Swahili Bible2

4

Tsisaayilo tsye khuurusawo bibyoonako

(Ba Levi 6.24-30)

1Umukasya waalomela Musa ari, 2“Boolela lituuli lye ba Isiraeli uri: Umuundu n’alekha khutsiila khu byeesi Umukasya akhuboolela ta, ne waakhola shishoonako nga siwatsiililiile ta, ali ni khuuloomba shishiyakhilo.”

Nga umusaayi woonakile

3Nga umusaayi uwabiitibwa ikhabi niye ukholile shishoonako, aba waareerire kumusaango khu baandu boosi. Nashiryo khulwe shishoonako isho sheesi akholele, ali ni khuuwaanayo iwuunwa inyana, nga s’ilikho buuleme bwoosi ta. 4Umusaayi uyo ali ni khuureera iwuunwa iyo imulyaango kwe lisari lyeesi Umukasya abonekhelamo, atiile kumukhono kweewe khu wuunwa iyo, lwanyuma akiirire mu moni tsy’Omukasya. 5Umusaayi tsana ali ni khuubukulakho kamalasile ke khaafu iyo, akareere mu lisari mukari, 6asiikhemo lulwaala lwe kumukhono kumulayi, lulukobolela khu lukhuumwa, asalaasekho kamalala kimiluundi musaafu mu moni tsy’Omukasya, ibweeni we ngubo ikhiisa shiifwo shikhosefu. 7Lwanyuma awakhe kamalasile khu ntsika tsyoosi tsine tsye khu sheeso she khukhwookhelakho bubaani, shishiili mu lisari lyeesi Umukasya abonekhelamo. Shino ali ni khuushikholela mu moni tsy’Omukasya. Kamalasile kakaaramire k’ewuunwa tsana, ali ni khuukatsukha mwisina mwe shisheeso she tsisaayilo tsintsoshe, shishiili amulyaango kwe lisari lyeesi Umukasya abonekhelamo.

8Ali ni khuurusakho kiminaawa kikibotoosheleele kamala, ni neekyo kikiili khu mala, 9atubaasekho ni tsimbiko tsyoombi, ni kiminaawa kikiilikho, ni inyama isi kane akhale khu shini atubaase khu mbiko. 10Ali ni khuukhola nga ni bakhola khu nyama tsy’esaayilo iwuunwa ireera lukoosi akari aase ni nabo. Umusaayi ayile bino byoosi, abyookhele khu sheeso she tsisaayilo tsintsoshe. 11Ne lihaafu, ni tsinyama tsitsiramire, ni kumurwe, ni bileenge, ni kamasisye, 12ali ni khuubisuta abiyile ibulafu w’ekaambi, mu shifwo shiimiliwu, isi batsukha likoshe. Akyookhele yoosi khu mulilo, ilale iwewo.

Nga linaambo lyoosi lyoonakile

13Ne linaambo lye ba Isiraeli lyoosi ni likhola shishoonako mu moni tsy’Omukasya, ne nga sibaashitsiililiile ta, linaambo lyoosi liba lili ni kumusaango. 14Khukhwaama ni bashifuumbula bari boonakile, lituuli lyoosi lili ni khuuloomba shishiyakhilo nga liwaanayo iwuunwa inyana. Bali ni khuukireera imulyaango kwe lisari lyeesi Umukasya abonekhelamo, 15baraangirisi be bikuuka bakirekho kamakhono kaabwe khu murwe kwayo, nio bakiirire mu moni tsy’Omukasya.

16Lwanyuma umusaayi abukulekho kamalasile k’ewuunwa iyo, akareere mu lisari mukari, 17asiikhemo lulwaala lwe kumukhono kumulayi, lulukobolela khu lukhuumwa, asalaasekho kamalala kimiluundi musaafu mu moni tsy’Omukasya, ibweeni we ngubo ikhiisa shiifwo shikhosefu. 18Lwanyuma awakhe kamalasile khu ntsika tsyoosi tsine tsye khu sheeso she khukhwookhelakho bubaani, shishiili mu lisari lyeesi Umukasya abonekhelamo. Shino ali ni khuushikholela mu moni tsy’Omukasya. Kamalasile kakaaramire k’ewuunwa tsana, ali ni khuukatsukha mwisina mwe shisheeso she tsisaayilo tsintsoshe, shishiili amulyaango kwe lisari lyeesi Umukasya abonekhelamo. 19Ali ni khuurusakho kiminaawa kyoosi, akyookhele khu sheeso. 20Nashiryo, tsinyama itsyo ali ni khuutsikhola shitweela busa nga tsy’ewuunwa iye khuureerawo lukoosi. Mu saambo iyo, umusaayi kane ekoontselele khulwaabwe, Umukasya abeyakhile shishoonako isho. 21Lwanyuma ali ni khuusuta inyama iramire, akiyile ibulafu w’ekaambi, akyooshe nga ni okhile inyoowa. Yino ili isaayilo iye khukhwiyakhila lituuli bibyoonako byalyo.

Nga umuraangirisi woonakile

22Nga umuraangirisi woonakile mu moni tsy’Omukasya, ne abe nga sashitsililiile ta, aba waasaalile kumusaango. 23Khukhwaama naashifumbula ari woonakile, ali ni khuuwaanayo shiwaanwa sh’embusi indurume, ikhalikho buuleme bwoosi ta. 24Ali ni khuukirakho kumukhono kweewe khu murwe, bakiirire mu moni tsy’Omukasya, mu shifwo sheesi beeriramo tsisaayilo tsye khukhwoosha. Iyino ili isaayilo irusawo bibyoonako. 25Lwanyuma umusaayi abukulekho khu malasile ke isaayilo iye khurusawo bibyoonako iyo, nga araambisa lulwaala lweewe, awakhe khu ntsika tsye shisheeso she tsisaayilo tsintsoshe. Kamalasile kakaaramire ali ni khuukatsukha mwisina mwe shisheeso isho. 26Kiminaawa kyayo kili ni khukhwookhebwela khu sheeso, musaambo niyo indweela nga isaayilo ireerawo lukoosi. Nashiryo musaambo iyo, umusaayi uyo kane abe wekoontseleele Umukasya khukhwiyakhila umuraangirisi uyo byeesi onakile.

Nga babaandu ba busheele boonakile

274.27: Bala 15.27,28Nga abe umuundu uwa busheele woonakile mu moni tsy’Omukasya, ne nga abe sashitsililiile ta, aba waasaalile kumusaango. 28Khukhwaama nga waashifumbuule ari woonakile, ali ni khuureera isaayilo iy’embusi ikhasi, nga s’ilikho buuleme bwoosi ta, khulwe shishoonako isho. 29Ali ni khuura kumukhono kweewe khu murwe kwe isaayilo iye shishoonako iyo, bakiirire mu shifwo mweesi bawaanilayo tsisaayilo tsintsoshe. 30Lwanyuma umusaayi abukulekho khu malasile ke isaayilo iye khuurusawo bibyoonako iyo, nga araambisa lulwaala lweewe, awakhe khu ntsika tsye shisheeso she tsisaayilo tsintsoshe. Kamalasile kakaaramire ali ni khuukatsukha mwisina mwe shisheeso isho. 31Umusaayi ali ni khuurusakho kiminaawa, musaambo isi bakhola kh’usaayilo ireera lukoosi. Lwanyuma umusaayi akyookhele khu sheeso, nio bishe bituukhe isilikakha iwunyila Umukasya buulayi. Mu saambo iyo, umusaayi kane abe waalombeele umuundu uyo shishiyakhilo, ni nase kane imbe naamwiyakhiile.

32Umuundu uyo n’aba bari mu shifwo sh’embusi waareerire lisheese lilyaana nga isaayilo iyinyusawo bibyoonako, ali ni khuureera likhasi, nga shililikho buuleme bwoosi ta. 33Ali ni khuura kumukhono kweewe khu murwe kwe isaayilo iye shishoonako iyo, bakiirire mu shifwo mweesi bawaanilayo tsisaayilo tsintsoshe. 34Lwanyuma umusaayi abukulekho khu malasile ke saayilo iye khuurusawo bibyoonako iyo, nga araambisa lulwaala lweewe, awakhe khu ntsika tsye shisheeso she tsisaayilo tsintsoshe. Kamalasile kakaaramire ali ni khuukatsukha mwisina mwe shisheeso isho. 35Umusaayi ali ni khuurusakho kiminaawa, musaambo isi bakhola khu saayilo ireera lukoosi. Lwanyuma umusaayi akyookhele khu sheeso, nio bishe bituukhe isilikakha iwunyila Umukasya buulayi. Mu saambo iyo, umusaayi kane abe waalombeele umuundu uyo shishiyakhilo, ni nase kane imbe naamwiyakhiile.