Swahili Bible2

6

Khuukwa khwe shiriimba Yeriko

1Babaandu be mu Yeriko beekalakawo biilibwa bye shiriimba shaabwe lwe khuurya ba Isiraeli. Abe mbaawo umuundu ururamo namwe uwiinjilamo ta.

2Umukasya waalomela Yoswa ari, “Ari bona ndi khuuwaanayo Yeriko mu makhono koowo, khuuyilila atweela n’umuyiinga wamwo, ni baselikhale baabwe be kamaani. 3Iwe wamweene atweela ni baselikhale boowo nga beesabikhile bye buusoolo byaabwe, mwaakha mukhuumbe khukhwibotokhelela shiriimba kumuluundi mutweela buli shifukhu. Mukholatsake muryo khuumala biifukhu bisesaba. 4Ni basaayi musaafu batsye nga baasutile tsikhoombi, iburaangisi we Sanduuku iye Kamakaambila. Ne khu shifukhu she kumusaafu, mwaakha mukhuumbe khukhwibotokhelela shiriimba isho mbola busa, khuumala kimiluundi musaafu, nga basaayi tsana bali khuufuura tsikhoombi. 5Ne lwanyuma nga baafuurireyo tsikhoombi tsaabwe kumuluundi mutweela ni kamaani keene, babaandu boosi balookhe luukali lweene. Ni neesho shikile litikiiyi lye shiriimba likwe aasi, ni baselikhale beenywe baakha benjile burereefu mu shiriimba.”

6Aryo Yoswa umwaana wa Nuni walaanga basaayi atweela, waabalomela ari, “Ni musute Isanduuku iye Kamakaambila, mwirusemo basaayi musaafu, basute tsikhoombi, batsye nga bakhuumba iburaangisi wayo.” 7Lwanyuma waalakila babaandu ari, “Yinyukhilamo! Ni mukhuumbe khukhwibotokhelela Yeriko mbola busa, nga baselikhale babesabikhile bye buusoolo baaraangiile iburaangisi we Sanduuku iye Kamakaambila y’Omukasya.”

8Nga Yoswa waamalile khuulakila babaandu aryo, basaayi musaafu babaasutile tsikhoombi baaraangila, nga bafuura tsikhoombi tsaabwe. Ni babaasutile Isanduuku iye Kamakaambila y’Omukasya baabaloondakho. 9Ni baselikhale babesabikhile bye buusoolo baaraangila iburaangisi we basaayi babaaba bafuura tsikhoombi, ni baselikhale babaarama inyuma baaloonda khu Sanduuku iye Kamakaambila. Khu mbuka yino yoosi baaba balikho bafuura tsikhoombi. 10Ne Yoswa aaba waalakiile babaandu ari, “Mukhalookhakho ta, namwe mukhalomakho ilomo yoosi ta, khuurusakho nga naabalomeele. Nio lwanyuma mulookhe.” 11Aryo Yoswa waalomela basaani khuusuta Isanduuku iye Kamakaambila y’Omukasya, khukhuumba ni nayo khukhwibotokhelela shiriimba, kumuluundi mutweela mu shifukhu. Baryo nga baamalile, baakobolayo isi baawolela khuukona mu shilo.

12Kumutikhinyi kwe shifukhu shisheelakho, Yoswa wenyukha, ni basaayi baasuta Isanduuku iye Kamakaambila y’Omukasya. 13Basaayi musaafu babaasuta tsikhoombi musaafu, baatsya baaraangila iburaangisi we Sanduuku iye Kamakaambila y’Omukasya nga bakhuumba, naluundi nga bafuura tsikhoombi tsaabwe. Baalala khu baselikhale babesabikha bye buusoolo baaraangila iburaangisi, ni babaandi baaloonda khu Sanduuku iye Kamakaambila. Ne nga babaafuura tsikhoombi baaba bafuura. 14Baryo khu shifukhu shino she khaabili, baakhuumba khukhwibotokhelela shiriimba kumuluundi mutweela, baamala beelayo isi baabuusanila. Baakholatsaka baryo khuumala biifukhu bisesaba.

15Uri khu shifukhu she kumusaafu, boosi baawuuna kumutikhinyi mamilimili, baakhuumba khukhwibotokhelela shiriimba Yeriko mu mbola busa nga ni baakhola biifukhu bisesaba bibyabira. Khuurusakho ndi khu shifukhu shino, baakhuumba kimiluundi musaafu. 16Ne ni baamala khuukhuumba kumuluundi kwe kumusaafu, basaayi baafuura tsikhoombi tsaabwe ni kamaani keene. Lwanyuma Yoswa waalakila babaandu ari, “Ni mulookhe luukali! Lwekhuuba Umukasya waakhuwaambisile ifwe shiriimba shino! 17Inywe mwaakha khuuhesa buli shiindu shoosi shishiili mu shiriimba, khuuba nga biwaanibwayo isi Umukasya. Umukhasi malaaya Rahabu yenyene, ni naabo babaali mu ntsu yeewe, nibo babaali ni khuurama nga baalamu. Lwekhuuba aayeeta khuubisa baarume beefwe beesi khwarumana khukhwimenielesa. 18Mukhawaambakho khu shiindu shoosi shishiili ni khuuhesebwa ta. Lwekhuuba ni mukhola muryo, muba mwaareerire buukosi ni khuuhela khu libungiitsi lye babaandu ba Isiraeli. 19Ne akhali bibiindu bibyakholebwa khukhwaama mu zaabu, ni feetsa, ni bye bibyuuma bibiindi, kane bikhosesebwe, biwaanibweyo isi Umukasya. Bino bili ni khuureebwa mwibiikhilo ly’Omukasya.”

206.20: Heb 11.30Baryo basaayi baafuura tsikhoombi tsaabwe luundi, ni babaandu boosi ni baawulila tsikhoombi, baalookha luukali lweene nga ni baanyala. Litikiiyi lya Yeriko lyaawumbukha lyaakwa aasi, nio lwanyuma baselikhale baayuubakho khaangu khukhwinjila mu shiriimba, baashiwaamba. 21Beera buli shiindu shilamu shoosi shishabamwo nga baraambisa tsiindima tsaabwe; basaani ni bakhasi, babaana ni baakhulu. Beeraka ni tsikhaafu, ni kamasheese, ni tsisikilya tseene.

22Lwanyuma Yoswa waalomela basaani baabili tsana babeetsa nga babemenielesi ari, “Ni mutsye mu ntsu ya malaaya, mumurusemo niye, ni babaandu boosi babaali ni naye, nga ni mwamusuubisa.” 23Baryo basaani bano baatsya baareera Rahabu, ni paapawe, ni maayiwe, ni babandaaye, ni baaramile boosi be muungo mweewe. Baabareera baabara aambi ni isi ba Isiraeli baabuusanila. 24Baamala boosha shiriimba Yeriko shoosi, na buli shiindu shoosi shishabamo. Baarobolakamo busa bibiindu bibyakholebwa khukhwaama mu zaabu, ni feetsa, ni mu byuuma bibiindi, baabiyila baabiwaanayo mwibiikhilo ly’Omukasya. 256.25: Heb 11.31Ne Yoswa waawonesa malaaya Rahabu, ni be muungo mweewe, atweela ni baalebe beewe boosi, lwekhuuba niye aabisa babemenielesi beesi Yoswa aarumana i Yeriko. Babetsukhulu ba Rahabu bashiimenya mu Isiraeli ni khukhwoolesa shaleelo shino.

266.26: 1 Bay 16.34Lwanyuma nga baamalile khuuhesa shiriimba Yeriko, Yoswa waarusa shitsubo shino ari,

“Umuundu yeesi uulikhakakho khukhwoombekha shiriimba shino Yeriko luundi,

Umukasya ali mutsuba.

Uyo yeesi ukhakakho khuulima kumusiinji kwasho

alifwiilwa umusooleli weewe umukiboole;

ni khuukhakakho khukhwoombekha kamatikiiyi nio aremo biilibwa,

ibumaliiliso alifwiilwa umusooleli weewe ufuura bukyeekhe.”

27Umukasya aryo waayeeta naabi Yoswa mu biindu byoosi byeesi aakhola, shaakila Yoswa wamanyikhana naabi mu shibala sha Kanani isho shoosi.