Swahili Bible2

8

Bilidadi

1Lwanyuma lwa Yobu khuukanikha, umusaani isi balaanga bari Bilidadi, khukhwaama i Shuwa naye waaloma ari:

2Iwe unaloma bibiindu bino khukhwoolisa liina,

ate nga tsilomo tsyeesi iwe uloma tsitamuukha busa nga ikhuungu iye kamaani?

3Iwe wambaasa uri Wele anyala wawaamba shishiindu she bwaŋali waashishuusaaŋanamo?

Namwe niye anyala waashuusaaŋanamo isho shishiili shituufu?

4Babaana boowo bali ni khuuba nga baakhola bye bubwoonaki isi Wele,

nga isho nisho shishakila niye waabawa nibo shitaambiso shishibaakhila.

5Ne siinga iwe wiyikina Wele,

siinga iwe wiilayo wekoontselela Umunyali uwa byoosi,

6siinga ukholela bibiindu byoosi abulafu naluundi iwe waaba umukhosefu,

Wele kane eetse akhuyeete iwe

akhwiisilewo ibyo byoosi byeesi iwe wafiilwa,

shibe nga shiwaanwa shoowo.

7Ikhaba nga iwe warakikhila afwiiti ari ne waakelawo waaba umuyiindifu,

Wele akhaakhuwe iwe bibiindu biikali uyiindile khuuminyisakho amataayi.

8Iwe yambaasa khu biindu bibyakholikha khukhwaama khaalekho,

ushebulile bye kamakhula byeesi bakuuka beefwe baafuumbula.

9Khulwekhuuba buulamu bweefwe buli bubuumbi buri,

naluundi mbaawo sheesi ifwe khwamanya ta;

buulamu bweefwe bukoraanawo khukhwaama khu shibala khaangu busa nga shishiniini.

10Iwe fukiilisa kamakhula khukhwaama isi bakuuka beefwe kabe niko kakaakhuleekela iwe;

Rekeeresa byeesi bakuuka beefwe baaloma, nga baloma bari:

11Kamakhalaamba kanyala kaatsowa mu shifwo shishikhalimo shireende ta?

Namwe kanyala kaatsowa mu shifwo shikhalimo kameetsi ta?

12Nga kameetsi komeleele, niko kakaanyoowa khuuniaala,

ikhaba nga kashiili khukhwoola khuraambisibwa mu shiindu shoosi ta.

13Abo boosi babaakhesaaya Wele ta,

bahela busa nga kamakhalaamba ako;

byeesi beyikina byoosi sibyaamamo khakhaandu khoosi ta.

14Khukhwiyikina khwaabwe khuli khukyeekhe naabi,

khuli busa nga khawuutsi khe lububi.

15Umusilu eyikina buyiindifu bweewe nga ambaasa ari kane bumuyeete,

ne sibumuyeeta ta.

Ikhaba nga eyomiisilakho, ne sibumuyeeta ta.

16Bali busa nga biilimwa byeesi umweene uwe kumukuunda

atsukhiilila ni kameetsi nga inyaanga ishiili khurura ta;

waakila byasaalana byamalaatana kumukuunda kwoosi.

17Kimili kyeewe kitsowa kyamalatana buli aandu oosi,

kyatsya kyewaamba khu lwaanda kyeyomiisila ilala.

18Ne lwanyuma nga baakhuulile shiilimwa shino khukhwaama mu mukuunda,

mbaawo na mutweela ukhaamanyekho ari shabatsakawo ta.

19Ukwo nikwo kumwiikhoyo kwonyene kweesi baboonaki bali ni nakwo;

naluundi ibawo babaandi babeetsa beela mu shifwo shaabwe.

20Ne shimanye uri Wele s’anyala waantsukha abo babaamwiyikina niye ta,

namwe s’anyala waayeeta abo babaali baboonaki taawe.

21Umukasya akhaakhunyalise iwe khukhwiilamo khuuba umusangaafu luundi,

naluundi umenye buulamu bwe kumwiikhoyo.

22Niye akhaakile kamaŋaanyu kawaambe abo babaakhakhukana iwe ta,

ni tsiingo tsye baboonaki tsikhaakoraanewo.