Swahili Bible2

2

Tsisaayilo tsye khuusiima Umukasya

1Umukasya weloosela waaloma ari, “Nga umuundu areera shiwaanwa she biilimwa byeesi bakhupakile isi Umukasya, shiwaanwa isho shili ni khuuba she buufu buunose buulayi naabi, nga waabutsukhilekho kamafura ke tsinyanyi. Ali ni khuubuwaanayo nga waalooselekho ni bubaani. 2Bino ali ni khuubiyilila basaayi, babaali be nda iya Aroni. Lwanyuma umusaayi atahekho buufu bubuulimo kamafura ke tsinyanyi ubwo shikalabo shitweela, abukulekho ni bubaani, abire byoosi khu sheeso sha buroonzi, abyooshe bishe bituukhe lisuusi, liliwayo isilikakha indaayi isi Umukasya. 3Bibiirama khu shiwaanwa isho, biba bye basaayi, bili bikhosefu naabi, khulwekhuuba baabiwaanileyo isi Umukasya.

4“Nga umuundu areera shiwaanwa she kumukaati kweesi bateekheele mu kubya kuubile, kumukati ukwo kuli ni khuuba nga imbaamo kamamela kakaakila kwaayiimba ta. Kuli ni khuuba busa kwe buufu buunose naabi. Buufu ubwo anyala khuuba nga waabukaandiile kamafura ke tsinyanyi, namwe ta, kamahaandu kaakhalimo kamamela ta, nga baawakhilekho kamafura khu ngaaki. 5Ne nga kumukaati ukwo baakuteekheele khu sefuluya imaambali busa, kuli ni khuuba kwe buufu buunose naabi, nga baatubaasilemo ni kamafura. 6Ali ni khuumenyulakamo kumukaati ukwo bisiintsa, ahanyakekho kamafura ke tsinyanyi. 7Ne nga kumukaati ukwo baakuteekheele mu sefuluya ilikho shifunikho, bali ni khuukuteekha khukhwaama mu bufu buunose naabi, nga baatubaasilemo kamafura ke tsinyanyi. 8Umuundu ali ni khuureera shiwaanwa isi Umukasya, sheesi bakholele khukhwaama mu biindu ibyo. Nga waabiwaanileyo isi umusaayi, umusaayi abiwaambe abireere khu sheeso sha buroonzi. 9Nio lwanyuma khukhwookesanisa bari shiwaanwa shoosi shili sh’Omukasya, umusaayi ali ni khuubukulakho ashookhele khu sheeso, bishe bituukhe lisuusi, liliwayo isilikakha indaayi isi Umukasya. 10Isaayilo iramire yoosi, iba iya Aroni ni babaana beewe basaayi. Isho shili shikhosefu naabi, khulwekhuuba baashiweeleyo isi Umukasya.

11“Isaayilo iwaanibwayo isi Umukasya nga yaama mu bilimwa, bakharamo kamamela ta. Khulwekhuuba mbaawo khukhwookhela kamamela namwe bubuushi khu sheeso sh’Omukasya ta. 12Khuuwaanibwayo nga biwaanwa, kamamela ni bubuushi binyala byaawaanibwayo isi Umukasya. Ne sibyookhebwela khu sheeso khuuwaanayo isilikakha indaayi isi Umukasya ta. 13Muli ni khuusalaasa kumuunyu khu biwaanwa bye bilimwa ibyo. Mbaawo khuubiwaanayo busa nga mbaamo kumuunyu ta, kumuunyu kuli khaabonelo khakhokesana indakaano iye biilo ni biilo isi mwakhola ni Wele.

14“Nga muwaanayo bibiinyoowa khukhwaama mu likesa, muli ni khuuwaanayo ibyo byeesi mwaama khukesa nga bishiili khwooma ta, namwe ibyo byeesi banyalulakile busa nga basya. 15Muli ni khuutubaasamo kamafura ke tsinyanyi, naluundi mulooselekho ni bubaani, khulwekhuuba ili isaayilo iye biilimwa. 16Lwanyuma umusaayi ali ni khuusalaasa bubaani bwoosi, ni bilimwa byoosi, ni kamafura ke tsinyanyi khu sheeso, abyooshe. Lisuusi khukhwaama khu bino lili ni khuuniina mu ngaaki, khukwokesananisa muri shiwaanwa shoosi shili sh’Omukasya.”