Swahili Bible2

11

Yoswa awula bayiinga be biriimba bye Ngaaki

1Umuyiinga Jabini uwe Hazori n’awulila khuuwula khwa Yoswa khuno khwoosi, waarumanisa buurume isi bayiinga babaandi babaaba babesanwa beewe, nga abaloomba ari beetse bamuyeete khuusoolanisa ba Isiraeli. Aryo Jabini waarumanisa isi umuyiinga Jobabu uwe Madoni, ni isi bayiinga Shimuroni ni Akishafu. 2Waaloomba ni bayiinga babaawula shibala she ngaaki she mu ngoongo, ni naabo babaaba bawula bisiintsa bibyaba mu Litila lya Yorudaani, imwaalo wa Galilaaya, waarumanisa ni isi bayiinga babaaba bawula bisiintsa bye mu ngoongo ni Nafasidori shishaba i bukwanyaanga. 3Waarumanisa buurume bubuundi khuutsya isi bayiinga be ba Kanani babaaba i bwaamanyaanga, ni bukwanyaanga weene, isi umuyiinga uwe ba Amori, uwe ba Hiiti, uwe ba Perizi, ni isi bayiinga be ba Yebusi mu shibala shishaba iyo mu ngoongo. Waarumanisa ni isi bayiinga be ba Hiivi mu shisiintsa she mwiitila lya Mizipa, aambi ni lukiingi Herumoni. 4Bayiinga bano boosi baabuusanisa kamaye kaabwe atweela, boolesa liiye lye kamaani naabi, lye baselikhale babaasoolanila khu ŋwaaŋwa ni kamakaali. Liiye lino lyaaba liboofu naabi khufwaananakho nga bukali bwe kumuyekhe khu ndulo khwe nyaantsa. 5Bayiinga bano ni liiye lyaabwe baabuusanila atweela khu ndulo khwe kameetsi ke Meromu, nga beerekekhile khuusoolanisa ba Isiraeli.

6Umukasya waalomela Yoswa ari, “Ukhabalekha baakhuriisariisa ta! Kane ise ikhuyeete khuubawula boosi, ni kumukaamba itsya khwoola tsinyaanga tsino, ukhaabe waabeerire boosi. Nga waabebwakaalile, unyoowa ni khuufuniaakaka bikyele bye tsiŋwaaŋwa tsaabwe, lwanyuma wookhake kamakaali kaabwe ni kumulilo.”

7Aryo Yoswa ni liiye lyeewe bebwakala baasiku baabwe shiyifuyifu busa nga baabusaniile khu meetsi ke Meromu. 8Umukasya wahaanayo baasiku bano mu makhono ke ba Isiraeli. Ba Isiraeli baabakwamo, baabatimisa baabayila baaboolesa paka i Sidoni, ni Misurefoosi Mayimu, baabayila ni khukhwoolesa ibukwanyaanga mu Litila lya Mizipa. Buusoolo buno bweloosela khukhwoolesa nga buli mutweela khu baasiku waamalile khukhwiiribwa. 9Yoswa waabahesela ilala nga aloondelela bilakilo byeesi Umukasya aamuwa, waafuniaakaka bikyele bye tsiŋwaaŋwa tsaabwe, lwanyuma wooshaka kamakaali kaabwe ni kumulilo.

10Lwanyuma ndi Yoswa weelayo wawaamba Hazori, weera umuyiinga washo. Khu mbuka iyo umuyiinga we Hazori aaba nga niye umukhulu naabi, nga akhulila bayiinga babaaramile be buyiinga bwoosi. 11Baryo bawaamba beeraka babaandu boosi, nga mbaawo na mutweela isi baalekhawo nga mulamu ta, boosha ni shiriimba sheene ni kumulilo.

12Aryo Yoswa wawaambaka biriimba ibyo atweela ni bayiinga baabyo beene, wabeeraka ni lurima. Aabahesela ilala boosi nga Musa umwakaanisi w’Omukasya n’amulakila khuukhola. 13Ne khuurusakho ndi ba Isiraeli sibooshakho ni kumulilo biriimba bibyaba nga byaayombekhebwa khu biili bibyesuta angaaki ta, akhali Hazori shonyene. 14Ba Isiraeli baasutaka bibiindu bye buyiindifu byeesi baanyoola mu biriimba bino, baayilaka ni bibyaayo byeene. Ne babaandu babaabibamo boosi beeribwaka, baabamalilawo ilala, nga mbaawo na mutweela isi baalekhawo nga mulamu nakhari ta. 15Biryo bilakilo byoosi byeesi Umukasya aawa Musa, Musa naye aabiwaambisa Yoswa, naye Yoswa waabiloondelela byoosi. Aryo Yoswa olelesa bibiindu byoosi byeesi Umukasya aalakila Musa.

Yoswa awula biifwo byoosi

16Yoswa ni liiye lyeewe waatsya webwakala luundi weyilila shibala shishaba ingaaki ni mwaalo, shibala she tsingoongo she Negevu shoosi khukhwoolela ilala i Gosheni, khuutsya paka ibukwanyaanga, shiifwo she Araba ni tsinjiinji tsa Isiraeli, ni khutubakho Litila lya Yorudaani. 17Ni shisiintsa shoosi khukhwaama mu shibala she lukiingi lwa Halaka lulwaba lwalolelela i Seyira, khuutsya khukhwoolela ilala i Bayaligadi, mu Litila lya Lebanoni, mwisina mwe Lukiingi Herumoni. Atsya nga awaambaka bayiinga bano boosi, khukhwoolesa nga n’abeeraka ni lurima. 18Yoswa asoolana ni bayiinga bano boosi khuumala imbuka indeeyi. 19Babaandu be shiriimba shitweela shonyene babaakholakho indakaano ni ba Isiraeli, shaba shiriimba Gibiyoni, mweesi ba Hiiti baamenyatsaka. 2011.20: Maka 7.16Lwekhuuba yaba Umukasya umweene niye uwabakhunisakho kimyoyo kyaabwe nio beeloosela khuusoolanisa ba Isiraeli. Nio shino shaanyalisa ba Isiraeli khuubamalilawo ilala, nga sibabawaambilakho shiisa shoosi ta, nga Umukasya umweene n’alakila umwakaanisi weewe Musa.

21Khu mbuka nyene iyo, Yoswa waatsya webwakala luundi waahesa babaandu beesi baalaanga bari ba Anakimu11.21 Anakimu: Anakimu baaba babaandu nga be kamaani naabi, babaamenyatsaka mu Palesitayini, nga ba Isiraeli benjilayo, babaaba bamenya mu shibala she mu ngoongo: she Heburoni, Debiri, ni Anabu, khuutubakho ni naabo babaaba mu shibala sha Yuda shoosi, atweela ni mu Isiraeli. Yoswa aahesela ilala babekhali be mu biriimba bino, waabamalilawo ilala. 22Mbaawo na mutweela khu baandu ba Anakimu isi baalekha nga mulamu mu bifwo bye ba Isiraeli ta. Khuurusakho bakyeekhe bari nibo babaaramakho mu Gaza, Gasi, ni mu Ashidodi.

23Iyo niyo isaambo isi Yoswa aawaambakamo shibala shoosi, nga Umukasya umweene n’alakila Musa. Aryo Yoswa waakabananisamo liiswa mu bisiintsasiintsa, nga buli shikuuka ashikabila shiifwo shasho.

Lwanyuma shibala shoosi shaawolakho busoolo.