Swahili Bible2

7

Lwashiina buulamu buli buwaangafu naabi

1Khu shibala khuno buli muundu bamuwaambila ni kamaani khuukhola buraambi ni kamaani.

Bali busa nga umuundu isi bawandiikha khuraambira ukuundi khulwe kumukheemba.

2Bali busa nga baakulwa babekoomba bari khali beemikhilekho mu shisiisa,

naluundi nga umuraambi w’omuundu n’aliindiilila kumukheemba kweewe.

3Ni nashiryo buli kumweesi kukuubira ise imenya busa awo nga mbaawo ni kumukaso ta,

naluundi buli shiilo shishiitsa shindereera ise kumutaambo kwonyene.

4Buli lweesi ise intsya khukonela aasi,

nireeba busa ndi busha liina?

Ise inama nga ndi khushuukha busa mu bulili khukhwoolisa kumutishinyi.

5Kumubili kwase kwoosi kwabolile naluundi kwetsuule lifukhuulu.

Niikhala kamayila karura khukhwaama mu makoontsyo kaase.

6Mu bulamu bwase buli shifukhu shiilukha mu khaangu busa,

ni buulamu bwase bwakama nga mbaawo ni khuusuubila uri bunaba buulayikho ta.

7O Wele, iwe shebulila uri buulamu bwase buli busa kumuukha,

mbaawo shishiindu shilayi sheesi ise isuubila khubonakho luundi ta.

8O Wele, iwe ubona uri ise ari ishiiliwo, ne s’ukheelemo umbonekho luundi ta.

Iwe ukhaakelesewo umeentse, ne ise ikhaabe naatsiile.

9Umuundu ufwa waatsya imakoombe s’akobola ta;

ali busa nga lifuumbi ni liweelela lyakoraanawo.

10Umuundu ufwa s’akobola luundi muungo mweewe ta,

naluundi abe abo boosi babaamumanya bamwiibilila.

11Ni nashiryo ise singane isile busa ta;

kane ise inganikhe ni liirima liikali liliili mu mwooyo kwase;

kane ise niŋuluŋuunye khulwe butsiina bubuuli mu mwooyo kwase.

12Shiina kila iwe undakho ise umuliindi khukhuuniinda imbuka yoosi?

Ise ndi inyaantsa namwe indi kuuremu kuboofu kwe mumeetsi kila?

13Ise intsya khuukona aasi nga inoma ndi kane ifune lukoosi lwe khuuwolakho,

nga namanyile ndi buulili bunawosawosa khukhwiŋuluŋuunya khwase.

14Ne iwe usiindikhila ise kimirooro kikindereera khukhwiyembeelela khuukali,

iwe waasiindikhila ise bye khubonekhelwa ni kimirooro kikiriisa.

15Nashiryo waakila nekoomba ndi khali bangokile ifwa indurawo,

khufuurisa buulamu bwase ni buba mu khutaambisibwa khuno.

16Ari ise naabiyiile buulamu bwase; senikoomba ni khukhwiloosela khuuba umulamu ta.

Indekhe ise imbe, khulwekhuuba buulamu bwase

buli busa nga kumuukha kukukoraanawo khaangu busa.

177.17: Zab 8.4; 144.3Umuundu ali nisho shiina nio akile iwe wiile khumwiinaanakho,

namwe nio iwe winaaneyo khu byeesi niye akhola?

18Iwe ulambuulakho babaandu buli kumutishinyi,

naluundi iwe umukhakilisa buli imbuka yoosi.

19Khulwashiina undoleelela ise naabi waalekha khuloleelelakho ahaandi ta,

namwe shiina kila ukhaandekha nase naamilakho kamare?

20Iwe uwomisiile tsimoni khu baandu,

ise ni noonaka isi iwe, imba naakhukholelekho shiina?

Shiina kila ise nikyelile shisutwa shisiro mu buulamu bwoowo?

21Shiina kila iwe ukhaantsiyakhila ise bibyoonako byase,

undusekho ise buubi bweesi ise nakhola.

Khulwekhuuba ise ndi aambi ingana khuutsya mu ŋani,

naluundi ukhaameentse ise, ne s’ukhanyoole ta.