Swahili Bible2

SHIITABO SHA

YOBU

KHUKHWAANTSULA

Shiitabo sha Yobu luli luukano lw’omuundu abe uuli umulayi, ne waafuna bihangafu bibikhakeendikha ta. Umuundu yuno aafwiilwa babaana beewe boosi, ni bibiindu byeewe byoosi, naluundi buulwaale bweesi abe babaandu baarya naabi bwamuwaamba. Nio lwanyuma mu khubirira mu bisiintsa bitaru bye tsiinganikha tsye bye kamakhula, umuroni uwe shiitabo shino okesanisa nga basaale ba Yobu, ni Yobu umweene, ni baabakho ni sheesi baaloma khu shiwaamba khu bihangafu bibyamukwakho bino. Ikhumaliilisa wa byoosi, Wele umweene, nga niye isi babaandu bano baakanikhakho naabi mu shisiintsa shishifuurisa buukali, waabonekhela Yobu.

Mu shitabo shino, basaale ba Yobu baabona khutaambisibwa khwa Yobu musaambo abe isi babaandu boosi bambaasa, nga baloma bari, busheele babaandu babaali baalayi, Wele abawa bibiindu biilayi, ne abo babaali baboonaki, Wele abawa shitaambiso. Ni nashiryo, isi nibo, mu khuutsya khwoolisa khuufuna bihangafu byoosi biryo, Yobu ali ni khuuba abe waakhola bibiindu bye bubwoonaki. Ne Yobu waabona nga iyo s’iili niyo ilomo ikhulu ta. Khulwekhuuba abe busheele niye waabatsaka umuundu umukhosefu, naluundi umulayi naabi, ni nashiryo abe s’akhiile khuufuna shitaambiso she kamaani nga isho ta. Nga s’aanyala washitekeela khulwashiina kila Wele anyala waafukiilisa kumutaambo kumukali nga ukwo kwoola khu muundu umulayi nga niye ta. Ni nashiryo wenyindaalila waareeba Wele bireebo. Mu mutaambo kuno kwoosi, Yobu aarama nga ashifukiilisa mu Wele, ne nga akana Wele akhalewo ari niye s’aali ni kumusaango ta, naluundi eleyo esibwemo lukoosi nga n’aali umuundu umulayi.

Wele s’elamo bireebo bya Yobu ta, ne elamo khu biwaamba khu khufukiilisa khwa Yobu, musaambo iyokesanisa shifwaani she kamaani ni kamakhula ke bwa Wele bweewe. Lwanyuma Yobu weelamo nga okesanisa ari, ilala Wele ali uwe kamakhula, naluundi ali uwe angaaki. Aryo, Yobu webiyiisa khulwe khuraambisa tsilomo tsintsoki naluundi tsye liirima tsiryo.

Ikhumaliilisa we luukano luno, Wele wesayo Yobu bushaakha, waaba buulayi nga n’aaba amataayi, khaba waaba ni bye buyiindifu biikali khuuminyisakho byeesi aanyoowa khuuba ni nabyo. Wele wekiitsa basaale ba Yobu musaambo imbiririfu naabi, khulwe khuulekha khumanya khulwashiina kila abe Yobu alikho ataambisibwa ta. Yobu umweene niye yenyene uwarama nga waamanyile ari Wele ali uwe kamaani kakaaminyisakho isaambo isi babaandu bamwambaasakho khuuba.

Inoondekhana iye bibiilimwo

Bibiirakikhisa luukano luno (1.1—2.13)

Yobu ni basaale beewe (3.1—31.40)

a. Khukhwiŋuluŋuunya khwa Yobu (3.1-26)

b. Inganikha inyoowa (4.1—14.22)

c. Inganikha ikhola khaabili (15.1—21.34)

d. Inganikha ikhola khataru (22.1—27.23)

e. Khuruuya kamakhula (28.1-28)

f. Yobu akanikha bibiseembayo (29.1—31.40)

Tsiinganikha tsya Elihu (32.1—37.24)

Umukasya akanikha isi Yobu (38.1—42.6)

Bibyaakamisayo luukano luno (42.7-17)