Swahili Bible2

13

Tsindwaale tsye lihaafu

1Umukasya waaboolela Musa ni Aroni ari, 2“Nga lihaafu ly’omuundu lyookesanisile bikhooso, namwe kamakoontsyo, namwe kamabiimba, bali ni khuumuyila isi umusaayi Aroni, namwe isi mutweela khu basoleeli beewe. 3Umusaayi ali ni khukhwimenielesa ahaandu awo khu lihaafu ly’omuundu uyo. Noola bufuumbo bwe ahaandu e shikhooso awo bweekelile buwaanga, ni buulwaale bubonekha nga bubwingiile naabi mu nyama mukari, iba ndi ali ni buulwaale bwe lihaafu. Nga umusaayi waamalile khumwimenielesa ukhwo, ali ni khuukhalawo ari umuundu uyo alikho bunyaalu.

4“Ne n’iiba bari ahandu awo ekelile awaanga naluundi buulwaale sibweengiile mu nyama mukari ta, naluundi nga bufuumbo sibwekelile buwaanga ta, umusaayi ali ni khuulakila umuundu uyo khuurura mu lituuli, atsye amenye yenyene busa ahandu, khuumala biifukhu musaafu. 5Khu shifukhu she kumusaafu, umusaayi ali ni khuumwimenielesa. Noola buulwaale ubwo sibweloseele khuusalanila khu lihaafu ta, umusaayi ali ni khuumulakila eloosele khuumenya yenyene busa ahandu, khuumala biifukhu musaafu. 6Uri shifukhu she kumusaafu shoola, umusaayi amwimenielese luundi. Noola ahaandu awo aniaalile naluundi buulwaale sibwaasalaniile khu lihaafu ta, umusaayi kane abone ari silili likoontsyo ta, nashiryo, akhalewo ari umuundu uyo s’aalikho buunyaalu ta. 7Ne siinga kamakoontsyo kasalanila khu lihaafu, nga umuundu uyo wamala khaale khukhwiyokesana isi umusaayi, umuundu uyo ali ni khukhwiilayo luundi isi umusaayi. 8Umusaayi ali ni khuumwimenielesa. Noola kamakoontso keloseele khuusalanila khu lihaafu, aba buulwaale bwe lihaafu bwaamuwaambile. Nashiryo umusaayi ali ni khuukhalawo ari umuundu uyo alikho bunyaalu.”

9“Umuundu yeesi ubonekhana nga ali ni buulwaale bwe lihaafu, bali ni khuumuyila isi umusaayi. 10Umusaayi ali ni khuumwimenielesa abone, oba ahaandu awo ekelile awaanga, nga aliwo kamayila, naluundi nga bubwooya bwekelile buwaanga. 11Nga shili shiryo, umusaayi ali ni khuuloma ari, umuundu uyo ali ni buulwaale bwe lihaafu bwaamwibina, nashiryo, umuundu uyo aba alikho bunyaalu. Nashiryo, seshikoombesa khuumulakila khuumenya yenyene busa ahaandu khuumala biifukhu musaafu ta, akhali ndi ali ni khuutsiila ilala ibulafu we lituuli amenyeleyo ilala. 12-13Ne n’iiba bari buulwaale ubwo bwaamala khaale khuuwona, nga tsimbaaso tsyonyene nitsyo tsitsibonekha, umusaayi ali ni khukhwimenielesa umuundu uyo, lwanyuma akhalewo ari uyo s’aalikho bunyaalu ta. 14-15Ne kamakoontso ni kamuwaamba luundi, waakila shikhoba shaba shiwaanga nga mulimo ni kamayila, umusaayi ali ni khukhwimenielesa umuundu uyo, lwanyuma akhalewo ari, umuundu uyo ali ni buulwaale bwe lihaafu. Nashiryo aba alikho bunyaalu.

16-17“Ne siinga kamakoontso kawona, ne shiikhoba shaarama nga shiwaanga, umuundu uyo ali ni khuutsya isi umusaayi amwimenielese. Nashiryo umusaayi akhalewo ari umuundu uyo s’alikho ni buulwaale ta, s’aali ni bunyaalu ta.

18“Umuundu n’aba bari waabakho ni libiimba ne lyaawona, 19ne lwanyuma ahaandu awo akelawo abiimba, namwe afwaana uri aliwo kamayila, ali ni khuutsya isi umusaayi. 20Umusaayi ali ni khuumwimenielesa. N’iiba bari buulwaale bwaayingila mu nyama mukari, naluundi bubwooya bwaayikela buwaanga, umusaayi ali ni khuukhalawo ari umuundu uyo ali ni buulwaale bwe lihaafu. Buba bwaasalaniile khukhwaamila isi libiimba lyaba. 21Nga umusaayi waamalile khukhwimenielesa, ne waanyoola ari bubwooya mu shifwo isho sibuli buwaanga ta, naluundi buulwaale sibweengiile mu nyama ta, ne buli khu ngaaki busa, umuundu uyo ali ni khuutsya ahandu amenye yenyene iyo busa, khuumala biifukhu musaafu. 22Ne buulwaale ubwo ni busalanila khu lihaafu lyeewe, aba ali umutsiina, nashiryo umusaayi ali ni khuukhalawo ari umuundu uyo ali ni bunyaalu. 23Ne ni burama mu shifwo shitweela, bwaalekha khusalanila ta, iyo iba busa lubaaso lwe libiimba. Nashiryo umusaayi ali ni khuukhalawo ari uyo s’aalikho bunyaalu ta.

24“Nga kumulilo kwooshile umuundu, ne esi kumwookhile ekyela alwaale, nga afwaana aliwo kamayila, 25umusaayi ali ni khukhwimenielesa shiifwo isho. Nga bubwooya bwe mu shifwo isho bwekyelile buwaanga, naluundi abonekha nga engila naabi mu nyama, ubwo buba buulwaale bwe lihaafu. Buba bwaabonekheele musi kumulilo kumwooshile. Umusaayi ali ni khuuloma ari umuundu uyo ali ni bunyaalu. 26Ne nga umusaayi wamenielesile ne waanyoola nga bubwooya bwe mu shifwo isho sibuli buwaanga ta, naluundi mulwaale umwo simwengiile naabi mu nyama ta, ne nga muli khu ngaaki busa, umusaayi ali ni khuumulomela khuutsya ahandu isi amenya yenyene busa khuumala biifukhu musaafu. 27Lwanyuma lwe biifukhu musaafu, umusaayi ali ni khuumwimenielesa luundi, abone. Ni buba bari bwamalataane lihaafu lyoosi, aba ali ni buulwaale bwe lihaafu. 28Ne ni burama mu shifwo shitweela bwaalekha khusalanila khu lihaafu ta, nga buli khu ngaaki busa, liba libiimba lilikwiilewo khulwe khuusha kumulilo. Ulwo luba busa luubaaso lulwamiile mu khuusha kumulilo, nashiryo, umusaayi ali ni khuuloma ari umuundu uyo s’aalikho bunyaalu ta.

29“Umuundu n’aaba nga ali ni likoontsyo khu murwe namwe khu shilefu, 30umusaayi ali ni khuumwimenielesa abone. Nga buulwaale ubwo bwiingila mu nyama mukari, naluundi nga litsuune namwe bunwaanwa bwaakhalikhile, bulikho buwa mu shifwo isho, naluundi nga burandaara, ni shiifwo nga shaakala, ubwo buba buulwaale bwe lihaafu. Umusaayi ali ni khuuloma ari umuundu uyo alikho bunyaalu. 31Nga Umusaayi waamalile khukhwimenielesa khukhwaakala ukhwo, ne khwaabonekha nga khutsya naabi mu nyama, nga mbaawo litsuune ni bunwaanwa buumali ta, umusaayi ali ni khuulakila umuundu uyo khuutsya ahaandu isi aba yenyene busa, khuumala biifukhu musaafu. 32Lwanyuma khu shifukhu she kumusaafu, amwimenielese luundi. Khukhwaakala ukhwo ni khuba nga sikhwaasalaniile ta, ni litsuune namwe bunwaanwa sibuli burandaafu ta, nga buulwaale buno buli khu lihaafu khu ngaaki busa, 33ali ni khuubekakho litsuune ilyo, namwe bunwaanwa ubwo. Ne nga mu shifwo mwaakala, s’aabekakho litsuune namwe bunwaanwa ta. Umusaayi ali ni khuulomela umuundu uyo khuutsya khumenya ahaandu yenyene busa, khuumala biifukhu bibiindi musaafu. 34Khu shifukhu she kumusaafu, umusaayi ali khukhwimenielesa shifwo shishaakala isho. Nga khukhwaakala sikhweloseele khuubalaaha, naluundi nga buulwaale ubwo sibweengiile mu nyama mukari ta, umusaayi ali ni khuuloma ari umuundu uyo s’aalikho bunyaalu ta. Nashiryo, atsya waasiinga bikwaaro byeewe. 35Ne siinga lwanyuma lw’omusaayi khuuloma ari umuundu uyo s’aali ni bunyaalu ta, ne bwaakelawo bwaasalanila khu lihaafu lyeewe, 36umusaayi ali ni khuumwimenielesa luundi. Ni buba bari bwaasalaniile, umuundu uyo aba alikho bunyaalu. 37Ne umusaayi n’akhalawo ari khukhwiyakala khuno sikhwelooseele ta, ni litsuune limali namwe bunwaanwa bwaarurire ahaandu awo, umuundu uyo aba s’aali ni bunyaalu ta.

38“Nga umuundu ali ni bikhooso biwaanga khu lihaafu, 39umusaayi ali ni khuumwimenielesa. Ni byookesanisa nga sibilimo kamayila ta, ne nga bikhooso busa, umusaayi ali ni khuuloma ari umuundu uyo s’aalikho bunyaalu ta.

40-41“Umuundu nga shishoole shaamulya ahaandu oosi khu murwe, aba s’aalikho ni bunyaalu ta. 42Ne n’ibawo khakhooso khakhafwaana nga khakhaalimo kamayila khu shoole, namwe mu bweeni, shimanyisa shiri umuundu uyo aba waafunile buulwaale bwe lihaafu.” 43Umusaayi ali ni khuumwimenielesa. N’iiba bari shili shituufu, 44umusaayi ali ni khuuloma ari uyo alikho bunyaalu.

45Umuundu yeesi uuli ni buulwaale bwe lihaafu, ali ni khuukwaara bikwaaro biitabukhake khukhwookesanisa kumutaambo, alekhe litsuune lyeewe nga lyaasakalaale busa, naluundi ali ni khuufuna sheesi abiimba khu munwa, nga akeenda aloma ari, “Ise ndikho bunyaalu! Ise ndikho bunyaalu!” 46Khukhwaama umuundu uyo n’aaba nga ashiili ni buulwaale ubwo, aba ashiilikho bunyaalu. Nashiryo ali ni khuumenya yenyene busa, ibulafu we kaambi.

47-48Nga iliwo lukukhu mu shikwaaro, oba shili sha saambo shiina, 49ne khukhwaama ni bwabonekhelamo, buba buli buulwaale bwe lihaafu, nashiryo bali ni khuushookesa umusaayi. 50Umusaayi ali ni khukhwimenielesa buulwaale ubwo, lwanyuma abiikhe shikwaaro isho khuumala biifukhu musaafu. 51Khu shifukhu she kumusaafu ali ni khuushimenielesa luundi. Nga buulwaale ubwo bwaasalaniile mu shikwaaro isho, shiba shawaambile lukukhu, shiba shilikho bunyaalu. 52Shikwaaro isho, oba shili sha saambo shiina, ali ni khuushoosha.

53Ne umusaayi nga waashimenielesile, ne waabona ari lukukhu ulwo silwasalaniile mu shikwaaro isho ta, 54ali ni khuulakila bashisiinge, lwanyuma ashibiikhe khuumala biifukhu bibiindi musaafu. 55Umusaayi ali ni khuukhwimenielesa shikwaaro tsana luundi, nga baamalile khuushisiinga. Niiba bari shiifwo sheesi shibeelemo sishashuukhilekho iraangi ta, ikhaaba nga lukukhu silwasalaniile ta, ne shiba nga shilikho bunyaalu. Shifwo isho oba shili ibweeni namwe imukoongo we shikwaaro isho, umusaayi ali ni khuushoosha.

56Ne nga lwanyuma lwe khuushisiinga, umusaayi waashimenielesile waaboone ari shiifwo shaamiliilekho, ali ni khuutyenuula shifwo isho ashiruse khu ngubo iyo. 57Ne lwanyuma ni lubonekhela mu shikwaaro isho luundi, buba bulikho busalanila. Umusaayi ali ni khukhwoosha shikwaaro isho. 58Ikhaba nga lwanyuma lwe khuusiinga shiifwo isho shaaweelewo, ne shikwaaro isho shili ni khuusiingibwa kumuluundi kukuukhola khabili, nio akile shiikele shishikhalikho bunyaalu ta.

59Bino nibyo biilakilo bibiwaamba khu khukhalawo oba shikwaaro shilimo bunyaalu namwe ta, lwanyuma lwe khuubonekha nga shookesana lukukhu.