Swahili Bible2

21

Kamakaambila keesi basaayi bali ni khuuloondelela

1Umukasya waalomela Musa ari, boolela basaayi nga nibo babaali basoleeli ba Aroni uri, ne muwaamba khu mulaambo kw’omuundu, kane mube mwerereere bunyaalu. 2Akhali unyala wawaamba khu mulaambo kwa maayi woowo, paapa woowo, umwaana woowo, wandaayo, 3namwe umukooko woowo ushiili khukhwalikha ta, khulwekhuuba s’aali n’umuseetsa ta. 4Ni mutsya khusiikha umuundu yeesi uuli uwe buulebe khuubirira mu khuyilana, muba mwereereere bunyaalu. 521.5: Lev 19.27,28; Maka 14.1Mukhabekakho litsuune lyeenywe, namwe khu ndulo khwe bunwaanwa bweenywe, namwe mwesalaka kimibili kyeenywe bari mwokesanisa khuulila baafu ta. 6Ise ndi Umukasya Wele weenywe, naluundi ise nabarobora inywe mwenyene khukhuuntsakaanisa ise tsisaayilo tsye bibiliibwa, khu sheeso. Ni nashiryo muli ni khuuba baakhosefu. 7Mukhayilatsaka umukhasi ukhola buyeyani, namwe umukhasi uwetubaasatsakakho n’umuundu ukuundi ta. Namwe mukhayila umukhasi isi umuseetsa aamala khaale khuuloba ta. Khulwekhuuba inywe muli bakhosefu isi ise Wele.

8Babaandu bali ni khuuyila umusaayi nga umukhosefu, khulwekhuuba niye uwaanayo kimikaati isi Wele weenywe. Umusaayi ali ni khuuba umukhosefu, khulwekhuuba ise Umukasya, ubawa tsiikhabi, indi umukhosefu. 9Umwaana umukhaana uw’omusaayi n’aba bari waakholile buyeyani, woonakisile shiriifwa sha paapa weewe, bali ni kumwookhela busa mu mulilo afwe.

10Uyo uuli umusaayi umukhulu mu baashe, akhalekha litsuune lyeewe lyaasakalala busa ta. Namwe akhonuula bikwaaro byeewe khukhwookesanisa kumutaambo, nga umuundu wafwiile ta. 11Umusaayi umukhulu akhatsya aambi ni kumulaambo, waakila weereerera umweene bunyaalu ta. Abe ikhaba kumulaambo kwa paapa weewe namwe kwa maayi weewe. 12Namwe akharura mu shiifwo shikhosefu, namwe waareerera shifwo shikhosefu bunyaalu, bari atsya khusiikha umuundu ta. Niye ali uwabiitibwa ni kamafura ka Wele. 13Nga ayila umukhasi, ali ni khuuyila umukhaana indungubaasi, 14khukhwaama mu baandu babeewe babeene. Akhayila namulekhwa, namwe umukhasi yeesi isi umuseetsa aamala khaale khuuloba, namwe uyo ukhola bye buyeyani ta. 15Shino kane shiliinde babaana beewe nga sibali banyaalu ta, nio banyalise khukhuuntsakaanisa ise. Ise ndi Umukasya, niye uwabarobora nibo.

16Kila Umukasya alomela Musa luundi ari, 17“Boolela Aroni uri, mbaawo khu be lisaaye lyoowo ulikho buuleme bwoosi ufukiilisibwa khukhuuntsakaanisa ise nga umusaayi ta. 18Uyo yeesi ulikho buuleme, nga khuuba umubofu, umuleme, uyo uwe tsimbaaso mu moni, namwe bikele bikhalekhaana ta, 19uyo uwalemala kumukhono namwe shikele, 20ulikho shiruumba, uwembiya naabi, isi tsiimoni tsikhabona buulayi ta, uuli ni buulwaale bwe lihaafu, namwe uyo isi baanyalula tsimiitso tsye busaani. 21Babaandu be saambo nga iyo, babaalikho buuleme, bakheetsa isi ise Umukasya, khuuwaanayo tsisaayilo ni biwaanwa ta. 22Babaandu babaali nga abo, banyala baakabanana ni babaandi khu bilyo byeesi babaandu baba baareerire mu shifwo shikhosefu. 23Ne bakhengila mu shifwo shikhosefu, namwe beetsa khu sheeso khukhuuntsakaanisa ise ta, khulwekhuuba balikho buuleme, banyala baakila shiifwo shikhosefu shaabamo bunyaalu. Khebulila muri ise Umukasya, niye uuwa basaayi tsikhabi, nio waakila baaba bakhosefu.”

24Nashiryo, Musa waaboolela Aroni, ni basoleeli beewe, ni ba Isiraeli boosi bibiindu bino.