Swahili Bible2

8

Ba Isiraeli bawaamba, naluundi boonakisa Ai

1Lwanyuma Umukasya waalomela Yoswa ari, “Ukharya ta, luundi ukhawamo kamaani ta. Ari yinyukha uyile baselikhale boowo, mutsye mwibwakale Ai. Khu luno indi khuutsya khubawa buunyali khuuwula umuyiinga we Ai, ni liiye lyeewe lyoosi, lwanyuma muwaambe shiriimba, ni linaambo ilyo kane libe lilyeenywe. 2Muli ni khuukhola shiriimba Ai n’umuyiinga washo isho sheesi mwakhola khu Yeriko. Khuurusakho khu luno, munyala mweyilila bibyaayo ni bibiindu bibiindi byeesi mukana. Ari yirekekha mutsye mwibwakale shiriimba nga mushaamila inyuma washo.”

3Aryo Yoswa ni baselikhale beewe beerekekha khaangu khuutsya khwibwakala Ai. Waarobolayo baselikhale babafuurayo buulayi kimikaanda kitaru (30,000), waabarumana khuutsya mu shilo 4nga abawa biilakilo bino; “Ni murekeerese buulayi. Ni mutsye mwiibise inyuma we shiriimba, ne ikhaba aleeyi naabi ni nasho ta. Ne mubone muri mbaawo umuundu yeesi ubabona ta, ne mube nga mweerekekhele khuushibwakala. 5Ari nio ise ni baselikhale beesi ndi nabo khutsye khwoole khu shiriimba. Ne ni kane babe nga barura khukhwiitsa khuukhuwoona ifwe, nga ni baakhola makiboole, ifwe kane khwiilukhe khutsye. 6Nabo baryo kane bakhuloondekho, khukhwoolesa nafwe ni kane khuboolese aleeyikho naabi ni shiriimba shaabwe. Lwekhuuba kane bambaase bari bali khuukhuwoona ifwe nga ni baakhola makiboole. Nashiryo ifwe nga khwaakilile baarurire ibulafu, 7inywe mwinyukhe murure isi mwibisile, mutsye muyile shiriimba. Umukasya Wele weefwe ali khuukhuyeeta khuuyila shiriimba shino. 8Nga mwaamalile khuushibwakala, mushiwaambisekho kumulilo, nga Umukasya n’akhulakiile khuukhola. Ibyo nibyo biilakilo byeesi imbawa.”

9Aryo Yoswa waabasiibula baatsya. Nabo baryo baatsya boola mu shifwo shishiili i bukwanyaanga wa Ai, akari a Ai ni Beseli, beebisa abweene awo, nga baaliindiilila khukhwibwakala. Ne Yoswa niye shiilo isho waarama atweela ni babaandu baabusheele, isi baaba bali khuuwolela.

10Yoswa waawuuna naabi kumutikhinyi, waalaanga atweela baselikhale beewe. Lwanyuma niye ni baaraangilisi be ba Isiraeli baakhuumba baatsya boola i Ai. 11Baselikhale babaaba ni naye, baatsya beereka isi banyala khuubonela shiriimba buulayi iburaangisi washo. Baryo baabuusanila ingaaki washo, ne nga aliwo litila akari aabwe ni Ai. 12Yoswa aaba waamalile khaale khuusiindikhayo baselikhale bikana biraano (5,000), khuutsya beebise aambi ni shiriimba ibwaamanyaanga washo, akari a Beseli ni Ai, nga berekekhela khuushibwakala. 13Khu mbuka yino, baselikhale beewe boosi baaba nga beerekekhile. Batweela khu baselikhale beewe baaba nga bali ingaaki we shiriimba Ai, ni babaandi nga beebisile ibukwanyaanga washo, nga baaliindiliile busa khukhwibwakala. Ne Yoswa umweene weekha khuukonela mwitila.

14Umuyiinga we Ai n’abona liiye lya Yoswa, waakholaka khaangu khuubona ari arura kumutikhinyi ikwo, khuutsya khubasoolanisa mu shifwo shishilolelaniile ni Litila lya Yorudaani. Umuyiinga aaba waakhushimanyakho ari, baselikhale babaandi baaba beerekile inyuma we shiriimba khuushibwakala ta. 15Yoswa ni baselikhale beewe bekholisaka nga babaali khukhwilukha, baryo baatima baatsya nga balola kwe kumubiimbi iyo. 16Kila umuyiinga we Ai akuukuula babaandu boosi khuurura ibulafu baloonde khu liiye lya Yoswa. Baryo baawombesebwa khuurura mu shiriimba, baayilibwa aleeyikho. 17Mbaawo umusaani na mutweela uwarama mu shiriimba Ai ta. Ne boosi baarura khuutimisa ba Isiraeli, baalekha ni bilibwa bye shiriimba nga bili khwaashe busa.

18Lwanyuma Umukasya waalomela Yoswa ari, “Yokyeselela lifumo lyoowo isi shiriimba Ai, lwekhuuba ari ndi khuushiwaanayo mu makhono koowo ushiwule.” Yoswa naye waakhola nga Umukasya n’amulomela khuukhola. 19Khaangukho baselikhale babaaba beebisile benyukhilamo, baatsya benjila shiriimba baashiwaamba, baashiwaambisakho kumulilo.

20Ne basaani be Ai ni beeshebukha, baabona lisuusi nga liniina mu ngaaki. Nibo baalekha khubonakho kumukhoosi kwoosi kwe khukhwilukhilakho, khuutsya iyi namwe iyi ta, lwekhuuba baselikhale beesi baaba nga batimisa, baashuukha ndi baabasoolanisa. 21Shino shaba shiryo lwekhuuba, Yoswa ni baselikhale beesi aaba nabo ni baabona nga baselikhale babaarama inyuma bawaambile shiriimba, ni lisuusi nga lilikho liniina mu ngaaki, nibo baashuukha busa khuukobola, baarakikha khukhwiiraka busa basaani be Ai. 22Baselikhale ba Isiraeli babaaba bebwakalile shiriimba nabo baarura, betubaasa khu bashaabwe, bawaambilisila basaani be Ai khukari, babeeraka boosi. Mbaawo umuundu na mutweela khu nibo uwawona, namwe waarama nga mulamu ta. 23Ne bawaamba busa umuyiinga we Ai, baamuyila isi Yoswa nga mulamu.

24Ba Isiraeli beeraka basaani boosi be Ai, nga bali mukyeewa iyo ni mu mubiimbi isi baakanaanila. Isho ni baashimala, lwanyuma baakobolayo mu shiriimba Ai, beera buli muundu yeesi uwashibamo. 25Babaandu baboola kumukaanda mutweela ni bikana bibili (12,000) babaaba babeekhali be mu Ai boosi, nibo babeeribwa khu shifukhu isho. 26Lwekhuuba Yoswa aarama nga wokyeseleele lifumo lyeewe khu Ai, khukhwoolesa babaandu boosi ni beeribwa. 27Ne akhali ndi ba Isiraeli beyilila bibyaayo, ni bye buyiindifu bibiindi bibyaba bye babaandu be Ai. Khu luno baashikhola baryo lwekhuuba Umukasya aaba waalomeele Yoswa ari bashikhole.

28Yoswa aabonela ilala ari buli shiindu shoosi baamalile khuushoosha ni kumulilo, nga shaaramile kamaayilo busa. Byoosi bishiili biryo ni khukhwoolesa shaleelo. 29Aryo waamala waasuunga umuyiinga we Ai khu kuusaala, waalekha kumulaambo kweewe khuurama khu bweenekhwo khukhwoolesa angoloobe. Inyaanga ni yaba nga itsya khukwa, Yoswa waalakila babaandu khuurusa kumulaambo ukwo khukhwaama khu kuusaala, bakutuume khu shilibwa she shiriimba, bamale bakubiimbekho ni kamabaale. Ni kutuumi kwe kamabaale ako kushiiliwo ni shaleelo, ni shiriimba isho shaakhwombekhebwakho luundi ta.

Indakaano yiisibwa bushaakha khu lukiingi Ebali

308.30: Maka 27.2-8Lwanyuma Yoswa wombekhela Umukasya Wele wa Isiraeli shisheeso khu lukiingi Ebali. 318.31: Luky 20.25Shisheeso shino aashoombekha, nga asintsiila khu bilakilo byeesi Musa umwakaanisi w’Omukasya aawa ba Isiraeli. Musa aabalakila nga ni sharonebwa mu makaambila shiri, “Nimwombekhe shisheeso she khuuwaanilakho biwaanwa isi Umukasya, nga muraambisa kamabaale kakaakhali kamabeetse ni bibyuuma ta.” 32Abweene awo nga ba Isiraeli boosi baloleleele, Yoswa aareera kamakaambila keesi Musa aabawa, waakarona khu sheeso. 338.33: Maka 11.29; 27.11-14Babaandu ba Isiraeli boosi, ni babaandu babaaba bakyeni mu nibo, atweela ni baaraangilisi baabwe, ni baakhulu babaandi atweela ni baakayi baabwe, beemikha khu mbeka tsibili tse Sanduuku iye Kamakaambila y’Omukasya. Shisiintsa she babaandu shitweela sheemikha khu lubeka lwe lukiingi Gerizimu, ni shisiintsa shishiindi sheemikha khu lubeka lwe lukiingi Ebali, ni basaayi khukhwaama mu shikuuka sha Levi nga beemikhile khukari nga baasutile Isanduuku iye Kamakaambila. Musa umwakaanisi w’Omukasya aaba waabalakila ari batsye Mwitila lino, mweesi beetsa khuufunila tsikhabi. 34Lwanyuma Yoswa waasoma bilomo bye mu makaambila, mumwabamo bilomo bye tsikhabi ni bye bitsubo, nga ni byaba byaaronebwa mu shitabo she Kamakaambila. 35Buli ilomo yoosi isi Musa aarona mu makaambila, Yoswa aakisomela babaandu ba Isiraeli babaaba baabuusaane, mumwabamo ni babaana atweela ni babaandu bakyeni babaaba babaamenyamwo.