Swahili Bible2

1

Yoswa ekyela umuraangilisi we ba Isiraeli

1Lwanyuma lwe khuufwa khwa Musa umwakaanisi w’Omukasya, Umukasya waakanikha isi Yoswa umusooleli wa Nuni, uwaba umuyeeti wa Musa. 2Nga amuloma ari, “Bona ari Musa umwakaanisi wase waafwiile. Ari iwe waakhiile khukhwirekekha uraangilile ba Isiraeli khukhwaambukha luluutsi Yorudaani, mutsye mu shibala sheesi intsya khubawa. 31.3: Maka 11.24,25Nga ni nasuubisa Musa, kane imbawe buli aandu oosi isi kane mube nga musaamba shikyele sheenywe. 4Lulwaakha lweenywe kane lwoole khu mubiimbi kukuuli imwaalo we lukiingi Lebanooni, ni khuuniina ingaaki khuutsya khuukhwoolela ilala khu luutsi luboofu Efurati. Kane muyililemo ni shibala shoosi she ba Hiiti, khuutsya khukhwoolela ilala khu nyaantsa imboofu Meditereniani iili ibukwanyaanga. 51.5: Maka 31.6,8; Heb 13.5Yoswa, mbaawo umuundu na mutweela ulinyalisa khukhwiimikha akhuwule iwe ta, mu biifukhu byoosi byeesi ulimala nga uli mulamu. Ise nga ni nabatsaka ni Musa khuumuyeeta, indyo ndi kane imbatsake ni nawe. S’indikhulekhakho na khakyeekhe khari ta.

61.6: Maka 31.6,7,23“Ne ari ikhuloma busa ndi, yiilamo kamaani, ukume kumwoyo, lwekhuuba iwe niye uutsya khuraangilila babaandu bano boosi, khuubayila mu shibala sheesi neetsubila bakuuka beenywe khuushibawa. 7Iwe yiilamo busa kamaani, ukume kumwoyo. Bonela ilala uri ufukiilila khuukhola ibyo byoosi byeesi umwakaanisi wase Musa aakhulakila khuukhola. Ukhaakamisa khuuloondelela kamakaambila ta, ni abweene awo, kane ufuuratsake buli aandu oosi isi kane utsyatsake. 8Bonela ilala uri shiitabo shino she kamakaambila sishirura mukhanwa mwoowo ta. Shisomatsake, ushambaasatsakekho kumuusi ni shiilo, nio unyale khuukhola byoosi bibyashironebwamo. 9N’ushebulile uri ise niye ukhulakiile khukhwiilamo kamaani, ni khuukuma kumwoyo. Ukheyembelela namwe waabakho ni khuurya khwoosi ta! Ise Umukasya Wele woowo kane imbaatsake ni nawe, buli oosi isi ukane utsyatsake.”

Yoswa awa biilakilo isi babaandu

10Lwanyuma kila Yoswa awa biilakilo isi baakhulu be bikuuka 11nga abaloma khuutsya mu libuungiitsi lye babaandu boosi babalome bari, “Nimwiboweleyo biilyo bibiimala. Lwekhuuba mu biifukhu bitaru khukhwaama shaleelo, khutsya khwambukha luluutsi Yorudaani, khutsye khuyile shibala sheesi Umukasya Wele weefwe, aabalomela khuuba shisheenywe.”

121.12: Bala 32.28-32; Maka 3.18-20; Yos 22.1-6Yoswa waakanikha isi bikuuka bya Rewubeni, ni Gadi atweela ni shisiintsa she khabiili she shikuuka sha Manase, nga abalomela ari, 13“Nimushebulile nga Musa umwakaanisi w’Omukasya n’ababoolela inywe ari, Wele atsya khubawa shibala shino khuuba shisheenywe, mweesi muli khuutsya khuwolela. 14Nashiryo bakyelama beenywe, ni babaana beenywe, ni bibyaayo byeenywe, baakha khuurama ano mu shibala sheesi Musa aabawa; ne baselikhale beenywe boosi, baakha bakwaare bye busoolo, baraangile batsye iburaangisi we ba Isiraeli babaaramile, babayeete 15khukhwoolesa nga nabo baamalile khuuwula shibala sheesi Umukasya Wele weenywe ali khuubawa, beekhalemo ni lukoosi nga nanywe ni muli ni lukoosi. Nga mwaamalile muryo, nio lwanyuma mukobole mu shibala sheenywe shino sheesi Musa umwakaanisi w’Omukasya, aabawa inywe.”

16Nabo beelamo Yoswa bari, “Buli shiindu shoosi sheesi ukhulomeele khuukhola, kane khushikhole khuuyeeta baalebe beefwe. Na buli oosi isi kane ukhulomele khuutsya, kane khutsye. 17Kane khukhuwulile iwe nga ni khwawulilatsaka Musa. Naluundi khuloomba khuri khali Umukasya Wele woowo, abeelatsakile ni nawe nga n’abatsaka ni Musa! 18Buli muundu yeesi ukane akhumiinyaalile, alekhe khukhuwulila byeesi uba waalakiile ta, uyo aakha khukhwiiribwa. Ne shonyene ndi waakha khukhwiilamo kamaani ni khuukuma kumwoyo!”