Swahili Bible2

3

Tsisaayilo tsye khuuloomba tsikhabi

1Umukasya weloosela waaloma ari: Umuundu nga akaanisayo shiwaanwa shishireera lukoosi akari aase ni naye, ali ni khuubukula ikhaafu khukhwaama mu litaala lyeewe, nga inyala yaaba iwuunwa, namwe ikhasi. Ali ni khuubukula iyo ikhalikho buuleme bwoosi ta. 2Ukireerire ali ni khuukirakho kamakhono keewe khu murwe kwayo, lwanyuma akiirire mulyaango mwe lisari lyeesi Umukasya abonekhelamo. Basaayi khukhwaama mu shikuuka sha Aroni, bali ni khuuwaanyaka kamalasile bebotookhelese shisheeso. 3Khukhwaama shiwaanwa isho ni shili she khukhwookhela khu sheeso sh’Omukasya, umuundu uyo ali khuuwaanayo kiminaawa kyoosi ni byeenda byoosi, 4atubekho ni tsiimbiko tsyoombi atweela ni kiminaawa kikitsikobolelakho, ni luwaande lwe luyima. 5Lwanyuma basaayi barekho tsiikhu, bakyookhele khu sheeso. Ili isaayilo iye khukhwoosha, yituukhe lisuusi liliwunyila Umukasya isilikakha indaayi.

6Nga shiwaanwa shishireera lukoosi isho she khuuwaanayo isi Umukasya, lili lisheese limiiku, namwe ili imbusi indurume, shili ni khuuba nga seshilikho ni buuleme bwoosi ta. 7Ne noola umuundu awaanayo lisheese lilyaana, ali ni khuulireera imulyaango kwe lisari mweesi Umukasya abonekhela. 8Ali ni khuulirakho kumukhono kweewe khu murwe khwalyo, liriibwire mu moni tsy’Omukasya. Basaayi khukhwaama mu shikuuka sha Aroni, bali ni khuuwaanyaka kamalasile bebotookhelese shisheeso. 9Lwanyuma khukhwaama khu shiwaanwa isho shishireera lukoosi akari aase ni naye, ali ni khuuwaanayo kiminaawa kye kumushiinga kyoosi, shikhiinga shoosi, ni kiminaawa kye khu byeenda, ni byeenda byoosi. 10Ali ni khuurakho ni tsimbiko tsyoombi, ni kiminaawa kikitsilikho, ni khaanyama kheesi ali ni khuukhala khu mbiko itsyo. 11Umusaayi ali ni khukhwookhela bino byoosi khu sheeso, khulwekhuuba ili isaayilo intsoshe iwaanibwileyo isi Umukasya.

12Nga umuundu awaanayo imbusi, ali ni khuukireera mu moni tsyase, 13akirekho kumukhono kweewe nga ili imulyaango kwe lisari lyeesi Umukasya abonekhelamo, bakiirire abweene awo. Basaayi khukhwaama mu shikuuka sha Aroni, bali ni khuuwaanyaka kamalasile bebotookhelese shisheeso. 14Khukhwaama khu mbusi iyo, ali ni khuuwaanayo isi Umukasya, kiminaawa kikiili khu byeenda, ni byeenda byoosi. 15Atubekho tsimbiko tsyoombi, ni kiminaawa kikiili khu mbiko, ni khaanyama kheesi ali ni khuukhala khu mbiko itsyo. 16Lwanyuma basaayi barekho tsiikhu, bakyookhele khu sheeso. Ili isaayilo iye khukhwoosha, yituukhe lisuusi liliwunyila Umukasya isilikakha indaayi. Kiminaawa kyoosi kili ni khuuweebwa Umukasya. 17Nashiryo kane libe likaambila lye biilo ni biilo liri, ikhaba muungo tsyeenywe, inywe mwabeene ni lisaaye lyeenywe, mbaawo khuulya kiminaawa, namwe kamalasile ta.