, namwe wetsuba busa mu biikhalimo ta. 4Nga bibiindu bino byaakholikhile biryo, uyo ushikholele ali ni khuuliha byeesi aalyakhana, namwe byeesi aafunila mu khumiinikhilisa, namwe sheesi baamubiikhisa, namwe shishiindu sheesi angaale. 5Ikhaba nga wetsubile busa bibikhalimo ta, umuundu ali ni khuuliha. Mu byoonako ibyo byoosi, ali ni khuuliha nga esayo shishiindu sh’omweene, naluundi nga alooselakho khasiintsa khatweela khe kharaano. 6Ali ni khuulooselakho nga ayila isi umusaayi limiiku lilikhalikho buuleme bwoosi ta, khuuwaanibwayo isi Umukasya. Umusaayi niye uuli ni khuukhalawo limiiku nga ni lyoola. 7Lwanyuma umusaayi ali khukhwikoontselela Umukasya, eyakhile umuundu uyo bibyoonako byeewe. Ni nashiryo, kane Umukasya amurusekho bibyoonako ibyo byoosi.

Tsisaayilo tsye khukhwoosha

(She Lukyeendo 29.38-43; Khuubala 28.1-8)

8Umukasya waalomela Musa ari, 9“Boolela Aroni ni babaana beewe kamakaambila kakawaambakana ni tsisaayilo tsye khukhwoosha: Bali ni khuura shishaayo mu shifwo mweesi bashookhelamo, khu sheeso shikonekho, khukhwoolesa kumutikhinyi. Kumulilo kwe khu sheeso kuli ni khukhwaburukha shiilo shoosi. 10Kumutikhinyi nga bwasheele, umusaayi ali ni khuukwaara bikwaaro bye busaayi, atweela ni bikwaaro bye mukari, abukule likoshe lilyaamile mu khwookhebwa khwe isaayilo, alire andulo e shisheeso. 11Lwanyuma ali ni khuurusamo bikwaaro ibyo, akwaare bibiindi, asute likoshe aliruse ibulafu w’ekaambi, alire mu shifwo shimiliwu.

12“Kumulilo kwe khu sheeso sikuli ni khuusima ta, nashiryo bali ni khuurakho tsiikhu buli kumutikhinyi. Lwanyuma, antsekho tsisaayilo buulayi, atweela ni kiminaawa kyatsyo, abyookhele atweela. 13Kumulilo kwe khu sheeso kuli ni khuurama nga busheele kwaaburukha, kukhasimakho ta.”

Tsisaayilo tsye khuusiima Umukasya

14Umukasya waaloma ari, kano kamakaambila kakawaamba khu saayilo tsye khuukhusiima ise, nga umusaayi khukhwaama mu lulyo lwa Aroni n’ali ni khuubireera khu sheeso, mu moni tsy’Omukasya. 15Umuundu ali ni khuutahakho shikalabo shitweela she buufu buunose buulayi, nga bulimo ni kamafura ke tsinyanyi, nga waareererekho ni bubaani. Khukhwookesanisa ari isaayilo iyo yoosi ili iyase Umukasya, ali ni khuukira khu sheeso, akyooshe nio lisuusi liliniina nga isilikakha, liitse isi ise. 16Bibiiramire, Aroni ni babaana beewe bali ni khuukholamo kimikaati kikikhalimo kamamela ta, bakiliile khu lwaanyi lwe lisari likhosefu. 17Mbaawo khuuramo kamamela nga bateekha ta. Ise naweeleyo shisiintsa isho isi basaayi, khukhwaama khu byaakaanisibwileyo isi ise khu sheeso. Kumukaati kuno kuli kumukhosefu naabi, kuli busa nga tsisaayilo tsyeesi bawaanayo nga baakholile bibyoonako.

18Khu baandu be muungo mwa Aroni, b’eseetsa bonyene, nibo babaali ni khuulya khu mikaati ikyo. Bali ni khuunyoowa bakhole byeesi kamakaambila kalakila, nio bawaambekho. Khulwekhuuba, buli uwaamba khu mikaati ikyo, ekyela umukhosefu. Likaambila lino lilyaama isi Umukasya, liliwaamba khu saayilo, lili ni khuuramawo liryo biilo ni biilo.

Khuubita basaayi tsiikhabi

19Umukasya waalomela Musa ari, 20“Khu shifukhu sheesi Aroni ni babaana beewe babiitibwila tsiikhabi, bali ni khuuwaanayo isi Umukasya bibiindu bino: Buli busheele, kumutishinyi ni angoloobe, ikilo indweela iye buufu buunose naabi. 21Bali ni khuutubaasamo kamafura ke kusaala ku olivu, bakuteekhele khu sefuluya imaambali busa. Lwanyuma bakumenyulakemo busiintsa bufwiiti, babwooshe, bwituukhe lisuusi lilimbunyila ise isilikakha indayi. 22Buli musaayi khukhwaama mu lisaaye lya Aroni ubiitibwa tsikhabi, ali ni khuukhola bibiindu bino nga ni bikanibwa. Ali ni khuubona ari kumukaati ukwo kusha kuweelewo ilala. Shino bali ni khuushikhola biilo ni biilo. 23Buli isaayilo iye khuusiima Umukasya khukhwaama isi umusaayi, ili ni khukhwookhebwa iweelewo ilala, mbaawo khuukilyakho ta.”

Tsisaayilo tsitsirusawo bibyoonako

(Ba Levi 4.1-2)

24Umukasya waalomela Musa ari, 25“Boolela Aroni ni babaana beewe likaambila liliwaamba khu shiwaanwa shishirusawo bibyoonako. Isaayilo iye khuurusawo bibyoonako, ili ni khukhwiiribwira mu shifwo nisho shitweela nga isaayilo intsoshe, khulwekhuuba isaayilo yino ili ikhosefu naabi. 26Umusaayi uwaanayo isaayilo iyo, ali ni khuukiliila mu shifwo shikhosefu, nga nimwo mu lwaanyi lwe lisari likhosefu. 27Buli uyo yeesi namwe isho shoosi shishitiilakho khu saayilo iyo, kane shikele shikhosefu. Namwe nga kamalasile khukhwaama khu saayilo iyo kaakwiilekho khu ngubo iy’omusaayi, bali ni khuukisiingila mu shifwo shikhosefu. 28Nga inyama iye isaayilo iyo baakiteekheele mu saatsi, bali ni khuukikhupaka. Ne noola bakiteekheele mu shiteekha sha buroonzi, bali ni khuukiseenela ilala, lwanyuma bakisiinge ni kameetsi. 29Isaayilo yino ili ikhosefu naabi, nashiryo basaayi bonyene nibo babaali ni khuukilyakho. 30Mbaawo khuulya inyama khukhwaama khu saayilo tsyeesi kamalasile kayilibwile mu lisari likhosefu ta. Tsisaayilo itsyo tsili ni khukhwookhebwa ni kumulilo tsiweelewo ilala.”