Swahili Bible2

22

Bikuuka bye Bwaamanyaanga bikobolayo ingo

1Yoswa walaanga atweela mu lubuusano babaandu be mu bikuuka bya Rewubeni, Gadi, ni shisiintsa sha Manase she Bukwanyaanga. 222.2: Bala 32.20-32; Yos 1.12-15Lwanyuma waabaloma ari, “Bona mwaakholile bibiindu byoosi byeesi Musa umwakaanisi w’Omukasya aabalakila inywe, ni nanywe muryo mwayimbulila ise mu biindu byoosi byeesi nabalakila. 3Mu mbuka iyi yoosi khukhwoola ni khu shifukhu she shaleelo shino, mwaakhwaantsukha babandaayeenywe ta. Ne mwaayitsiliilisa naabi khukhwoolelesa byeesi Umukasya Wele weenywe aabalakila. 4Ne ari khukhwaama nga Umukasya Wele weenywe naamalile khuuwa babandaayeenywe ba Isiraeli lukoosi nga n’asuubisa, ari nimwiileyo mu tsiingo tseenywe mu liswa lyeesi Musa umwakaanisi w’Omukasya abawa ibwaamanyaanga we luluutsi Yorudaani. 5Ne muli ni khukhwitsiliilisa naabi khuubona muri murama nga babeyikinwa khuuloondelela kamakaambila keesi Musa umwakaanisi w’Omukasya aabawa: khuukana Umukasya Wele weenywe, khuukyeendatsakila mu ntsila tseewe, khuuwulilatsaka kamakaambila keewe, ni khuumwakaanisatsaka niye yenyene ni kumwoyo kwoowo kwoosi, atweela ni buulamu bwoowo bwoosi.”

6Aryo Yoswa waabawa tsikhabi, waabasibula nabo baatsya ingo waabwe.

7Musa abe waakabila shisiintsa shitweela sha Manase liiswa lya Bashani liliili i bwaamanyaanga wa Yorudaani, ne shisiintsa shishiramile sha Manase, Yoswa aabakabila liiswa liliili i bukwanyaanga wa Yorudaani, mu ba Isiraeli babaandi babaaramile boosi. Lwanyuma lwayo Yoswa waabaloma khukhwiilayo ingo waabwe, waabawa tsikhabi, 8nga abalomela ari, “Ni mwiileyo muungo tseenywe nga muli ni buyiindifu buukali ibwo, ni tsikhaafu tsingali itso, ni feeza, zaabu, ni bibyuuma bibiindi, ni khuutubakho bikwaaro biikali. Ne mwaakha mubikabanane ni baalebe beenywe.”

9Baryo babaandu be mu shikuuka sha Rewubeni, ni shikuuka sha Gadi, ni be mu shisiintsa shishiindi sha Manase, beelakayo tsiingo tsaabwe, nga baawukhana ni ba Isiraeli babaaramile i Shilo, shishiili mu shibala sha Kanani. Baryo bakyeenda nga beelayo iwaabwe i Gileyadi, nga nisho shisiintsa sheesi Umukasya aabakabila khuubirira mu Musa.

10Ne ni baaba nga bashiili mu Kanani, nga bashiili khwambukha luluutsi Yorudaani ta, babaandu be mu shikuuka sha Rewubeni bano ni be mu Gadi, ni be shisiintsa shishiindi sha Manase, boombekha shisheeso shiboofu shisheene aambi ni luluutsi luno. 11Babaandu babaaramile ba Isiraeli baawulila bari babaandu Rewubeni ni Gadi ni shisiintsa sha Manase boombakhile shisheeso shiboofu shisheene khu ndulo khwe luluutsi Yorudaani, khu liswa lilyaba lye ba Isiraeli. 12Ne babaandu ba Isiraeli ni baawulila baryo, libungiitsi lyoosi lyesuta lyaatsya lyaabuusanila i Shilo, khuukana khuusoolanisa babandaayaabwe bano.

13Ne khuunyoowa ba Isiraeli bano baabarumanila baarume nga baraangililwa ni Fenekasi, umwaana w’omusaayi Eliyazari, khuutsya i Gileyadi khuukanikha isi babaandu ba Rewubeni, ni Gadi, ni shisiintsa shishiindi sha Manase bano. 14Mu baarume bano mwabamo baaraangilisi likhumi, nga buli mutweela aama mu shikuuka shitweela she bikuuka bya Isiraeli. 15Nga ni boola mu shibala sha Gileyadi, baboolela babaandu ba Rewubeni, ni Gadi ni shisiintsa shishiindi sha Manase, khulwe bashaabwe babaaramayo bari, 1622.16: Maka 12.13,14“Lwashiina mukholile shishiindu shiibi shino isi Wele wa Isiraeli? Inywe mwaamururirekho luundi mwaaminyaaliile Umukasya lwe khukhwombekha shisheeso shishiindi ano. 1722.17: Bala 25.1-9Shishoonako sheesi khwakholela i Peyoli abe sishimala ta? Ni na ari ifwe khushiili khusiingibwakho shiibi isho ta, nga nisho shishaakila buulwaale buubi bubweene bwaakhukwakho ifwe fweesi, nga bwaama isi Umukasya. 18Ne bona ndi inywe shaleelo mwaarurire khu Mukasya! Inywe siinga mumiinyaalila Umukasya shaleelo, kane niye akhalalile babaandu ba Isiraeli boosi kumukaamba. 19Ne ari siinga mwaambaasa muri shibala sheenywe shino shoonakisibwile, ni mwambukhe luluutsi Yorudaani, mwiitse isi shibala sh’Omukasya, isi Isanduuku iye kamakaambila y’Omukasya imenya akari mwiifwe, ni nafwe kane khukabanane liiswa ni nanywe. Ne mukhaminyaalila Umukasya namwe mwombekha shisheeso shisheenywe ta, akhali shitweela isho shishiili sh’Omukasya Wele umweene. 2022.20: Yos 7.1-26Ni mushebulile isaambo isi Akani umwaana Zera, ekaana khuwaamba likaambila liliwaamba khu biindu abe bibyaba bye khukhwoonakisibwa, niye areerera lituuli lyoosi lye ba Isiraeli babonabonesebwa khu lweesho. Akani s’ali yenyene niye uwafwa khulwe shiibi sheewe ta.”

21Nio lwanyuma babaandu be mu bikuuka bya Rewubeni, ni Gadi ni shisiintsa shitweela she shikuuka sha Manase, beelamo baakhulu be bikuuka abo bari, 22“Umunyali wa byoosi mutweela yenyene niye Wele, uuli Umukasya! Umunyali uwa byoosi mutweela yenyene niye Wele, uuli Umukasya! Niye waamanya, ari lekha ni ba Isiraeli boosi nabo bashimanye. Ifwe siinga khuuba nga khwaaminyaala khwaalekha khuwulila byeesi Umukasya aloma ta, mukhakhulekha khwaaba baalamu shaleelo ta. 23Ifwe sikhwombekha shisheeso khulweefwe nio khunyale khuurura khu Mukasya ta. Naluundi ifwe sikhwashombekha khuri nio khunyale khuuwaanayo tsisaayilo, namwe bibyookhebwa bibiindi ni biwaano bye lukoosi khukhwikhoyesa Umukasya, namwe bari nio akhuwe ifwe tsikhabi ta. 24Ne khwashombekhile khuryo, lwekhuuba khwarya khuri manya iburaangisi iyo, babetsukhulu beenywe baliloma babetsukhulu beefwe bari, ‘Inywe muli na bunyala shiina bububesaayisa Umukasya Wele wa Isiraeli? 25Bona Umukasya warawo luluutsi Yorudaani khuuba nga lulwaakha akari e babaandu beefwe ni babaandu beenywe. Nashiryo inywe simulikho ni kumukabo isi Umukasya ta.’ Baryo manya babetsukhulu beenywe balikhaangabisa babaandu beefwe khuulekha khwisaaya Umukasya ta. 26Isho nisho shishakilile ifwe khwaakhalawo khukhwombekha shisheeso shino, ne akhuba khulwe tsisaayilo namwe khulwe biwaanwa ta. 27Ne khwashikholile lwekhuuba nga shishebuliso busa akari e babaandu beenywe ni babaandu beefwe, khukhwokyesa khuri fweesi khuli ni kumukabo kwe khukhwisaaya Umukasya mu lisaayilo lyeewe, nga khuli ni biwaano byeefwe bye khukhwoosha, ni tsisaayilo, atweela ni biwaano bye lukoosi. Awo nio babetsukhulu beenywe balekhe khukanikha isi babetsukhulu beefwe bari sibalikho ni kumukabo kwe khukhwisaaya Umukasya ta. 28Naluundi khweelileyo khwaambaasa khuri, ‘Siinga bakhulomela shishiindu nga shino, namwe baashilomela babetsukhulu beefwe, khweesi khunyala khweelamo khuri, ni mubone shisheeso shishifwaanana ni shisheenywe, sheesi bakuuka beefwe nabo bombekha, sishili she khukhwookhelakho tsisaayilo namwe biwaano bibiindi ta, ne shili busa shishebuliso akari efwe ni nanywe.’ 29Mu ŋali mubweene, ifwe sikhunyala khwaaminyaalila Umukasya, khwaamururakho lwe khukhwiyombekhela shisheeso shisheefwe nio khwookhelekho tsisaayilo tseefwe ni biwaano bibiindi, namwe biwaano bye lukoosi ta. Shisheeso shitweela shonyene sh’Omukasya Wele weefwe, shili shitweela shonyene, nisho shisheemikha iburaangisi we lisaayilo likhosefu.”

30Ulwo nga umusaayi Finehasi atweela ni baaraangilisi be babaandu, khukhwaama mu bikuuka bya Rewubeni, ni Gadi atweela ni shisiintsa shitweela sha Manase nga baamalile khuukanikhana byoosi, bewulila nga baabimalile buulayi. 31Kila umusaayi Finehasi umwaana wa Eliyazari elamo babaandu be bikuuka bino ari, “Shaleelo naamanyiile ilala ndi Umukasya ali atweela ni nafwe, lwekhuuba mwakhwoonakisa mu moni ts’Omukasya, nga ni khwashambaasile ta. Khuurusakho ndi mwayeetile busa ba Isiraeli khuuwona khukhwaama mu mukhono kw’Omukasya.”

32Lwanyuma lweebyo, umusaayi Finehasi atweela ni baaraangilisi be bikuuka likhumi abo, beelayo i Kanani nga baama mu lubusano luno lweesi baaba nalwo ni babaandu ba Rewubeni, ni ba Gadi, baatsya babiboolela ba Isiraeli boosi. 33Baryo ba Isiraeli boosi baashikana naabi luundi bekhoya nga baruuya Wele, baakamisila ni abweene awo khuukanikha buubi khu baandu ba Rewubeni ni ba Gadi. 34Baryo babaandu be mu shikuuka sha Rewubeni ni sha Gadi, baatwiikha shisheeso isho lisiina bari, “Shisheeso she bujulisi shishookesanisa shiri Umukasya niye Wele.”