Swahili Bible2

25

Kimiiko Kimikhosefu

Kumwiiko kwe kumusaafu

125.1: Luky 23.10,11Nga Musa ali khu lukiingi Sinaayi, Umukasya waamulomela ari, 2boolela ba Isiraeli uri, nga mwoolile khu liloba lyeesi Umukasya atsya khubawa, liloba ilyo nalyo lili ni khuuba ni sabato isi Umukasya. 3Muli ni khuulima mu mikuunda kyeenywe khuumala kimiiko kisesaba, nga mukhooboolela biilimwa byeenywe, naluundi nga mukesa. 4Ne mu mwiiko kwe kumusaafu, liloba lili ni khuuba ni sabato iye khuuwola, sabato y’Omukasya. Mukhalima shishiindu shoosi mu mikuunda kyeenywe, namwe mwaatsya mwaakhoboolela bibiilimo ta. 5Mukhakesa biilimwa bibiitsowa khu bwabyo busa ta, ikhaba kimizabibu kikiili mu mikuunda mweesi mukhalima ta, mukhakesa ta. Kumwiiko ukwo kuli kwe liloba khuuwolamo. 6Biilimwa bibitsowa mu liloba mu mwiiko ukwo, biili biilyo byeenywe, iwe atweela ni baraambi beenywe, ni babeetswa babaamenya atweela ni nanywe. 7Ikhaba bibyaayo byeenywe ni tsisolo tse mwirome, nabyo bibiili khwiiswa lyeenywe, na buli shiindu shishikhaatsowemo, muli ni khuubilya.

Kumwiiko kwe khuusikula

8Muli ni khuubala kimiiko musaafu nga kiloondekhana, khuumala kimiluundi musaafu, muliinde mwolese kimiiko kamakhumi kane na syeenda. 9Lwanyuma khu shifukhu she likhumi, mu mweesi kweenywe kwe kumusaafu, nga nisho shifukhu she khukhwiyakhilakho bibyoonako, murumane babaandu batsye mu shibala shoosi nga bafuura tsikhoombi. 10Kumwiiko kwe kamakhumi karaano ukwo, muli ni khuukukukuula khuuba kumwiiko kumukhosefu, naluundi kwe khukhwiisayo byeesi mwakula khaale, mu shibala sheenywe shoosi. Kuli kumwiiko kwe khukhwiisilayo babaandu bibiindu byaabwe, nga buli mutweela bamukoboselayo byeesi aakulisa khaale, ni baakulwa nabo beelayo muungo tsyaabwe. 11Kumwiiko kwe kamakhumi karaano ukwo, kuli kwe khukhwiisilayo babaandu bibiindu byaabwe. Mu mwiiko ukwo mbaawo khuumiitsa biilyo, namwe khuukesa ibyo bibiitsowa khu bwabyo busa ta. Namwe mbaawo khuukesa kimizabibu kikiitsowa khu bwakyo busa ta. 12Kumwiiko kuno kuli kumukhosefu isi inywe, khulwekhuuba kuli kumwiiko kwe khukhwiisilayo babaandu bibiindu byaabwe. Muli ni khuulya ibyo bibitsowa byonyene busa mu mikuunda.

13Mu mwiiko kuno kwe khukhwiisilayo babaandu bibiindu byaabwe, buli muundu ali ni khuumwisilayo abe sheesi aamala khuukulisa, ni baakulwa bali ni khukhwiilayo iwaabwe. 14N’iiba bari mutweela aakulisa ukuundi liiswa, namwe aamukulakho liiswa, mbaawo khuulyakhana ta. 15Liiswa ilyo uli ni khuulikulisa khuuloondekhana ni kimiiko kikiiramire kyeesi litsya khwaama biilyo, nga kumwiiko kwe khukhwiisilayo babaandu bibyaabwe kushiili khukhwoola ta. 16Nga kimiiko kikiramire kili kimikali, buukusi buli ni khuuba bwe angaaki, ne nga kimiiko kikiramire kili mifwiiti kiri, buukusi buli ni khuuba bwe aasi. Khulwekhuuba uyo akulisa khuuloondekhana ni kimiiko kyeesi liiswa litsya khwaama biilyo. 17Ise ndi Umukasya Wele weenywe, nashiryo mukhalyaakhana ba Isiraeli basheenywe ta.

Buukosi bwe kumwiiko kwe kumusaafu

18Nashiryo, nga mukana muri nio mumenye mu lukoosi khu liloba lyeesi intsya khubawa, muli ni khuuloondelela bilakilo byaase, ni indeekela yase, mukhole nga ni biloma. 19Kane mufune biilyo biikali mu liloba ilyo, busheele mubatsake ni biilyo, naluundi mumenye mu lukoosi mu liloba ilyo.

20Ne iliwo unyala khuureeba ari, ne nga sikhwaamiitsile namwe nga sikhwaakesile mu mwiiko kwe kumusaafu, khukhaalye shiina? 21Umukasya umweene kane awe liloba tsiikhabi mu mwiiko kukuukhola khaseesaba, akile lyaame biilyo bibimala kimiiko kitaru. 22Nio uli mumiitsa biilyo mu mwiiko kwe shisyeenda, mube nga mushiilya khu bye likesa litaayi, khukhwoolesa ni mukesa bye kumwiiko ukwo.

Khukhwiisakayo bibiindu bye babaandi

23Mbaawo umuundu khuukulisila ilala liiswa ta, khulwekhuuba lili lilyase. Inywe muli babeetswa busa naluundi baakeni. 24Mu shibala sheenywe muli ni khuumanya muri, umuundu aakhakulisa liiswa, uyo uulikulisile ali uwe lukoosi khuulisikula lyeekela lilyeewe luundi.

25N’iiba bari umu Isiraeli weekelile umutaambi, ne waakulisa liiswa lyeewe, mutweela khu balebe beewe ali ni khuulisikula alikoboseyo. 26N’iiba bari umuundu uyo s’aali n’umuundu unyala khuulisikula waalikobosayo ta, umweene anyala khuulisikula nyaanga nga waafunile bye buyiindifu. 27Noola shili shiryo, aba uyo uuli khuusikula liiswa lweewe, ali ni khuusasula uyo abe uwalikula, kimiiko kikiramire khukhwoola khu mwiiko kwe khukhwiisilayo babaandu bibyaabwe. Musaambo iyo, kane abe nga waasikuule liiswa lyeewe. 28Ne noola s’aali ni bibikanibwa nio asikule liiswa ilyo ta, lili ni khuurama mu makhono k’oyo uwalikula, khukhwoolesa kumwiiko kwe khukhwisilayo babaandu bibiindu byaabwe. Mu mwiiko ukwo, uyo uwalikula ali ni khuulisilayo umweene uwalyo.

29N’iiba bari umuundu waakulisile intsu nga ili mu shiriimba shishiili mu kumako, aba ali uwe lukoosi khukisikula imbuka yoosi, mu mwiiko kukuunyoowa. 30Ne n’iiba bari siwakisikuule mu mwiiko kukuunyoowa ta, aba s’ashiili ni bunyala bwe khuukisikula luundi ta. Iba yekelile iy’oyo uwakikula khuumala kimiiko kyoosi. Uwakikula s’anyala waakisilayo uwakikulisa mu mwiiko kwe khukhwisilayo babaandu bibyaabwe ta. 31Ne tsiintsu tsitsikhali mu biriimba bibiilikho kamatikiiyi ta, itsyo bali ni khuutsiyila nga bakhola khu liiswa. Ukikulisile anyala waakisikula, namwe ukikulile ali ni khuukisilayo umweene mu mwiiko kwe khukhwiisayo bya beene. 32Khuurusakho ndi, mu biriimba bye ba Levi, ba Levi banyala khuusikula tsiintsu tsyaabwe imbuka yoosi. 33Nga umu Levi siwasikuule intsu yeewe ta, bali ni khuumukoboselayo mu mwiiko kwe khukhwiisayo bya beene. Khulwekhuuba tsiintsu tsye ba Levi tsili tsitsyaabwe tsinyene ilala. 34Ne kamaayilwe kakebotokheleele biriimba bye ba Levi, mbaawo khuukakulisa ta. Khulwekhuuba ako kali kakaabwe ilala khuumala biilo ni biilo.

Khukhwiikopisa bataambi

3525.35: Maka 15.7,8N’iiba bari umu Isiraeli uwashoowo weekyelile umutaambi nga umweene s’enyala ta, uli ni khuumuwa luundi umuyeete byeesi akana, ufwaane busa nga n’uwa umuraambi, namwe umwiitswa, nio anyalise khukhwiloosela khuumenya aambi ni nawe. 36Ukhamurusakho kamafuurisa koosi ta, akhali ndi iwe uli ni khuurya Wele, uwashoowo uyo eloosele khuumenya aambi ni nawe. 3725.37: Luky 22.25; Maka 23.19,20Nga waamwikopisile kamapeesa namwe biilyo, ukhaloma uri akhukobosele nga waareerekho kamafuurisa ta. 38Lino lili likaambila khukhwaama isi ise Umukasya Wele weenywe, niye uwabarusa inywe mu liloba lye ba Misiri. Ise nabarusa inywe ibweene iyo, naabawa liiloba lye mu Kanani, indi nio imbe Wele weenywe.

Khuulekhuula baakulwa

3925.39: Luky 21.2-6; Maka 15.12-18N’iiba bari umu Isiraeli uwashoowo umenya aambi ni nawe wekelile umutaambi, ne wekulisa umweene ari akhuraambire iwe, nga umukulwa woowo, ukhamukhola waraamba nga umukulwa ta. 40Ali ni khuumenya ni nawe, akhuraambire nga umuraambi woowo, khukhwoolesa kumwiiko kwe khukhwisilayo babaandu bibiindu byaabwe. 41Lwanyuma umulekhe atsye ingo weewe, ni khu liloba lyeesi baamuwa nga buusikha bweewe. Ali ni khuutsya ni babaana beewe. 42Ba Isiraeli bali babaandu baase, beesi ise narusa mu Misiri, nashiryo mbaawo umuundu khuubakulisa mu bukulwa ta. 43Mukhababirisa buubi mwaabaminikhilisa ta, akhali indi muli ni khuurya Wele. 44Nga mukana baakulwa, munyala mwaakula khukhwaama mu manaambo kakaabebotookheleele. 45Munyala mwaabakula ikhaba khukhwaama khu be kamanaambo kakaandi babaamenya mus’iinywe. Babaana be babeene abo, babasaalikhila muungo tsyeenywe, beekela babeenywe. 46Munyala mwaabayila nga she buusikha bwe babaana beenywe, nga beloosela khuubaraambila. Kane babe baakulwa beenywe buulamu bwaabwe bwoosi. Ne ba Isiraeli basheenywe, mukhababirisa buubi ta.

47N’iiba bari mutweela khu beetswa umenya ni nanywe wekelile umuyiinda, ne umu Isiraeli umutaambi wekulisayo khuuba umukulwa wooyo, namwe wekela mutweela khu be muntsu iy’omwiitswa, 48-49mutweela khu bandaaye, namwe paapa weewe ukuundi, namwe umulebe weewe yeesi, anyala khuumusikula. Namwe niye umweene n’akelawo waafuna bye buyiinda, anyala weesikula. 50Ali ni khukhwireeba khu muundu uwamukula, babale kimiiko khukhwaamila isi aamukulila khukhwoolesa kumwiiko kwe khuusikula isi kulyoolela, asasule buukusi khuuloondekhana ni kumukheemba kweesi basasula umuraambi. 51Nga kimiiko kishiiramayo kimikali, ali ni khukhwisikula nga asasula khuuloondekhana ni kimiiko ikyo. 52Ne nga kyaaramire mikeekhe khukhwoolesa khu mwiiko kwe khukhwisikula, ali ni khuusasula shishiilekhaana ni kumukheemba kw’omuraambi, khuumalayo kimiiko kikiramire. 53Ali ni khuuba busa nga umuraambi uwa busheele busa, nga mbaawo khuumubirisa buubi ta. 54N’oola siwasikulibwile musaambo yino ta, bali ni khuumulekhuula mu mwiiko kwe khuusikula atsye, atweela ni babaana beewe. 55Ise ndi Umukasya Wele weenywe, nashiryo umu Isiraeli s’anyala khuuba umukulwa buulamu bweewe bwoosi ta, khulwekhuuba bali babaakaanisi baase. Bali babaakaanisi baase, beesi ise nareera khukhwaama mu liloba lye ba Misiri.