Swahili Bible2

20

Biriimba bye khuumulilamo

(Khuubala 35.9-34; Kamakaambila 19.1-13)

120.1: Bala 35.9-34; Maka 4.41-43; 19.1-13Lwanyuma Umukasya waalomela Yoswa 2khuutsya aboolele babaandu ba Isiraeli ari, “Ni muroboleyo biriimba bye bubwilukhilo, nga ni nalakila Musa umwakaanisi wase. 3Nibawo umuundu yeesi uwiira ukuundi nga waakhushitsililila ta, umuundu uyo anyala waatitukhila ibweene iyo, nio anyale khuuwona buurafu bwe balebe b’omuundu uwiiribwile. 4Umuundu uwiirire uyo, anyala waatitukhila mu biriimba bino, waatsya weemikha mu mulyaango kwe shiriimba isho, waasontsoola baaraangilisi be shiriimba isho bibibeelewo. Ni nabo bamufukiilisa khukhwinjila mu shiriimba isho, baamuwa shiifwo e khuumenyayo ni nabo. 5Ne siinga balebe b’omuundu uwiribwile baloondakho khu muundu yuno, nga bakana nabo khuumwiira, babekhali be mu shiriimba shino sibaakha khuumuwaanayo isi bali ta, lwekhuuba niye aamwiira nga waakhushitsililila ta, naluundi ate nga s’alikho ni lirima lyoosi mu mwoyo kweewe ta. 6Umuundu umwiiri uyo, aakha khuumenya mu shiriimba isho she bubwilukhilo isho, khukhwoolesa nga baamureerire khuumuwotsesa mu lubuula. Umuundu uyo n’anyoolekhana nga s’alikho ni kumusaango ta, aakha khuumenya mu shiriimba isho she bubwilukhilo, khukhwoolesa khu mbuka isi umusaayi afwiila. Lwanyuma umuundu uyo ali ni khukhwiilayo mu shiriimba she waabwe sheesi aatitukhamo.”

7Baryo ba Isiraeli baakhalawo khuurawo biriimba bitaru bye bubwilukhilo khu lubeka lwe bukwanyaanga wa Yorudaani, nga nibyo: Kedeshi shishiili mu Galilaaya, mu shibala she tsingoongo sha Nafutaali, Shekemu shishiili mu shibala she tsingoongo sha Efurayimu, ni Kiriyasi Ariba (alala bashilaanga bari Heburoni) shishiili mu shibala she tsingoongo sha Yuda.

8Khu lubeka lwe bwaamanyaanga wa Yorudaani, ba Isiraeli ndi nayo baakhalawo khuurawo biriimba bitaru bye bubwilukhilo: Bezeri shishaba khu musaleela ibwaamanyaanga wa Yeriko, mu shibala sha Rewubeni, Ramosi shishiili mu Gileyadi nga nisho shaba shiriimba sha Gadi, ni Golani shishiili mu Bashani, she mu shisiintsa sha Manase.

9Biriimba bino bye bubwilukhilo byareebwawo nio nga abe umuundu umu Isiraeli mutweela namwe umuwuyi mutweela nga weerire uwashe nga waakhushitsililila ta, abe anyala waatitukhila mu shitweela khu biriimba bino. Ibweene iyo abe anyala waawona waaba mulamu khukhwoolesa khu khuwotsesebwa, abe yakhaba nga baalebe b’omuundu uweribwa bakhakakho khuumwiira.