Swahili Bible2

14

Byeesi babawonesebwile bali ni khuukhola

1Umukasya waalomela Musa ari, 214.2: Mat 8.4; Mako 1.44; Luka 5.14; 17.14“Bino nibyo biilakilo bibiwaamba khu baandu babawonesebwele buulwaale bwe lihaafu, khu shifukhu khweesi bawonesebwela. Nga baamalile khuuboolela umusaayi, 3ali ni khuutsya ibulafu we kaambi, emenielese umuundu uyo. Nga umuundu uyo waawonile khukhwaama khu buulwaale bwe lihaafu, 4umusaayi alakila baareera umuundu uyo ni binywiinywi bifwiiti bibili biilamu, bibifukiilisibwa khuuwaanibwayo nga isaayilo, atweela ni luukhu khukhwaama khu kuusaala ku kedali, n’ingubo imbesemu, ni shishiraambisibwa khuusalaasa kameetsi kakaawa tsiikhabi. 5Umusaayi lwanyuma alakile umuundu mutweela khukhwiirakho khanywiinywi khatweela, nga akheerira khu soongwe iye kameetsi, kakaama mu sebele. 6Awaambe khanywiinywi khakhashiili khaalamu, ni luukhu khukhwaama khu kuusaala ku kedaali, n’ingubo imbesemu, ni shishiraambisibwa khuuwa tsiikhabi, abisanye mu mafuki ke khanywiinywi kheesi bamalile khukhwiira. 7Lwanyuma asalaase kamafuki ako kimiluundi musaafu khu muundu uwonesebwele buulwaale bwe lihaafu. Nga ali khuusalaasa kamafuki ako aloma ari, ‘Ari s’ulikho ni bunyaalu ta.’ Lwanyuma alekhuule khanywiinywi khakhaashiili khaalamu khapururukhe, khatsye.

8“Umuundu uwonesebwele uyo, ali ni khuusiinga bikwaaro byeewe, abekekho litsuune, nio lwanyuma umweene naye esiinge, abe nga waawonesebweele ilala. Lwanyuma lwayo, atsye mu kaambi, ne ali ni khuumala biifukhu musaafu nga s’aakona mu lisari lyeewe ta. 9Khu shifukhu she kumusaafu, ali khuubekakho litsuune lyoosi khu murwe, abekekho ni bunwaanwa bwoosi, ni biisike, ni bubwooya khu mubili kwoosi. Lwanyuma asiinge bikwaaro byeewe, esiinge, awo abe nga waawonesebweele ilala.

10“Khu shifukhu shishikhola shinaane, ali ni khuuyila isi umusaayi bibiindu bino: Kamamiiku kamaana kakaakhalikho buuleme bwoosi ta, lisheese lisubeeni lye kumwiiko mutweela lilikhalikho buuleme ta, tsikilo tsitaru tsye buufu buunose bwe biilimwa biikhupake, nga baatubaasilemo kamafura ke kuusaala ku olivu, ni khasiintsa khatweela khe lita indweela iye kamafura ke kuusaala ku olivu. 11Nio lwanyuma umusaayi ayile umuundu uyo utsya khuwonesebwa atweela ni biindu bino, amulyaango kwe lisari likhosefu, isi Umukasya. 12Umusaayi kane abukulekho limiiku lilyaana litweela, aliwaaneyo nga isaayilo irusawo bibyoonako, atweela ni shisiintsa shitweela shishikhola khataru she lita, iye kamafura ke kuusaala ku olivu. Bino ali ni khuubisuta angaaki isi Umukasya, nga isaayilo. 13Ali ni khuukhwiirira limiiku lilyaana ilyo, mu shifwo mweesi beerira isaayilo irusawo bibyoonako n’intsoshe. Isaayilo ili ikhosefu naabi, nashiryo ili ni khuuba iy’omusaayi.

14“Umusaayi ali ni khuubukulakho khu malasile ke saayilo irusawo bibyoonako, akawakhe khu khuru khuulayi, khw’oyo utsya khuwonesebwa. Kakaandi ali ni khuukawakha khu lwaala lukhuumwa lwe kumukhono kumulayi, ni khu lwaala lukhuumwa lwe shikele shiilayi. 15Lwanyuma umusaayi awaambe kamafura ke kuusaala ku olivu, akatsukhe mu shikalabo sheewe she kumukhono kumunyeletsi, 16asiikhemo lulwaala lwe kumukhono kweewe kumulayi, asalaase kimiluundi musaafu ibweeni w’Omukasya. 17Kamafura kakaarama mu shikalabo sheewe, umusaayi ali ni khuukawakha khukhuru khuunyeletsi khw’oyo utsya khuwonesebwa. Kakaandi akawakhe khu lwaala lukhuumwa lwe kumukhono kumulayi, ni khu lwaala lukhuumwa lwe shikele shiilayi. 18Kamafura kakaaramire, umusaayi ali ni khuukawakha khu murwe kw’omuundu uyo. Lwanyuma umusaayi ekoontselele Wele khulw’omuundu uyo. 19Umusaayi ali khuuwaanayo isaayilo irusaawo bibyoonako, khuloombela uyo utsya khuwonesebwa. Nga waamalile, ali ni khukhwiira isaayilo intsoshe. 20Ali ni khuuwaanayo isaayilo intsoshe iyo, ni isaayilo iye bilimwa bibulungule. Musaambo iyo, umusaayi abe waalombeele umuundu uyo, nashiryo aba sashiilikho bunyaalu ta.

21“Ne n’iiba bari umuundu ali umutaambi nga s’anyala waareera bibiindu bino ta, ali ni khuuwaanayo limiiku lilyaana litweela, nga isaayilo irusawo bibyoonako, isi batsya khusuta mu ngaaki. Ali ni khuureererakho khasiintsa khatweela kh’elita iye kamafura ke kuusaala ku olivu, n’ikilo indweela iye buufu buunose naabi, nga baatubaasilemo kamafura. 22Anyala waalooselakho kamawuusi kabili namwe bikuungu bibili, nga waanyalile. Khatweela khaba khe saayilo irusaawo bibyoonako, khakhaandi khaba khe saayilo intsoshe. 23Khu shifukhu shishikhola shinaane, umuundu uyo ali ni khuubiyila isi umusaayi, amulyaango kwe lisari likhosefu. 24Umusaayi ali ni khuuwaamba lisheese lilyaana ilyo lye isaayilo irusawo bibyoonako, ni kamafura keesi bareererekho, abisute angaaki isi Umukasya. 25Lwanyuma ali ni khukhwiira lisheese lilyaana ilyo, nga isaayilo iye khuurusawo bibyoonako. Abukulekho khu malasile ako, awakhekho khukhuru khuulayi khw’omuundu utsya khuwonesebwa. Kakaandi awakhekho khu lwaala lweewe lukhuumwa lwe shikele shiilayi, ni khu lwaala lukhuumwa lwe kumukhono kumulayi. 26Lwanyuma umusaayi awaambe kamafura ke kuusaala ku olivu, akatsukhe mu shikalabo sheewe she kumukhono kumunyeletsi, 27asiikhemo lulwaala lwe kumukhono kweewe kumulayi, asalaase kimiluundi musaafu ibweeni w’Omukasya. 28Kamafura kakaarama mu shikalabo sheewe, umusaayi ali ni khuukawakha khukhuru khuulayi khw’oyo utsya khuwonesebwa. Kakaandi akawakhe khu lwaala lukhuumwa lwe kumukhono kumulayi, ni khu lwaala lukhuumwa lwe shikele shiilayi. 29Kamafura kakaaramire, umusaayi ali ni khuukawakha khu murwe kw’omuundu uyo. Lwanyuma umusaayi ekoontselele Wele khulw’omuundu uyo. 30Lwanyuma umusaayi awaaneyo kamawuusi namwe bikuungu byeesi umuundu uyo areerire, 31nga isaayilo irusawo bibyoonako, namwe intsoshe, atweela ni biwaanwa bye bilimwa biibulungule. Musaambo iyo, umusaayi aloombele umuundu uyo isi Umukasya. 32Bino nibyo biilakilo bibiwaamba khu baandu babaali ni buulwaale bwe lihaafu, ne nga sibanyala bareera biwaanwa bye tsisaayilo tsya busheele ta.”

Nga lukukhu luli khu litikiiyi lye ntsu

33Umukasya waalomela Musa ni Aroni ari, 34“Nga mwoolile khu liloba lye mu Kanaani lyeesi ise intsya khubawa libe nga nilyo buusikha bweenywe, ise inyala naarawo buulwaale bubuuli nga bikhooso, muntsu tsyeenywe. 35Umweene uwe intsu iyo ali ni khuutsya isi umusaayi, amulomele ari, ‘Shibonekha iliwo buulwaale bubukwiile muntsu iwase.’ 36Lwanyuma umusaayi abalakile baruse bibiindu byoosi muntsu iyo, nga ashiili khuutsya khukimenielesa ta. Khulwekhuuba ni balekha khubirusamo ta, buli shitweela kane shibe shekelile shishiilikho bunyaalu. Nio umusaayi akelewo engile muntsu iyo, emenielese. 37Lukukhu luno luluuli khu litikiiyi lye intsu ni luba nga lubonekha nga lubookha, namwe lulimo buubesemu, nga lwengiile mu litikiiyi mukari, 38ali ni khukhwikalawo intsu iyo khuumala biifukhu musaafu. 39Ali ni khuukobolayo muntsu iyo khu shifukhu she kumusaafu, alole abone oba buulwaale ubwo bwaasalaniile khwitikiiyi ilyo, namwe ta. 40-41Ni buba bwaasalaniile muntsu, ali ni khuulakila umuundu khuuwulula litikiiyi, barusemo kamabaale kakaalikho buulwaale ubwo. Lwanyuma bali ni khuukayila bakatsukhe ibulafu we shiriimba, mu shifwo shishiilimo bunyaalu. 42Bali ni khuureera kamabaale kakaandi bare mu litikiiyi ilyo, baliluule bushaakha.

43“Nga baamalile khuurusamo kamabaale ako naluundi nga baamalile khukhwiluula litikiiyi bushaakha, ne buulwaale bwaabonekha luundi, 44umusaayi ali ni khukhwiilayo emenielese luundi. Ni buba bwaasalaniile muntsu, buba bwaakibinile, bweesi bakhanyala baarusamo ta. Nashiryo intsu iyo iba ilimo bunyaalu. 45Ali ni khuulakila bafuniaake intsu iyo, bawaambe kamabaale, ni tsimbaawo, ni lifukhuulu byayo, babiruse ibulafu we shiriimba, babitsukhe mu shifwo shishiilimo bunyaalu. 46Ne uyo yeesi uwingila muntsu iyo nga umusaayi waamalile khuukikala, ali ni khuurama nga ali ni bunyaalu khukhwoolesa angoloobe. 47Uyo yeesi uliila biilyo muntsu iyo, namwe waakonamo, ali ni khuusiinga bikwaaro byeewe.

48“Ne umusaayi naakobola wemenielesa intsu iyo, ne waabona nga buulwaale ubwo sibwaakiibinile lwanyuma lwe khukhwiluula litikiiyi bushaakha ta, ali ni khuuloma ari intsu iyo s’ilimo bunyaalu ta. 49Umusaayi mu khuŋoona intsu iyo nga akirusamo bunyaalu, ali ni khuubukula bunywiinywi bufwiiti bubili, lusaala lwe kuusaala ku kedali, ingubo imbesemu, ni shishiraambisibwa mu khuwa tsiikhabi, engile ni nabyo muntsu iyo. 50Khanywiinywi khatweela ali ni khuukheerira khu soongwe, nga ilimo kameetsi kakaamile mu sebele. 51Awaambe khanywiinywi khakhashiili khaalamu, ni luukhu khukhwaama khu kuusaala ku kedaali, n’ingubo imbesemu, ni shishiraambisibwa khuuwa tsiikhabi, abisanye mu mafuki ke khanywiinywi kheesi bamalile khukhwiira, asalaase muntsu kimiluundi musaafu. 52Musaambo iyo, abe waapyeluusile intsu iyo, nga araambisa kamafuki ke khanywiinywi, ni kameetsi ako, ni khanywiinywi khakhashiili khalamu, ni lusaala lwa kedaali, ni sheesi baraambisa khuuwa tsiikhabi, n’ingubo imbesemu. 53Lwanyuma alekhuule khanywiinywi khakhashiili khaalamu khapururukhe kharure mu shiriimba khatsye. Musaambo iyo, kane abe waalombeele intsu iyo, ibe yaarusibwilekho bunyaalu.”

54Kamakaambila kano kawaamba khu ndwaale nga tsino: Khukhwiyakala, 55buulwaale bwe khu shikwaaro namwe khu ntsu, 56bwe kamabiimba, namwe bikhooso, namwe kamakoontso. 57Likaambila lino liwaamba khu biindu bibiilikho bunyaalu ni bibikhalikho bunyaalu ta.