Swahili Bible2

16

Liiswa lyeesi baakabila Efurayimu ni Manase

1Liiswa lyeesi baakabila babetsukhulu ba Yusufu nga nibo baaba Efurayimu ni Manase lyarakikhila khu Yorudaani khuutsya khukhwoola khu Yeriko. Liiswa lino lyatsya khubira mu mubiimbi lyoola mu shibala she tsingoongo she Beseri. 2Khukhwaama i Beseri lyatsya khukhwoola i Luuzi, lyakhalisamo khukhwoola i Atarosi isi ba Arikiti baamenyatsaka. 3Liiswa lino lyeloosela lyekhilila kwe bukwanyaanga khukhwoola mu shibala she shikuuka sha Yafuleti, ni khukhwoola mwisina mwa Besi Horoni. Lyelooselayo ni khukhwoola i Gezeri, lyaatsya lyaakamila khu nyaantsa imboofu Meditereniani.

4Baryo babetsukhulu ba Yusufu be mu bikuuka bya Efurayimu ni Manase baafuna busikha bwaabwe bwe liiswa.

5Iyi niyo isaambo isi shikuuka sha Efurayimu shakabananisamo liiswa lyaabwe mu bukuuka bukyeekhe: Lulwaakha lwaabwe lwe mwaalo lwaarakikhila i Atarosi Adari, shishaba lwe bwaamanyaanga khuutsya khukhwoola imurwe wa Besi Horoni, 6lyelooselayo khukhwoola khu nyaantsa imboofu Meditereniani. Lulwaakha lwe ngaaki lwarakikhila i bwaamanyaanga wa Janowa, lwaatsya khukhwoola i Mikimetasi, lwawetamo khuutsya kwe bwaamanyaanga lwoola i Tapuwa Shilo, lwaloondelela bubiriro bwe Kana, khuubiramo lwoola khu nyaantsa imboofu Meditereniani. 7Ndi lwelooselayo khukhwaama i Janowa khukhwoola i Atarosi ni Naara, lwaatsya lwekuunyakho khu Yeriko lwaatsya lwaarurira khu Yorudaani. 8Khukhwaama khu Tapuwa, lulwaakha lwaabwe lweekha khukhwoola khu kheetsi khe Kana, lwaatsya lwaakamila khu nyaantsa imboofu Meditereniani. Lino nilyo lilyaba liiswa lilyaweebwa babetsukhulu ba Efurayimu mu bukuuka bwaabwe bukyeekhe buli khatweelatweela. 9Shiifwo sha Efurayimu shino shabamo ni biriimba ni bibyaalo, ne nga byaba naabi mu liswa lilyaweebwa ba Manase.

1016.10: Baak 1.29Ba Efurayimu sibaanyalisa khuwoonamwo ba Kanani babaaba bamenya i Gezeri ta. Nashiryo ishiiliyo ba Kanani babashimenya ni ba Isiraeli na shiluno, ne nga ari baraambila ba Isiraeli nga baakulwa baabwe.