Swahili Bible2

7

Akani aminyaalila Umukasya

1Babaandu ba Isiraeli baamiinyaalila shilakilo sh’Omukasya shishaloma shiri, bibiindu byoosi bye mu Yeriko byaba bye khuwaanibwayo isi niye. Aabawo umusaani mutweela lisiina lyeewe bari Akani, umwaana wa Karimi, umwitsukhulu wa Zabudi, uwe munda ya Zera, mu shikuuka sha Yuda, niye uwaminyaalila shilakilo shino, weyilila bibiindu bilala khukhwaama mu Yeriko. Isho shaakila Umukasya waakhalalila babaandu ba Isiraeli boosi.

2Nga ba Isiraeli bashiili i Yeriko, Yoswa waarumana basaani babaandi khuutsya mu shiriimba Ai, shishaba ibwaamanyaanga wa Beseri, aambi ni Besi Aveni. Aabawa biilakilo bino nga aloma ari, “Ni mutsye mwimenielese shibala isho.” Baryo basaani abo baatsya beemenielesa Ai. 3Lwanyuma baakobola baaboolela Yoswa bari, “Sishikhukanisa khukhwakaanisayo liiye lyoosi ta. Rumanayo busa liiye lilyoola basaani nga bikana bibili (2,000), namwe bitaru byonyene (3,000), kane bamale. Lwekhuuba mu shiriimba isho mulimo babaandu bakyeekhe bari.”

4Aryo Yoswa waarumanayo basaani baboola nga bikana bitaru (3,000), ne basaani be Ai baabakhaasisa nga babasoolanisa, 5baabatimisa khukhwaama khu shilibwa she shiriimba, baaboolesa isi bakhupakila kamabaale khu mwiikha kwe lukiingi, baabeeramo basaani baboola nga kamakhumi kataru na basesaba. Lwashino ba Isiraeli baarya naabi nga baaweelemo kamaani.

6Lwanyuma Yoswa atweela ni baaraangilisi be ba Isiraeli babaandi boonuulaka bikwaaro byaabwe, betsukhakakho lifukhuulu khu mirwe kyaabwe, lwe khukhwookesanisa kumutaambo kumukali. Baakona aasi iburaangisi we Sanduuku iye Kamakaambila, khukhwoolesa antsye ni bwelabula. 7Kila Yoswa aloma ari, “O Umukasya Umukhulu! Iwe wakhwaambusa ifwe luluutsi Yorudaani nio uri ba Amori bakhwiire bakhumalewo? Shino sishaandikholikhile shiryo ta, ifwe khuuba nga khukhwafukiilisana khuurama shanjelekha wa Yorudaani! 8O Umukasya, ari ise inome ndi shiina? Bona baasiku baatimisile liiye lye ba Isiraeli, lyaakoboole ano. 9Ni babekhali be mu Kanani, ni babaandu babaandi babaamenya mu shisiintsa shino kane babusane, beetse bakhwibotokhelele bakhuhese ifwe, bakhumalilewo ilala. Ari iwe unakhola uryeena khukhwookesanisa buukhulu bwe lisiina lyoowo?”

10Umukasya weelamo Yoswa ari, “Yinyukha aasi! Lwashiina mukwiile aasi muryo? 11Ba Isiraeli boonakile. Nibo baaminyaaliile indakaano isi nabalakila khuuliinda. Nibo beyiliile bitweela khu biindu bibyaba bye khuuwaanibwayo. Beebile bibiindu baabibisile, naluundi baawombesile. 12Bibiindu byeesi beebile, abe nibyo bye khuuhesebwa, ne ari nibo babeene baashuusa kimikoongo kyaabwe baakilosa isi baasiku baabwe nio babahese nibo. Nashiryo ise singene imbayeete luundi ta, khuurusakho nga mwaahesile bibiindu bibiili akari musiinywe, abe byeesi mukhaakhila khuusuta ta. 13Yinyukha aasi! Tsya uboolele babaandu, bekhosese khukhwirekekhela khukhuuntsakanana ise, Umukasya Wele weenywe, kumukaamba. N’utsye ubaboolele uri, Umukasya Wele aloma ari, ‘Inywe ba Isiraeli, mwaayila bibiindu abe bibyaba bye khuuhesebwa. Isho shaakila inywe mwaalekha khunyalisa khuusoolanisa baasiku beenywe ta, khukhwoolesa ni munabirusamo.’ 14Nashiryo baboolele boosi kumukaamba beetse mu shifwo shitweela. Kane buli baandu beetsile mu bikuuka byaabwe, abweene awo, Umukasya arobolemo shikuuka shiina shishiilikho buwaangafu. Lwanyuma beetsile mu bikuuka bikyeekhe bye mu shikuuka isho, Umukasya kane arobolemo shikuuka shikyeekhe shiina shishiilikho buwaangafu. Indi ndi lwanyuma beetsile mu tsiingo tsitsiili mu shikuuka shikyeekhe isho, Umukasya arobolemo muungo shiina mumulimo shihaangafu. Ni muungo umwo beetse umuundu khu muundu. 15Ni abweene awo Umukasya kane okyese umuundu shiina. Umuundu uyo uuli ni bibiindu ibyo, aakha khukhwiiribwa, ni kumulaambo kweewe bakwooshe ni kumulilo, khuuyilila atweela ni neebyo byoosi abe byeesi ali nabyo. Lwekhuuba umuundu uyo waaminyaalila indakaano ikhosefu y’Omukasya isi aakhola ni ba Isiraeli.”

16Ni bwasha kumutikhinyi mu mamilimili, Yoswa waabuusanisa bikuuka byoosi mu shifwo shitweela, Umukasya wokyesa ari shikuuka sha Yuda nisho she shihangafu. 17Lwanyuma Yoswa waareera bikuuka bikyeekhe bibiili mu Yuda, Umukasya wokyesa ari shikuuka sha Zera nisho she shihaangafu. Lwanyuma baareera shitweelatweela khukhwaama mu shikuuka shino sha Zera, Umukasya wokyesa ari muungo mwa Zabudi nimwo mwe shihaangafu. 18Lwanyuma lwa byoosi, be muungo mwa Zabudi ni beetsa mutweela tweela, Umukasya wokyesa ari Akani niye uwabakho shihaangafu.

19Kila Yoswa alomela Akani ari, “Mwaana wase, ngana ukanikhe bwaŋali, uweese Umukasya Wele wa Isiraeli shiriifwa. Ari ngana umboolele, shiina shisheene sheesi wakholile? Ukhaambisabisakho shishiindu shoosi ta.”

20Akani naye weelamo ari, “Shili shaŋali. Ise naayonaka, naluundi naminyaalila Umukasya Wele wa Isiraeli. Ari shino nisho sheesi nakhola: 21Mu biindu byeesi khwawaamba, naabonamo shikwaaro she ba Babulooni, shishaba shiimiliwu naabi, ni bisiintsa bye feetsa bitoondo bibili, ni shipaande she Zaabu nga shoolamo bisiintsa bye zaabu kamakhumi karaano. Indyo naabikoomba naabi shaakila naabiyila. Nalima lilowo aasi mu lisari lyase, naabisamo ifeetsa iyo ni zaabu iyo, ni shikwaaro sheene.”

22Lwanyuma Yoswa waarumana baarume babaatima baatsya mu lisari lya Akani, baanyoolamo ifeetsa, ni zaabu, ni shikwaaro. 23Baabireera isi Yoswa ni ba Isiraeli boosi, baabira iburaangisi we Sanduuku iye Kamakaambila, isi buli mutweela anyala khuubonela. 24Aryo Yoswa ni ba Isiraeli boosi baawaamba Akani umwaana wa Zera, baamuyila mu Litila lye Biwaangafu, atweela ni bibiindu byeesi aaba waayiba ibyo, khuutubaasakho ni basooleli beewe, ni bakhaana, ni tsikhaafu, ni tsisikilya, ni kamasheese, ni lisari lyeewe, na buli shiindu shoosi shishaba shisheewe.

25Kila Yoswa aloma ari, “Akani, lwashiina iwe wakhureerere shitaambiso shishifwaana shiryo? Shaleelo shino Umukasya naye ali khuukhuwa iwe shitaambiso.”

Babaandu ba Isiraeli baamukhupa kamabaale, niye ni be muungo mweewe boosi. Baasa kumulilo boosha kimilaambo kyaabwe, atweela ni bibiindu byeesi Akani eeba, khuutubaasakho ni bibiindu byeewe byoosi. 26Baamubuusakho kamabaale kamaboofu kameene, kakaashiiliwo khukhwoolesa ni shaleelo shino. Ni abweene awo, Umukasya waakamisa lirima lyeewe isi ba Isiraeli.

Iyo niyo isaambo isi shiifwo isho shalaangibwamo bari Litila lye Biwaangafu.