Swahili Bible2

9

Inganikha iya Yobu

19.1: Yob 4.17Kila lwanyuma Yobu elamo. Waaloma ari:

2Ilala, ise naamanyile ndi shili shiryo:

Indi umuundu s’anyala waafuura kumusaango isi Wele ta!

3Abe akhabawo uyo uwikhupa khu Wele ari bawotse kumusaango,

Wele anyala waamureeba bireebo shiikana shitweela (1,000)

yaataambayo n’umuundu unyala khuubiilamo.

4Wele ali ni kamakhula kamakali mu mwooyo, naluundi ali ni kamaani kamakali;

Naanu unyala waamwiilekhaasakho naluundi waarama nga ashiili umulamu?

5Niye asyeenda tsingiingi nga sitsyaashimanyilekho na khumanya ta;

Naluundi atsishuusa waatsifumalikha khulwe liirima lyeewe.

6Wele aasiindikha musisi waatengaasa shiibala shaanikina,

naluundi asisiikha kimisiindi kye shiibala.

7Niye alakila inyaanga yaalekha khurura ta,

waabiimba ni khu nienieesi tsyaalekha khumulikha ta.

8Niye khu bweewe yenyene busa aabaamba likulu nga mbaawo umuyeetakho ta,

naluundi waakhaandakilila kuusolo kuuboofu kwe mu meetsi.

99.9: Yob 38.31; Amos 5.8Wele niye uwabuumba kukhululuumbi kwe tsinieniesi kukuuli angaaki we likulu,

ni kukhululuumbi kukuuli akari we likulu.

10Aakhola bibiindu bye kamaani bibikhanyala byaamanyikhana ta,

ni bye kamakaanga bibikhabalikha taawe.

11Wele abirira aambi isi ise ndi, ne ise sinyala naamubona ta;

ambirirakho busa ne ise siinyala nashimanya na khushimanya ta.

12Wele ayutula buli shoosi sheesi akana, naanu unyala waamwakamisa?

Naanu unyala waamureeba ari, “Ulikho ukhola shiina?”

13Niye nga wakhalaale, liirima lyeewe siliwawo ta;

Niye uwakhaandakilila bayeeti be kuusolo Rahabu.

14Ise inyala ndyeena naamwiilamo nga niye waalomile,

namwe naamisa waheena tsilomo tsye khuukhaandisana ni naye?

15Ikhaba nga ise naamanyile ndi siindi ni kumusaango kwoosi ta,

ne ise s’inyala naamwiilamo nga niye waakanikhile taawe;

ne akhali indi ise nikoontselela Wele, umukayi wase,

indi amaambile shiisa.

16Abe ikhaba bari ise naamulaangile mu musaango ne weetsa,

ise sinambaasa ndi anyala waarekeeresa byeesi ise inooma ta.

17Khulwekhuuba niye aasiindikha ikhuungu khukhuufuntsakila ise,

khukhwoolisa ise naanubukha, akhali ilomo yoosi ta.

18S’andekha nase naafunakho imbuka iye khuuheela ta,

akhali indi niye waayitsusa buulamu bwase ni kumutaambo.

19N’iiba bari khuli khuusiindana khwe khukhwookesanisa kamaani,

niye ali uwe kamaani naabi.

N’iiba bari kuli kumusaango kwe khuumuyila isi baakayi,

naanu unyala waamuwaamba waamureerayo?

20Abe ise naakhaba nga s’iindikho ni kumusaango ta,

ne tsilomo tsyeesi ise inoma sitsili tsindayi ta;

abe ise naakhaba nga s’iindikho buubi bwoosi ta,

ne niye kane akhalile ise kumusaango.

21Ise s’indikho kumusaango ta;

ise samweene naamanya buulamu bwase;

ise noola ni khuubiyila buulamu bwase.

22Ni nashiryo ise inoma ndi bibiindu byoosi bili busa shitweela;

khulwekhuuba Wele onakisa abo babaakhalikho ni kimisaango ta,

atweela ni naabo babaali baboonaki.

23Nga umuundu ukhalikho ni kumusaango ta waakhalikhile busa waafwiile,

Wele amutsekhelela.

24Wele wawaanayo shiibala mu makhono ke baboonaki,

naluundi waabiimbilila tsimoni tsye babaakhala kimisaango.

Ne abe akhali niye, naanu ukuundi uwashikhola?

25Biifukhu bye buulamu bwase biilukha busa nga uwe kamasindano;

biilukha busa nga ise s’imbonamo ikhaba kumwikhoyo ta.

26Buulamu bwase buwetsekhelela busa nga likhoŋolo liliyubakilisa khu meetsi,

buyuutukha busa nga waasu n’ayutula khaasolo khukhwaama aasi.

27Abe ise naakhaloma ndi, “Kane nibilile khukhwilootsa khwase,

Indekhe kumutaambo kwase, nambaase khu biindu biilayi byoonyene.”

28Ise inama nga ndi mu khutaambisibwa khwase;

khulwekhuuba ise naamanyile ndi iwe ushindolelela ise nga umuundu uuli ni kumusaango.

29Ise naamanyile ndi kumusaango kukhaafuure,

ni nashiryo khulwashiina ikhalaabana naamala busa kamaani kaase?

30Abe ise nakhesiinga ni kameetsi kamamiliwu karyeena,

naluundi abe nakhasaaba kamakhono kaase ni sabuuni ufuurisayo buulayi,

31ne shitweela busa kane Wele amwaate ise mu lilowo,

ni bikwaaro byase bibyeene biindurekho.

32Ise s’inyala namwiilamo niye ta,

khulwekhuuba niye s’aali umuundu busa nga ise n’iindi,

nio uri manya khutsye khwiimikhe mu moni tsye baakayi fweembi ta.

33Akari aase ni naye mbaawo umuundu uliwo khuukhalawo ta;

unyala waakhalawo akari aase ni Wele ta.

34Khali Wele andusilekho ise shiitaambiso sheesi indimo,

nio akile ise indekhe khuuba ni khuurya khuukali taawe.

35Awo nio nase inyalise khuukanikha akhali khuumurya niye ta,

khulwekhuuba ise nayimanya samweene ndi s’indimo buuri ta.