Swahili Bible2

24

Yoswa akanikha isi babaandu i Shekemu

1Yoswa alaanga bikuuka byoosi bye ba Isiraeli khukhwiitsa atweela mu lubuusano i Shekemu. Abuusa atweela baasakhalu, ni baaraangilisi, ni baakayi, atweela ni baakhulu babaandi mu Isiraeli khuubuusanila aambi ni Lisari Likhosefu.

224.2: Rak 11.27Lwanyuma Yoswa waalomela babaandu boosi ari, “Shino nisho sheesi Umukasya Wele wa Isiraeli ali khuuloma, ‘Khaalekho bakuuka beenywe baamenyatsaka shanjelekha we luluutsi Efurati, naluundi nga besaaya ba wele babaandi. Beeloosela mwibyo, ikhaba umukuuka weenywe Tera, atweela ni babaana beewe babili Iburayimu ni Nahori, nabo baakholatsaka baryo. 324.3 a Rak 12.1-9; b: Rak 21.1-3Ne ise nareera Iburayimu khuukhalisa luluutsi Efurati, namuraangilila khuukyeenda mu shibala shino sha Kanani. Naamuwa tsikhabi waasaala Isaaka, nga niye umukiboole mu luruungo lwe lisaaye liikali. 424.4 a Rak 25.24-26; b: Rak 36.8; Maka 2.5; c: Rak 46.1-7Ni Isaaka naye namuwa babaana babili Esawu ni Yakobo. Esawu namuwa khuumenya mu shibala she tsingoongo khu lukiingi Seyiri. Ne Yakobo ni babaana beewe boosi baatsya kwe Misiri khuumenya iyo. 524.5: Luky 3.1—12.42Lwanyuma narumana Musa ni Aroni, naluundi nareera shitaambiso she kamaani khu ba Misiri, khukhwoolesa ni nabarusamo inywe. 624.6: Luky 14.1-31Nga ni narusa bakuuka beenywe khukhwaama mu Misiri, ne ba Misiri benyukhilamo ni kamakaali kaabwe ni baselikhale baabwe be khu ŋwaaŋwa babaloondakho, khukhwoolela ilala khu nyaantsa Imbesemu. 7Bakuuka beenywe baalila lwe buuyeeti, shishakila naarawo lifuumbi limali akari aabwe ni ba Misiri. Lwanyuma nekulawo inyaantsa khuubawo intsila, ni nabo baakyeenda baabiramo busa nga babaakyeendela khu lwoomu. Naakyelawo naalekhuula inyaantsa yaakobola yaamila ba Misiri, baryo boosi baahela nga bakuuka beenywe babona. Mwaamanya nga mwamenya mu mubiimbi imbuka indeeyi. 824.8: Bala 21.21-35Lwanyuma naabambusa naabareera mu shibala she ba Amori, babaamenyatsaka shanjelekha wa Yorudaani. Baryo ba Amori bano baabasoolanisa naabi, ne ise naabayeeta khuubawula. Boosi nabahesa nga mubona, muryo nanywe mwaayila liiswa lyaabwe khuuba nga buusikha bweenywe. 924.9: Bala 22.1—24.25Lwanyuma Balaka umwaana wa Zipori, umuyiinga wa Mowabu, waarakikha buusoolo ni ba Isiraeli, aryo shikila arumanisa isi Balamu umwaana wa Beyori ari eetse abatsube inywe, 10ne ise naalekha khurekereesa byeesi Balamu aaloma ta. Akhali ndi ise nalakila Balamu khuubawa inywe tsikhabi, indyo naabawonesa khukhwaama mu makhono ka Balaka. 1124.11 a Yos 3.14-17; b: Yos 6.1-21Inywe muryo mwakhalisa luluutsi Yorudaani, mweetsa mwenjila mu Yeriko. Baaraangilisi atweela ni babaandu baayo baabasoolanisa inywe, ni khuutubakho ni ba Amori,, ni ba Perizi, ni ba Kanani, ni ba Hiti, ni ba Girugashi, ni ba Hivi, atweela ni ba Yebusi. Ne ise ndyo nabayeeta inywe mwaabawula nibo boosi. 1224.12: Luky 23.28; Maka 7.20Nga ni mwaba nga mwilooselayo, ise nakhola bayiinga babili be ba Amori baayenguukhana busa, baatitukha. Nashiryo simwabawula lwe lurima lweenywe namwe lwe lifumo lyeenywe ta. 1324.13: Maka 6.10,11Ise naabafumbasa inywe liiswa lyeesi mukhaaraambilila ta, ni biriimba byeesi mukhoombekha ta, ne nga ari mubimenyamwo. Ise nabawa inywe kimikuunda kye kimizabibu ni ki olivu, khuulyamo bibyaamo byamo, abe yakhaba nga siyaba inywe mumwakibyaala ta.’”

14Yoswa weloosela nga aboolela babaandu ari, “Ni mwisaayatsake Umukasya, mumwakaanisatsake niye nga mumuwulila luundi nga muli babeyikinwa. Ni murusewo bifwaani bye ba wele isi bakuuka beenywe besaayatsaka nga bashiili khwambukha luluutsi ta, naluundi nga bashiili i Misiri. 15Ne siinga muba nga simukana khukhwisaaya Umukasya ta, nimurobolewo shaleelo, naanu isi kane mwisaayatsake. Kane mukhalewo khukhwisaaya ba wele beesi bakuuka beenywe besaayatsaka, nga bashiili khwambukha luluutsi Efurati, naluundi nga bashiili mu Misiri? Namwe kane mwisaaye ba wele be ba Amori, be shibala sheesi muli khuumenyamwo ari? Ne ise ni be muungo mwase, kane khwisaayatsake Umukasya.”

16Babaandu nabo beelamo isi Yoswa bari, “Ifwe sikhunyala khwaalekha Umukasya khweela khukhwisaaya ba wele babaandi ta. 17Lwekhuuba Umukasya Wele weefwe yenyene niye uwakhuwonesa ifwe, ni bakuuka beefwe khukhwaama mu shibala she Misiri mu bukulwa. Niye aakhola bye kamakaanga biikali naabi nga fwabeene khubona khuri. Nga ni khwaba nga khukyeenda mu mubiimbi akari mu baasiku beefwe, niye aakhukhiinga ifwe naabi. 18Umukasya umweene niye uwakhusoolanila wawoona ba Amori, ni kamanaambo kakaandi kakaaba kamenya ano mu shibala shino. Ilala ifwe kane khwisaaye Umukasya, lwekhuuba niye yenyene ali Umukasya Wele weefwe.”

19Lwanyuma Yoswa waalomela babaandu tsana ari, “Inywe simunyala khukhwakaanisa Umukasya nga umweene n’akana ta, lwekhuuba niye ali umukhosefu luundi ali Wele we libuba liikali. Mwaakha khuubeela ilala babaandu babeyikinwa, mulekhe khumuminyaalila ta, lwekhuuba niye singene abeyakhile bibyoonako byeenywe ta. 20Siinga muyuukha mwaalekha Umukasya mweela khukhwisaaya ba wele babaandi, naye aryo kane ashuukhe abakholekho buubi abahese, abe yakhaba nga abeelatsakile umulayi isi muli makiboole.”

21Babaandu nabo beelamo Yoswa bari, “Taawe, ifwe singene khwisaayekho ba wele babaandi ta. Khwaamaliliile khukhwisaaya Umukasya yenyene.”

22Kila Yoswa abeelamo waabalomela ari, “Mwabeene muli bajulilwa be lomo yino nga ni mulomile muri, mwaakhalilewo khukhwisaaya Umukasya.”

Nabo beelamo bari, “E e, ifwe fwabeene khuli bajulilwa.”

23Yoswa waaloma luundi ari, “Ne bona mushiili ni ba wele be kamanaambo kakaandi. Ni murusewo ba wele bano, mwihaanileyo ilala kimyoyo kyeenywe isi Umukasya Wele wa Isiraeli.”

24Babaandu ndi baalomela Yoswa bari, “Umukasya niye Wele weefwe, nafwe kane khumwiisaaye luundi khumuwulilatsake niye yenyene.”

25Aryo Yoswa waakhola indakaano ni babaandu khu shifukhu isho i Shekemu. Naluundi waabakholela kamakaambila ni biilakilo byeesi bali ni khuuloondelela. 26Yoswa waarona bibiindu bino byoosi mu Shiitabo she Kamakaambila. Ni lwe khuukana khuurawo shishebuliso she Ndakaano yino, wareera kubaale kuboofu kukweene, waakusimikha aasi e kuusaala kuboofu, mu shifwo she khukhwisaayilamo Umukasya i Shekemu. 27Kila Yoswa alomela babaandu ari, “Libaale lino lili umujulisi isi khuli, lwekhuuba lyarekeeresile bilomo byoosi byeesi Umukasya akhubooleele ifwe. Nashiryo kane nilyo lijulile isi Umukasya, siinga ifwe khushuukha khwaalekha khumuwuliilisa ta.”

28Lwanyuma Yoswa waasiibula babaandu, buli mutweela waakobolayo ingo weewe.

Khuufwa khwa Yoswa ni Eliyazari

29Lwanyuma lwe bibiindu bino byoosi, Yoswa umwaana wa Nuni, umwakaanisi w’Omukasya waafwa, nga waayolesa kimiiko shitoondo shitweela ni likhumi (110). 3024.30: Yos 19.49,50Lwanyuma ba Isiraeli baamusiikha mu shiifwo she buusikha bweewe i Timunasi-Sera, iyo mu shibala she mu ngoongo sha Efurayimu, ingaaki we lukiingi Gaashi.

31Babaandu ba Isiraeli bakaanisatsaka Umukasya khukhwaama nga Yoswa n’aba nga ashiili mulamu. Beloosela baryo ni mu biifukhu byoosi byeesi baaraangilisi babaamenyawo khuufuurisakho Yoswa, naluundi nga nibo baamanya bibiindu byoosi byeesi Umukasya aaba waakholela babaandu ba Isiraeli.

3224.32: Rak 33.19; 50.24,25; Luky 13.19; Yok 4.5; Bur 7.16Ni kamakuumba ka Yusufu keesi babaandu ba Isiraeli baasuta beetsa nako khukhwaama i Misiri, baakasiikha i Shekemu, mu mukuunda kweesi Yakobo aakula khu bisiintsa shitoondo shitweela she feetsa, khukhwaama khu baana ba Hamori. Shisiintsa shino shekyela busikha bwe babetsukhulu ba Yusufu.

33Eliyazari umwaana wa Aroni naye waafwa. Niye baamusiikha mu shibala she mu ngoongo sha Efurayimu, mu shiriimba she Gibeya, sheesi abe baakabila umusooleli wa Finehasi.