Swahili Bible2

17

Liiswa lya Manase lilyaba ibukwanyaanga we Luluutsi Yorudaani

1Liiswa liliindi i bukwanyaanga wa Yorudaani lyaweebwa isi shikuuka sha Manase uwaba umusooleli umukhulu uwa Yusufu, ni Makiri niye aba umusooleli umukhulu uwa Manase. Makiri yuno niye usaala ba Gileyadi babaaba bafuna khaale shiifwo sha Gileyadi atweela ni sha Bashani, lwekhuuba nibo baaba basoolani balayi naabi. 2Ari liiswa lilyaramakho lyakabananisiwa isi bukuuka bukyeekhe buburamile bwe mu shikuuka sha Manase, nga bukuuka buno nibwo buno: Abiyezeri, Heleki, Asiriyeli, Shekemu, Heferi ni Shemida. Bano nibo baaba babetsukhulu ba Manase umusooleli wa Yusufu besaani, babaaba nga nibo baaraangilisi be bukuuka bwaabwe buno. 3Aluno Zelofahadi uwaba umusooleli wa Heferi, Heferi naye umusooleli Gileyadi, Gileyadi umusooleli wa Manase, ne niye s’abakho ni babaana basooleli ta, ne aba ni bakhaana bonyene. Ni kamasiina kaabwe kaaba niko kano: Mahila, Nowa, Hogula, Milika, ni Tiruza. 417.4: Bala 27.1-7Baryo bakhaana baraano bano baatsya isi umusaayi Eliyazari, ni Yoswa umwaana wa Nuni, atweela ni baaraangilisi babaandi babalomela bari, “Umukasya aalakila Musa khuukhuwa nafwe ifwe liiswa, nga n’akabila balebe beefwe.” Aryo Yoswa waloondelela bilakilo by’Omukasya ibyo, wakabila bukuuka buraano ubwo liiswa, nga n’akabila bukuuka buraano bwe babetsukhulu be babandaaye ba Heferi besaani. 5Shino shikila Manase aba ni bisiintsa likhumi bye liiswa nga akhurakho biifwo bya Gileyadi ni Bashani bibyaba ibwaamanyaanga wa Yorudaani ta. 6Shino shaba shiryo lwekhuuba bakhaana be mu shikuuka sha Manase nabo baafuna busikha atweela ni basaani baabwe. Liiswa lilyaba lya Gileyadi ibukwanyaanga wa Yorudaani lyakabananisibwamo isi babetsukhulu ba Manase boosi.

7Liiswa lya Manase lyatsya khukhwaamila ilala khu lwaakha lwe ngaaki ni Asheri, lyaatsya lyoola i Mikimetasi shishiili ibwaamanyaanga wa Shekemu. Lulwaakha lwe mwaalo lwekhila ilala imwaalo lwayililamo ni babaandu babaamenya i Eni Tapuwa. 8Liiswa lilyaba nga lyaayibotokhelela shiriimba Tapuwa, nilyo lilyaba lya Manase, ne shiriimba Tapuwa shaba sha Efurayimu, nga shili khu lwaakha ni Manase.

9Luryo lulwaakha lwelooselayo khuutsya khukhwoola khu kheetsi khe Kana, lwaatsiila khu ndulo khwe khakheetsi khano lwaarurira khu nyaantsa imboofu Meditereniani. Liiswa lilyaba imwaalo we khakheetsi lyaba lya Efurayimu. Ne abe yakhaba nga yabayo biriimba bikyeekhe biri bibyaba bya Efurayimu ingaaki we khakheetsi, liiswa lyoosi lilyabayo lyaba lya Manase. 10Efurayimu shaba imwaalo, ne Manase shaba ingaaki. Lulwaakha lwa Manase lwe bukwanyaanga lwaba inyaantsa imboofu Meditereniani, khuutsya khukabanana lulwaakha ni shikuuka sha Asha ingaaki ni shikuuka sha Isakaari i bwaamanyaanga.

11Mu liswa lya Isakaari ni Asha, be shikuuka sha Manase baabamo ni biriimba byaabwe nga Besi Shani, Ibileyamu, Endori, Taanaki, Megido, ni Dori shishalaangibwatsaka bari Nafosi. 1217.12: Baak 1.27,28Babaandu ba Manase sibaanyalisa khuuwoonamwo mu biriimba bino babaandu ba Kanani babaabimenyatsakamo ta, shikila baryo ba Kanani beloosela khuumenyamo. 13Ne ba Isiraeli ni beloosela khuuba ni kamaani, baryo baanyalisa khuwaambila ba Kanani bano kamaani khuubaraambila nga baakulwa, akhaba nga sibaanyalisa khuubawoonamwo ta.

Efurayimu ni Manase baloomba liiswa liliindi

14Shifukhu shitweela babetsukhulu ba Yusufu baatsya bakanikha isi Yoswa bari, “Lwashiina iwe ukhuweele ifwe liiswa likyeekhe liri khuuba busikha bweefwe? Ifwe khuli baakali naabi, lwekhuuba Umukasya waakhuwaambila shiisa waakhubalaayisa.”

15Kila Yoswa waabeelamo ari, “Inywe ni muba nga muli baakali naabi, ni shiifwo she mu ngoongo sha Efurayimu isho nga shili shikyeekhe naabi, ni mutsye mu shisaali shishaba she ba Perizi ni Refayimu, mureme kimisaala, mwibalaayisile liiswa lye khuubamo.”

16Nabo baamwiilamo bari, “Abe khwaakhakhola khuryo, singene ibeyo liiswa liliikhumala ifwe mu shibala she tsingoongo ta, ate nga sikhunyala khweekha khu musaleela kwe Yezureeli ta, lwekhuuba ba Kanani babaamenya i Besi Shani ni biifwo bibiindi bye mwiitila iyo, bali ni kamakaali ke bibyuuma.”

17Yoswa waafukiilisana ni bikuuka bino bya Efurayimu ni Manase ari, “Ilala bikuuka byeenywe bilimo babaandu baakali, naluundi muli be kamaani naabi. Kane imbalooseleyo liiswa liliindi. 18Kane muyile ni liiswa liliili mu shibala she mu ngoongo khuuba lilyeenywe. Ne khurusakho ndi lili shisaali, nashiryo muli ni khuukhala kimisaala, musyeebe buulayi, mwifunile e khuumenya. Kane muyile ni litila lya Yezureeli, abe yakhaba nga ba Kanani baliyo ni kamakaali kaabwe ke bibyuuma luundi baarafu, ne munyala mwaabawoonamwo khuubarusamo.”