Swahili Bible2

15

Buunyaalu khukhwaama mu basaani

1Umukasya waalomela Musa ni Aroni ari, 2“Boolela ba Isiraeli muri, nga umusaani ali ni buulwaale bubukila kimiindu kyaarura khukhwaama mu mbalu yeewe, aba alikho bunyaalu. 3Abe kimiindu ikyo kyaakhaba nga kishiirura, namwe nga kyaayakama, aba alikho bunyaalu. 4Buulili bweesi umuundu akonakho, ni khu buli shishiindu sheesi ekhalakho shoosi, nabyo biikela binyaalu. 5Umuundu uwaamba khu bulili bw’omuundu uyo, ali ni khuusiinga bikwaaro byeewe, esiinge kumubili kwoosi. Kane arame nga alikho bunyaalu khukhwoolesa angoloobe. 6Uyo yeesi uwaamba khu shiindu shoosi sheesi umuundu uyo awaambilekho, ali ni khuusiinga bikwaaro byeewe, naluundi esiinge. Kane arame nga alikho bunyaalu khukhwoolesa angoloobe. 7Uyo yeesi uwitiila khu muundu uyo, ali ni khuusiinga bikwaaro byeewe, naluundi esiinge. Kane arame nga alikho bunyaalu khukhwoolesa angoloobe. 8Siinga umusaani urura kimiindu uyo afuutsa kamare khu muundu ukuundi, uyo isi bafutsilekho ali ni khuusiinga bikwaaro byeewe, naluundi esiinge. Kane arame nga alikho bunyaalu khukhwoolesa angoloobe. 9Shishiindu shoosi sheesi uwe buulwaale ubwo ara khu shaayo, ne wekhalakho nga shishaayo isho shaamusutile, shiikela shishiilikho bunyaalu. 10Uyo yeesi uwaamba khu sheesi umulwaale uyo amalile khukhwikhalakho, kane abe ni bunyaalu khukhwoolesa angoloobe. Uyo yeesi usuta shishiindu nga shisheene isho, ali ni khuusiinga bikwaaro byeewe, naluundi esiinge. Kane arame nga alikho bunyaalu khukhwoolesa angoloobe. 11Uyo yeesi isi umusaani uuli ni buulwaale ubwo awaambakho, nga umulwaale uyo siwanyoowile khusaaba kamakhono keewe ta, ali ni khuusiinga bikwaaro byeewe, naluundi esiinge. Kane arame nga alikho bunyaalu khukhwoolesa angoloobe. 12Bibiindu byoosi bibyabuumbibwa mu liloba lye tsinyuungu byeesi umulwaale uyo awaambakho, bali ni khuubyaraakaka. Ne buli bipwakhuli byeesi bakhootsa khukhwaama mu kuusaala byeesi awaambakho, bali ni khuubisiinga.

13“Umusaani umulwaale uyo, nga waamalile khuuwona, ali ni khuubala biifukhu musaafu, lwanyuma asiinge bikwaaro byeewe. Ali ni khuutsya esiinge mu luutsi, abe nga waarusibwilekho bunyaalu. 14Khu shifukhu shishikhola shinaane, ali ni khuureera buwuusi bubili namwe bikuungu bibili, imulyaango kwe lisari likhosefu, abiwe umusaayi. 15Umusaayi ali ni khuuwaanayo khatweela nga isaayilo irusawo bibyoonako, ne khakhaandi nga isaayilo intsoshe. Musaambo iyo, umusaayi amuloombele isi Umukasya khulwe buulwaale ubwo.

16“Umusaani yeesi isi kameetsi kakaasaala babaandu kaba kaarurire mwibili mweewe khu bwako busa, kane ayilibwe nga ulikho bunyaalu, khukhwoolesa angoloobe. 17Shikwaaro shoosi sheesi baakhola khukhwaama mu ngubo namwe mu lihaafu ly’esolo sheesi umusaani uyo awaambakho, shiba sheekelile shinyaalu, khukhwoolesa angoloobe. 18Umusaani nga wetubaasile n’umukhasi, boombi bali ni khukhwisiinga lwanyuma lwayo. Ne shitweela busa baba bekelile banyaalu khukhwoolesa angoloobe.

19“Nga umukhasi ali mu biseela byeewe bye khuutsya i masaaba, aba wekelile umunyaalu khuumala biifukhu musaafu. Uyo yeesi uwitiila khu mukhasi uyo, ali ni khukhwisiinga, ne shitweela busa aba wekelile umunyaalu khukhwoolesa angoloobe. 20Shishiindu shoosi sheesi akonakho nga buulili mu mbuka iyo, na buli shoosi sheesi ekhalakho, shikela shinyaalu. 21Umuundu yeesi uwitiila khu bulili bw’omukhasi uyo, ali ni khukhwisiinga. Ne shitweela busa aba wekelile umunyaalu khukhwoolesa angoloobe. 22-23Umuundu yeesi uwitiilakho khu shiindu sheesi umukhasi uyo ekhaalekho, oba buli buulili, namwe sheesi ekhaalekho shoosi, ali ni khuusiinga bikwaaro byeewe, naluundi esiinge umweene. Ne kane abe wekelile umunyaalu khukhwoolesa angoloobe. 24Umusaani yeesi uwitubaasa n’umukhasi uuli khuutsya i masaaba, ekela ulikho bunyaalu khuumala biifukhu musaafu. Ni buulili bwoosi bweesi umusaani uyo akonakho, bwikela bunyaalu.

25“Umukhasi yeesi uba nga s’aali khuutsya i masaaba ta, ne nga arura kamafuki, aba alikho bunyaalu nga bw’oyo uuli khuutsya i masaaba, khukhwoolesa kamafuki ako ni kane kaakame. 26Shishiindu shoosi sheesi akonakho nga buulili mu mbuka iyo, na buli shoosi sheesi ekhalakho, shikela shinyaalu, musaambo niyo indweela nga n’aaba ali khuutsya i masaaba. 27Uyo yeesi uwaamba khu biindu byeesi umukhasi aba wetiililekho, ali ni khuusiinga bikwaaro byeewe, naluundi esiinge umweene. Ne aba wekelile ulikho bunyaalu, khukhwoolisa angoloobe. 28Ne nga waawonesebwele, ali ni khuubala biifukhu musaafu biwe, nio abe nga s’ashiilikho bunyaalu ta. 29Khu shifukhu shishikhola shinaane, ali ni khuuyila kamawuusi kabili, namwe bikuungu bibili, amulyaango we liisari likhosefu, abiwe umusaayi. 30Umusaayi ali ni khuuwaanayo khanywiinywi khatweela nga isaayilo irusaawo bibyoonako, ne khakhaandi nga isaayilo intsoshe. Mu saambo iyo, umusaayi ali ni khuuloombela umukhasi uyo khulwe khukhwibeena ukhwo, isi Umukasya.

31“Ni nashiryo, muli ni khuubona muri babaandu ba Isiraeli sibaabakho bye bunyaalu ta. Khulwekhuuba ni beetsa aambi n’isaanduuku yase iye indakaano nga balikho bunyaalu, kane linaambo lyoosi lihele liwewo.

32“Likaambila lino liwaamba khu musaani ufumukha kimiindu, ni n’oyo isi kameetsi ke basaani karura konyene busa, 33n’umukhasi uuli khuutsya i masaaba. Naluundi liwaamba khu muundu yeesi uwibeena, n’umusaani uwitubaasa n’umukhasi uba nga alikho bunyaalu.”