Swahili Bible2

21

Biriimba bya Balevi

1Baaraangilisi be mu bukuuka bukyeekhe bwe mu shikuuka sha Levi, baatsya khuukanikha isi Eliyazari, umusaayi umukhulu, ni isi Yoswa Umusooleli wa Nuni, ni baaraangilisi be bukuuka bukyeekhe bubuundi bwe mu Isiraeli. 221.2: Bala 35.1-8Baaraangilisi bano baabatsyayo i Shilo mu shibala sha Kanani, baabalomela bari, “Umukasya aalakila khuubirira mu Musa ari, ifwe khuli ni khuuweebwa biriimba bye khuumenyamo, nga mulimo biifwo bye khukhwaayisilamo bibyaayo byeefwe.” 3Ari khukhwaama nga Umukasya n’aloma aryo, baaraangilisi be bikuuka bibiramile bye ba Isiraeli, baafukiilisana khuuwakho biriimba ni bibyaalo bilala isi shikuuka sha Levi.

4Shisiintsa shiikiboole shaweebwa isi khakuuka kha Kohasi. Ba Levi babaaba babetsukhulu ba Aroni umusaayi, baweebwa biriimba likhumi ba bitaru khukhwaama mu bisiintsa bya Yuda, Simeoni, ni sha Benyamini. 5Babaramile boosi be mu khakuuka kha Kohasi, nabo baaweebwa biriimba likhumi khukhwaama mu bisiintsa bya Efurayimu, Dani, ni shitweela khu bisiintsa bya Manase she bukwanyaanga.

6Babaandu be mu khakuuka kha Gerishoni, baaweebwa biriimba likhumi na bitaru, khukhwaama mu bisiintsa bya Isakaari, Asheri, Nafutaali, ni shisiintsa sha Manase she bwaamanyaanga.

7Babaandu be mu khakuuka kha Merari, nabo beetsa buli baandu muungo tsaabwe nabo baweebwa biriimba likhumi na bibili khukhwaama mu bisiintsa bya Rewubeni, Gadi ni Zebuluni.

8Baryo ba Isiraeli baakabila bukuuka bwa Levi biriimba ni bibyaalo ibyo byeesi Umukasya aalakila khuubirira mu Musa.

Biriimba bya Yuda, Simeoni, ni Benyamini

9Khukhwaama mu bikuuka bya Yuda ni Simeoni, baakabananisa biriimba mu masina kano, 10isi babetsukhulu ba Aroni, babaaba bali be khakuuka kha Kohasi, uwaba uwe muunda ya Levi. Nibo babaanyoowa khuuweebwa, lwekhuuba khakokha khakhaanyoowa khaakwa khu nibo. 11Baabakabila nibo shiriimba sha Kiriyasi Ariba (Ariba aba kuukawe wa Anaki), ari shishilaangibwa bari Heburoni, ni khuutubakho bibyaalo bye khukhwaayisilamo bibyebotokhelelawo, mu shibala she tsingoongo sha Yuda. 12Ne khuurusakho ndi kimikuunda ni bibyaalo bibyebotokhelela shiriimba baaba baabikabila Kalebu umwaana wa Jefune, khuuba busikha bweewe.

13Baryo babetsukhulu ba Aroni umusaayi baabakabila Heburoni shishaba shiriimba she bubwilukhilo shooyo uwaba nga weerire umuundu, Libuna, 14Jatiri, Eshitemowa, 15Holoni, Debiri, 16Ayini, Juta, ni Besi Shemeshi, khuuyililamo atweela ni kamaayilo keene, nga byoosi atweela bili biriimba syeenda khukhwaama mu Yuda ni Simeoni.

17Khukhwaama mu shikuuka sha Benyamini, nibo baaweebwa biriimba bino, ni bibyaalo byawo bibibotokhelelewo: Gibiyoni, Geba, 18Anasosi, ni Alumoni; nga bino bili biriimba bine. 19Biryo biriimba likhumi na bitaru byaweebwa isi basaayi nga nibo babaaba babetsukhulu ba Aroni.

20Ne babaaramile boosi babaama mu bikuuka bya Kohasi, nga nibo be muunda ya Levi, baafuna biriimba likhumi ni bibyaalo bibibotokhelelewo, nga babirusa khu shikuuka sha Efurayimu. 21Bano nibo baaweebwa shiriimba sha Shekemu, atweela ni bibyaalo bibibotokheleelewo, nga nisho shishaba shiriimba she bubwilukhilo bw’oyo uwaba weerire uwashe akhali khuushitsililila ta, ni Gezeri, 22Kibuzayimu, atweela ni Besi-Horoni ni khuuyililamo bibyaalo bibibotokhelelewo, nibyo biriimba bine.

23Biriimba bibiilakho bino atweela ni bibyaalo byawo bibibotokhelelewo byaweebwa isi basaayi be mu shikuuka sha Dani: Eliteke, Gibesoni, 24Ayijaloni, ni Gasi-Rimoni; byoosi atweela biriimba bine. 25Ni khukhwaama mu shisiintsa she khabili shishiramile she shikuuka sha Manase, ba Levi baaweebwa biriimba bino atweela ni bibyaalo byawo bibibotokhelelewo: Taanaki ni Gasi-Rimoni atweela biriimba bibili. 26Biryo biriimba bibiramile likhumi ni bibyaalo byawo bibibibotokheleele, byaweebwa isi bukuuka bukyeekhe bwe shikuuka sha Kohasi.

27Babetsukhulu ba Gerishoni nga nibo batweela khu be mu shikuuka sha Levi, baafuna biriimba bibili ni bibyaalo byawo bibibibotokheleele, nga babyaamisa khu shitweela khu bisiintsa bya Manase, nga nibyo Golani shishiili mu Bashani, nga nisho shiriimba she bubwilukhilo, ni Be-Eshitera; nibyo biriimba bibili.

28Khukhwaama khu shikuuka sha Isakaari baafuna biriimba Kishiyoni, ni Daberasi, 29Jarimusi, ni Eniganimu, nga nibyo biriimba bine ni khutubakho bibyaalo byawo bibibibotokheleele. 30Be mu shikuuka sha Asheri baafuna biriimba Mishali, Abudoni, 31Helikasi, ni Rehobu, nga nibyo biriimba bine ni khutubakho bibyaalo byabyo bibibotokheleele.

32Khukhwaama khu shikuuka sha Nafutaali, baafuna Kedeshi shishiili mu Galilaaya; nga nisho shiriimba she bubwilukhilo, ni Hamosi Dori, ni Karitani, nga nibyo biriimba bitaru ni khutubakho bibyaalo byawo bibibotokheleele. 33Biryo biriimba bitaru ni bibyaalo bibibotokhelelewo byaweebwa isi shikuuka sha Gerishoni.

34Ba Levi babaaramile nga nibo be mu khakuuka khakyeekhe kha Merari, baafuna biriimba khukhwaama khu shikuuka sha Zebuluni, nga nibyo Jokineyamu, Karita, 35Dimuna, ni Nahalali, byoosi atweela nga nibyo biriimba bine ni khutubakho bibyaalo byawo bibibotokhelelewo.

36Khukhwaama khu shikuuka sha Rewubeni, ba Levi baafuna biriimba Bezeri, Jahazi, 37Kedemosi, ni Mefaasi, ni khutubakho bibyaalo byawo bibibotokhelelewo.

38Khukhwaama khu shikuuka sha Gadi, baafuna biriimba Ramosi shishiili mu Gileyadi nga nisho shiriimba she bubwilukhilo, ni Mahanayimu, 39Heshiboni, ni Jazeri, nga nibyo biriimba bine ni khutubakho bibyaalo byawo bibibotokhelelewo. 40Nashiryo biriimba likhumi na bibili nibyo bibyaweebwa khakuuka khakyeekhe kha Merari khe shikuuka sha Levi.

41Biryo biriimba ni bibyaalo bibyaweebwa ba Levi atweela byoosi mu shibala sha Isiraeli byoola kamakhumi kane na shinaane. 42Buli shitweela khu biriimba bino byabakho ni bibyaalo bibibotokhelelewo bye khukhwaayisilamo.

43Musaambo yino, Umukasya waakabila ba Isiraeli shibala shoosi sheesi etsubila bakuuka baabwe ari alishibawa. Nashiryo ba Isiraeli ni baamala khuuwoonamwo babaandu baamwo, baashimenyamwo. 44Aabawo baasiku babaaba nga bashiiliwo khuusoolanisa ba Isiraeli, ne Umukasya wolelesa shisuubiso sheewe, khuubona ari babaandu beewe bamenya mu lukoosi. Nga abe buli mbuka isi ba Isiraeli baatsiila mu busoolo ni baasiku baabwe, nga Umukasya Wele abayeeta khuubawula, nga mbaawo unyalisa khuuwula ba Isiraeli ta. 45Mbaawo shisuubiso na shitweela sheesi Umukasya aalomela ba Isiraeli shishikhoolelela ta. Byoosi byeesi aaloma byoolelela buulayi.