Swahili Bible2

9

Babaandu be Gibiyoni bawombesa Yoswa

1Bayiinga boosi be khu lubeka lwe bukwanyaanga wa Yorudaani baawulila isaambo isi ba Isiraeli baawulamo kamanaambo kakaandi. Bayiinga bano baaba be kamanaambo kakaaba mu ngoongo, ni mu bikoongo nga nibo baaba bayiinga be ba Hiiti, ni ba Amori, ni ba Kanani, atweela ni ba Perizi, ni ba Hiivi, ni ba Yebusi, ni naako kakaaba khu ndulo khwe nyaantsa imboofu Meditereniani, ni khuuniina ingaaki khukhwoola i Lebanoni. 2Bano boosi beetsa atweela baatubaana nio banyale khuusoolanisa Yoswa ni ba Isiraeli boosi.

3Babaandu be Gibiyoni nabo baawulila ibyo byeesi Yoswa aakhola i Yeriko ni Ai. 4Isho shaakila baakhalawo khuurumana babaandu baabwe khuutsya isi ba Isiraeli bewombese bari baama mu linaambo lye aleeyi naabi. 5Baatsya nga baakwaarire tsingubo tsikhale luundi tsindabukhake, ni busapatu mu bikyele bubwakora naabi. Ni kimikaati kyeesi baasuta kyaba kyaayoma naluundi nga kyaakhupa ni lukukhu. 6Kila batsya isi ba Isiraeli baabuusanila i Gilugaali, baalomela Yoswa ni babaandu ba Isiraeli boosi bari, “Ifwe khweetsile nga khwaama mu linaambo lye aleeyi naabi. Nashiryo khubaloomba mukhole ikwangwaani ni nafwe.”

79.7: Luky 23.32; 34.12; Maka 7.2Ba Isiraeli nabo baabeelamo bari, “Inywe munyala mwaaba nga mumenya aambi ano ni nafwe. Ifwe khunyala khuryeena khwaakhola ikwangwaani ni nanywe?”

8Babaandu be Gibiyoni bano nabo beelamo bari, “Ifwe khuli babaakaanisi beenywe.”

Yoswa waabareeba ari, “Inywe muli banaanu? Ate naluundi inywe mwaamila waheena?”

9Nabo beelamo bari, “Ifwe khwaamile mu linaambo liliili lye aleeyi naabi. Khwaawulilakho byoosi byeesi Umukasya Wele weenywe aakhola mu shibala she Misiri 109.10: Bala 21.21-35ni khuutubakho ibyo byoosi byeesi aakhola khu bayiinga baabili be ba Amori, nga nibo umuyiinga Ogo, uwaba amenya i Ashitarosi, ni Sihoni umuyiinga we Heshiboni, babaaba khu lubeka lwe bwaamanyaanga wa Yorudaani. 11Baryo baaraangilisi beefwe na buli muundu yeesi umenya mu shibala sheefwe, bakhurumaane bari khwiitse khubakaanane. Lwanyuma khubaboolele khuri ifwe khuli babaakaanisi beenywe, nashiryo ni mukhole ikwangwaani ni nafwe. 12Ni mubone ni kimikaati kino kikyoomile luundi kyaakhupa lukukhu. Nga ni khwarakikha lukyeendo khukhwiitsa ino, kyaba kimikhafu. Ne ari bona nga ni kifwaana. 13Tsisutilo tseefwe tse viini tsaba tsishaakha, ne ari bonakho nga ni tsifwaana! Ni tsingubo tseefwe ni tsisapatu ari bona byaayonuukhaka, lwekhuuba ifwe khwakyeendile lukyeendo luleeyi naabi.”

14Babaandu ba Isiraeli baafukiilisakho biilyo byaabwe bilala, ne ndi sibaamala khukhwireebakho isi Umukasya ta. 15Aryo Yoswa waafukiilila khuukhola ikwangwaani iye buusaale ni babaandu be Gibiyoni, era waabalomela ari ba Isiraeli sibatsya khubeeraka ta. Baaraangilisi be ba Isiraeli baabetsubila na khubetsubila khukhwoolelesa ikwangwaani iyo.

16Lwanyuma lwe biifukhu bitaru nga ikwangwaani iyo yaaweele khuukholebwa ni babaandu be Gibiyoni, ba Isiraeli baawulila bari babaandu bano baaba babesanwa baabwe, naluundi nga babaamenyamwo. 17Baryo ba Isiraeli baarakikha luundi lukyeendo khuutsya, ne lwanyuma lwe biifukhu bitaru, boola mu biriimba bye ba Gibiyoni nga nibyo Gibiyoni, Kefira, Berosi, ni Kiriyasi Jeyarimu. 18Ne ba Isiraeli sibebwakala biriimba ibyo ta, lwekhuuba baaraangilisi baabwe baaba betsubiile mu lisiina ly’Omukasya, Wele wa Isiraeli bari singene babaakholekho buubi ta.

Ba Isiraeli babaaramile beluŋuunyila baaraangilisi baabwe bari lwashiina baabikhola baryo. 19Ne baaraangilisi baabeelamo bari, “Ifwe khwakholile shishitsubo mu lisiina ly’Omukasya, Wele wa Isiraeli. Nashiryo ifwe sikhunyala khwaabawaambakho ari ta. 20Sheesi khunakhola nisho ndi khwaakha khuubalekha baakhumenyamwo lwe shishitsubo sheefwe, lwekhuuba ni khulekha khushoolelesa ta, Wele akhuwa shitaambiso. 21Nashiryo khakhubalekhe, ne khuurusakho kane babaatsake babaakhuremela kimisaala, ni khuusutila babaandu beefwe kameetsi.” Baryo baaliinda shisuubiso she baaraangilisi.

22Lwanyuma Yoswa waalakiilisa baaraangilisi be ba Gibiyoni khukhwiitsa khuumubona, waabareeba ari, “Lwashiina inywe mwakhuwombesa ifwe nga muloma muri mwaama mu shibala she aleeyi naabi, ate nga ilala mumenya aambi ano? 23Ari lwashino inywe mutsya khumenya mu shitsubo. Babaandu beenywe ari kane babaatsake nga nibo baakulwa beefwe babaakhuremela kimisaala, ni khuusuta kameetsi ke shiifwo shikhosefu sha Wele.”

24Nabo beelamo Yoswa bari, “Ifwe khwaba khwaawulila buulayi, isaambo isi Umukasya Wele weenywe aalomela umwakaanisi weewe Musa ari atsya khubawa shibala shino shoosi. Naluundi ni khuuhesa babaandu babaamenya muno boosi. Isho shaakila ifwe khwaabarya naabi nga khumanya khuri mutsya khukhwiira, shikila khwewoombesa isi muli, khwaabaloomba khuukhola ikwangwaani iye lukoosi. 25Ne bona ari, ifwe fweesi khuli mu makhono keenywe, munyala khuukhola shishiindu shoosi sheesi mubona muri shilayi luundi sheesi mukana.”

26Yoswa naye waashikhola aryo, waakhiinga ba Gibiyoni, waalekha khufukiilila ba Isiraeli khuubeeraka ta. 27Ne khu mbuka nyene, waalomela ba Gibiyoni ari batsya khuuba babaakaanisi be ba Isiraeli, nga nibo babaremela kimisaala, ni khuubasutila kameetsi, khuukareera isi shiifwo shikhosefu sh’Omukasya, nga nisho isi babaandu baaba bali ni khukhwisaayila Umukasya. Ba Gibiyoni bashiikhola kumulimo kweene ukwo khukhwoolesa ni shaleelo shino.