Swahili Bible2

18

Yoswa akabananisa liiswa lilyaramakho lyoosi

1Lwanyuma nga ba Isiraeli bawaambile shibala shoosi, boosi baatsya baabuusanila i Shilo, boombekhayo Lisari ly’Omukasya lye khuubuusanilamo.

2Ne abe ishiiliyo bikuuka musaafu bye ba Isiraeli abe babashiili khufuna kumukabo kwe liiswa ta.

3Kila Yoswa alomela babaandu ari, “Inywe munayila imbuka shiina khukhwiloosela khuuba awo busa, nga mushiili khwinjila khukhwiyilila liiswa, lyeesi Umukasya Wele we bakuuka beenywe aabalomela khuubawa? 4Ari ni mwiroboleleyo basaani bataru mu buli shikuuka. Nase indyo kane imbarumane batsye bemenielese buulayi shibala isho, barone aasi buulayi isaambo ye khuukabananisamo liiswa ilyo isi buli shikuuka. Lwanyuma bakobole isi indi. 5Shibala isho shaakha khuukabananisibwamo bisiintsa musaafu. Shikuuka sha Yuda shinarama mu shifwo shasho shishiili imwaalo, ni shikuuka sha Yusufu nasho shinarama mu shifwo shasho shishiili ingaaki. 6Ari nga mwaamalile khuukabananisamo bisiintsa bino musaafu, mubindereere ano ni nase kane ikhupe khaakokha mu moni tsa Wele khulweenywe, khuubona buli shikuuka shiifwo sheesi kane shiyile. 7Mwaamanya muri shikuuka sha Levi sishilikho ni liiswa lyeesi baayila ta, lwekhuuba kumukabo kwaabwe nikhwo khukhwakaanisa nga basaayi isi Umukasya. Naluundi mwaamanya muri be shikuuka sha Gadi, ni sha Rewubeni, ni shisiintsa she khabili she shikuuka sha Manase, baamala khaale khukhwiyilila kumukabo kwaabwe kwe liiswa, isi umwakaanisi w’Omukasya Musa aabawa ibwaamanyaanga wa Yorudaani.” 8Basaani bano ni baaba nga barura batsya khwimenieelesa shibala, Yoswa waabeelilamo biilakilo buulayi, nga aloma ari, “Ni mutsye mwimenielese shibala isho buulayi, murone isaambo ye khuukabananisamo liiswa, lwanyuma mukobole isi ndi ano i Shilo. Ni nase kane ikhupe khaakokha mu moni ts’Omukasya, khuubona isaambo iye khuukabananisamo liiswa ilyo.”

9Baryo basaani bano baatsya bakyeenda khukhwibotokhelela shibala, nga bashikabananisamo bisiintsa musaafu. Baarona nga bokyesa isaambo ye khuukabananisamo shisiintsa khu shisiintsa, shiriimba khu shiriimba, lwanyuma baakobolayo isi Yoswa mu shifwo sheesi baabuusanila i Shilo. 10Aryo Yoswa waakhupa khaakokha khukhwireebakho isi Umukasya, khuubona isaambo ye khuukabananisamo liiswa lino. Lwanyuma waakabila bikuuka bino khuusiintsiila khu khukhalawo khw’Omukasya.

Shisiintsa shishaweebwa isi shikuuka sha Benyamini

11Shikuuka sha Benyamini nisho shishanyoowa khuufuna liiswa, khuusiintsiila khu bukuuka bukyeekhe bubwashibamo. Liiswa lyaabwe lyaba akari e shikuuka sha Yuda shishaba imwaalo wayo, ni shikuuka sha Yusufu shishaba ingaaki wayo. 12Lulwaakha lwe shikuuka sha Benyamini ingaaki lwarakikhila khu luutsi Yorudaani, lwaatsya lwoola khu lukoongo lwe Yeriko, lwaatsya paka mu shibala she tsingoongo, lwaatsya lwekukhila mu mubiimbi kwa Besi Aveni. 13Khukhwaama awo lwatsya lwakhalisila imwaalo we Luuzi, isi ari balaanga bari Beseli, lwelooselayo lweekha paka i Atarosi Adari, khu lukiingi luluuli Besi Horoni shishaba ibikyele wayo. 14Khukhwaama i Besi Horoni, lulwaakha luno lweekha kwe mwaalo lwalaandila khu lubeka lwe bukwanyaanga lwe lukiingi, lwaatsya lwekukhila i Kiriyasi Baali (namwe bari Kiriyasi Jeyarimu), shishaba shiriimba she babaandu ba Yuda. Shino shaba khu lubeka lwe bukwanyaanga.

15Lulwaakha lwa Benyamini lwe mwaalo lwarakikhila khu ndulo khwa Kiriyasi Jeyarimu, lwaatsya lwekukhila ibwaamanyaanga khu Sebele ye kameetsi Nefutowa. 16Khukhwaama awo lwelooselayo khukhwoola mwisina mwe lukiingi luluuli ingaaki we Litila Refayimu, lililolelaniile ni Litila Hinomu. Lwanyuma lulwaakha luno lwelooselayo khukhwikhilila mu Litila Hinomu, lwalaandila khu ndulo khwe mwaalo we lukiingi lwe shiriimba she Bayebusi, lweloosela khuutsya paka i Eni Rogeli.

17Khukhwaama i Eni Rogeli, lulwaakha luno lwafuumbamo khuutsya kwe ngaaki, khukhwoola i Enshemeshi, ni khukhwilooselayo paka i Gelilosi, shishilolelaniile ni bubiriro bwe Adumini. Lwelooselayo khukhwikhilila khukhwoola khu Libaale lye shishebuliso lya Bohani, uwaba uwe mu shikuuka sha Rewubeni. 18Ndi lweloosela lwalaandila khu ndulo khwe lukoongo lulwaba ingaaki wa Besi Araba mu Luheburaniya shimanyisa khakoongo khakhalolelaniile ni Litila lya Yorudaani, lwekhilila khukhwoolela ilala i Araba. 19Khukhwaama mu litila lino, lulwaakha luno lwatsya lwoola khu lukiingi lwe ngaaki we Besi Hogula, lwaatsya lwaarurira khu soonda iye ngaaki we Inyaantsa iye Kumuunyu, abweene isi Luluutsi Yorudaani lutsukhiliila kameetsi kaalwo mu nyaantsa iyo. Luno lwaba lulwaakha lwe mwaalo. 20Luluutsi Yorudaani lulweene lwaba nilwo lulwaakha lwa Benyamini lwe bwaamanyaanga. Tsino tsaba nitso tsintsakha tse liiswa lye shikuuka sha Benyamini, mweesi bukuuka bukyeekhe bwamwo bwamenyatsaka.

21Shikuuka sha Benyamini nga waawulakilemo bukuuka bukyeekhe, bwaba ni biriimba bino: Yeriko, Besi Hogula, Emeki Kezizi, 22Besi Araba, Zemarayimu, Beseli, 23Avimu, Para, Ofura, 24Kefa Amoni, Ofuni, ni Geba; mwabamo biriimba likhumi na bibili, ni bibyaalo bibyesaanewo.

25Biriimba bibiindi nibyo: Gibiyoni, Rama, Berosi, 26Mizipa, Kefira, Moza, 27Rekemu, Iripeli, Tarala, 28Zela, Ha-Elefu, Yebusi (nisho Yerusalemu), Gibeya, ni Kiriyasi Jeyarimu; mumwabamwo biriimba likhumi na bine, atweela ni bibyaalo bibyesaanewo.

Kuno kwaba nikwo kumukabo kwa Benyamini, khuusiintsiila khu bukuuka bukyeekhe bubwabamo.