Swahili Bible2

19

Liiswa lyeesi baakabila Simeoni

1Shikuuka sha Simeoni nisho shisharobolebwa khuuba she khabili mu khufuna kumukabo kwe liiswa, khuusiintsiila khu bukuuka bukyeekhe bubwashibamo. Busikha bwaabwe bwe liiswa bwaba shisiintsa sha Yuda. 219.2: 1 Kim 4.28-33Shisiintsa shino shabamo biifwo bino: Berisheba, Sheba, Molada, 3Hazari Shuwali, Bala, Ezemu, 4Elitoladi, Besuli, Horuma, 5Zikulaga, Besi Marikabosi, Hazari Susa, 6Besi Labawosi, ni Sharuheni: bino byoosi byaba biriimba likhumi na bitaru, ni khutubakho bibyaalo bibyesaanewo.

7Yabayo bibiindi nga Ayini, Rimoni, Eta ni Ashani: atweela biriimba bine ni khuutubakho bibyaalo bibyesaanewo. 8Shikuuka sha Simeoni shabamo ni biriimba atweela ni bibyaalo bibiindi, khuutsya khukhwoolela ilala i Baalasi Beri namwe bari Rama shishaba i Negevu namwe imwaalo.

Buno nibwo bubwaba busikha bwa Simeoni, khuusiintsiila khu bukuuka bukyeekhe bubwashibamo.

9Liiswa lilyaba nga buusikha bwa Simeoni lyaba mukari mwe shisiintsa shishaweebwa shikuuka sha Yuda, lwekhuuba Yuda aafuna liiswa liikali naabi khufuurisa ni babaandu babaashibamo, shikila baabukulakho liiswa lilala baaliwa shikuuka sha Simeoni.

Liiswa lyeesi baakabila shikuuka sha Zebuluni

10Shikuuka sha Zebuluni nisho shishaba she khataru khuufuna kumukabo kwe liiswa, khuusiintsiila khu bukuuka bukyeekhe bubwashibamo. Lulwaakha lwe liiswa lyeesi baafuna lwatsya paka khukhwoolela ilala i Saridi. 11Khuutsya kwe bukwanyaanga, lulwaakha lwatsya paka i Marala, lwaatsya lwekuunya khu Dabesheesi, lwelooselayo khukhwoola khu kheetsi Jokoneyamu. 12Lulwaakha luno lwatsya khukhwaama i Saridi lwaatsya kwe bwaamanyaanga mu shisiintsa sha Kisilosi Tabori, lwaatsya khukhwoola i Daberasi ni khukhwoola i Jafiya. 13Khukhwaama ano, lweloosela kwe bwaamanyaanga khukhwoola i Gasi Heferi ni Esi Kazini, lwaatsya lwekukhila i Rimoni, lwaweta lwaatsya kwe Neya. 14Ibweene iyo lulwaakha lwakatilila ingaaki lweekha kwe mwaalo khukhwoola i Hanasoni, lwaalola kwe bukwanyaanga lwoola khu Litila lya Ifutaheli. 15Shisiintsa shino sha Zebuluni shawaambilamo biriimba bibibotokhelelewo nga Katasi, Nahalali, Shimuroni, Idala ni Beselehemu, ni khutubakho ni bibyaalo bibibotokhelelewo byeene. 16Biriimba bino ni khutubakho ni bibyaalo bino atweela, nimwo mweesi bukuuka bukyeekhe bwa Zebuluni bwamenyatsaka nga buusikha bwaabwe.

Liiswa lyeesi baakabila shikuuka sha Isakaari

17Shisiintsa she khaane shaweebwa shikuuka sha Isakaari, nga bakabananisamo bukuuka bukyeekhe. 18Shisiintsa shino shabamo bino: Jezureeli, Kesulosi, Shunemu, 19Hafarayimu, Shiyoni, Anaharasi, 20Rabisi, Kishiyoni, Ebezi, 21Remesi, Eni Ganimu, Eni Hada ni Besi Pazezi. 22Lulwaakha lwatsya lwekuunya khu Tabori, Shahazuma ni Besi Shemeshi, lwaatsya lwaakamila khu Yorudaani. Lulwaakha luno lwawaambilamo biriimba likhumi na bisesaba, ni khutubakho ni bibyaalo bibibotokhelelewo byeene. 23Biriimba bino ni khutubakho ni bibyaalo bibibotokhelelewo byeene nimwo mweesi bukuuka bukyeekhe bwa Isakaari bwamenyatsaka nga busikha bwaabwe.

Liiswa lyeesi baakabila shikuuka sha Asheri

24Shisiintsa she kharaano shaweebwa isi shikuuka sha Asheri, nga bakabananisamo bukuuka bukyeekhe. 25Shisiintsa shino shabamo bino: Helikasi, Hali, Beteni, Akishafu, 26Alameleki, Amadi, ni Mishali. Khu lubeka lwe bukwanyaanga lulwaakha lwatsya lwekuunya khu Karumeli ni Shihori Libunasi. 27Lwatsya lwaweta kwe bwaamanyaanga khulola i Besi Dagoni, lwekuunya khu Zebuluni, ni khu litila lya Ifutaheli khuutsya kwe ngaaki khukhwoola i Besi Emeki ni Niyeli. Lwatsya lwakhalisa kwe bwaamanyaanga wa Kabulu, 28Eburoni, Rehobu, Hamoni, ni Kanasi, ni khukhwoolela ilala khu shiriimba sha Sidoni. 29Lulwaakha luno lwamala lwaweta kwe Rama, lwaatsya lwoola khu shiriimba she lumako sha Tuulo, lwanyuma lwaweta luundi khukhwoola i Hosa, lwaatsya lwaakamila khu nyaantsa imboofu Meditereniani. Lulwaakha luno lwaayililamo ni Mahalabu, Akizibu, 30Uma, Afeki, ni Rehobu. Mu shikuuka sha Asheri mwabamo biriimba kamakhumi kabili ni bibili, ni khutubakho ni bibyaalo bibibotokhelelewo byeene. 31Biriimba bino ni khuutubakho ni byaalo bibibotokhelelewo byeene, nimwo mweesi bukuuka bukyeekhe bwa Asheri bwamenyatsaka nga buusikha bwaabwe.

Liiswa lyeesi baakabila shikuuka sha Nafutaali

32Shisiintsa sha khasesaba shaweebwa isi shikuuka sha Nafutaali, nga bakabananisamo bukuuka bukyeekhe. 33Lulwaakha lwasho lwaamila i Helefu, khukhwaamila isi kuusaala kuboofu kukuuli i Zaananimu, khuubirira i Adami Nekebu, ni Jabunilu, lwaatsya lwaamaliilisila khu Yorudaani. 34Lulwaakha lwaweta lwaatsya kwe bukwanyaanga khuubirira i Azinosi Tabori, lweetsa lwaarurira i Hukoko. Lweekha kwe mwaalo lwetiila khu ndulo kwa Zebuluni, khuutsya paka i bukwanyaanga khukhwoola khu Asheri, khuutsya khukhwoola khu Yorudaani, lubeka lwe bukwanyaanga wa Yuda. 35Biriimba bye tsimako bya Zidimu, Zeri, Hamasi, Rakasi, Keneresi, 36Adama, Rama, Hazori, 37Kedeshi, Edereyi, Eni Hazori, 38Ironi, Migadali Eli, Horemu, Besi Anasi, ni Besi Shemeshi. Yabayo biriimba likhumi na syeenda ni khutubakho ni bibyaalo bibibotokhelelewo. 39Biriimba bino ni bibyaalo byabyo nibyo bibyaba busikha bwa Nafutaali, nga baakabananisilemo bukuuka bukyeekhe.

Liiswa lyeesi baakabila shikuuka sha Dani

40Shisiintsa she kumusaafu shaweebwa isi shikuuka sha Dani, nga bakabananisamo bukuuka bukyeekhe. 41Bubalaayi bwe shiifwo she buusikha bwasho bwabamo bino; Zora, Eshitawolu, Iri Shemeshi, 42Shalabini, Ayijaloni, Isila, 43Eloni, Timuna, Ekuroni, 44Eliteke, Gibesoni, Baalasi, 45Jehudi, Bene Beraka, Gasi Rimoni, 46Mejarikoni, ni Rakoni, ni khutubakho ni shiifwo shishalolelela i Yopa.

4719.47: Baak 18.27-29Babaandu be mu shikuuka sha Dani ni baarusibwakho liiswa ilyo, isho shaakila nibo baatsya bebwakala Leshemu, bashiwaamba, naluundi beeraka ni buli muundu yeesi uwashibamo. Baryo baatsya bamenya mu bweene umwo, bashuusa lisiina lyasho bashilaanga bari Dani, nga bashebulila umukuuka waabwe umutaayi. 48Biriimba bino ni bibyaalo byabyo byeene nibyo bibyaweebwa isi shikuuka sha Dani, nga bakabananisamo bukuuka bukyeekhe.

Liiswa lyeesi baakabila Yoswa

49Ni baaba nga baamalile khuukabananisamo liiswa khuuba busikha isi buli shikuuka, babaandu ba Isiraeli baakabilakho shisiintsa shitweela isi Yoswa umwaana wa Nuni, khuuba busikha bweewe. 50Shino shaba nga Umukasya n’alakila. Baryo baamukabila shiriimba sheesi aakana, nga nisho Timunasi Sera, shishaba mu shibala she tsingoongo sha Efurayimu. Ibweene iyo Yoswa waamiliisa shiriimba shishabayo, waamenyatsaka iyo.

51Bino nibyo bibyaba biifwo byeesi umusaayi Eliyazari atweela ni Yoswa umwaana wa Nuni, ni khuutubakho ni baaraangilisi be bikuuka bye ba Isiraeli, baakabananisa isi bikuuka byoosi nga bakhupa bukokha. Shino baashikhola nga bali i Shilo, mu moni ts’Omukasya, iburaangisi we Lisari ly’Omukasya. Baryo baamaliilisa khuukabananisamo liiswa lyoosi.