Swahili Bible2

6

Yobu elamo Elifasi

1Lwanyuma Yobu welamo Elifasi nga aloma ari:

2Abe shiba shishinyalikha khali liirima lyase balipimile,

khali kumutaambo kwase bakupimile khu shipimo!

3Khulwekhuuba khali byookesanisile khuuba bisiro

khuuminyisakho kumuyeekhe kwe mu nyaantsa,

ni nashiryo biilomo byaase byeesi intsya khuloma bikhakhwiyaangisa ta.

4Umunyali uwa byoosi waambunile ise ni buyiingo, bwaantsingiile mwibili mukari;

ni buutsiba bwabwo bwaasalaniile mwibili mwase.

Wele waasiindikhiile ise bibiindu bibiriisa nga biloondekhana busa.

5Nga isikilya ili ni bunyaasi bwe khuulya, s’ibuutsa ta,

naluundi nga ikhaafu ili ni bunyaasi bweesi ilya mu likhoŋolo, shimoloola ta.

6Naanu unyala khuulya shishiindu shishikhalimo kumuunyu kukushiŋaayisa ta?

Namwe naanu unyala khuulya liiki liwaanga lilikhalimo kumuunyu ta?

7Ise kumwooyo kwase sikwikoomba khuutiila khu bilyo nga ibyo ta;

ibyo bili busa nga biilyo byeesi kumwooyo kwabiyila.

8Ise nikoomba ndi khali Wele ambeele ise sheesi inoomba,

nikoomba ndi khali ambeele ise sheesi kumwooyo kwase kukana.

9Ise nikoomba ndi khali aminianguule indurawo,

khali ekhisile kumukhono kweewe antsira ifwa.

10Isho shaandimbolelesile ise naabi,

khaba khali ise imbeele ni kumwikhoyo,

abe ikhaba butsiina buli buukali naabi.

Khulwekhubeela ise sinaminyaalilakho kamakaambila ka Wele ta.

11Ne ise ndi n’amaani shiina nio neloosela khuuba umulamu?

Shiina kila niloosela khuuba umulamu nga mbaawo sheesi niyikina khufuna ta?

12Ise ndi nga libaale, namwe ise ndi ni kumubili kwe shishuuma?

13Khulwekhuuba ise sishiilimo ni kamaani koositsana ta,

naluundi mbaawo isi ise inyala natimila khuufuna buyeeti ta.

14Uyo ukhawaambila basheewe shiisa ta,

aba s’ashiili mutweela khu baandu babesaaya Umukasya ta.

15Basaale baase bamoombesa ise busa,

baaba nga tsintsitsi tsitsyooma mu muumu nga mbaawo ifula ta.

16Tsintsitsi tsino tsiba tsyetsuule kamararara,

naluundi nga mulimo ni buunyifu buukali naabi.

17Mu mbuka iye kumuumu tsintsitsi tsino tsikoraanawo,

tsyakama khukhwiikha tsyekela kamatila kamoomu busa.

18Kamatuuli ke tsiŋamila ni babaatsikeendisa bakoraana khukhwaama khu mikhoosi kyaabwe,

bayiiyana busa khukhwoolisa ni bafwiila mu mubiimbi.

19Kamatuuli ke tsiŋamila khukhwaama i Tema katsya nga kaweentsa,

ni kamatuuli kakaandi khukhwaama i Sheba katsya nga keyikina.

20Sibanyoola isho abe sheesi beyikinile ta,

ni nashiryo baarama nga baweelemo kamaani.

21Ari isi ise nanywe mwekelile busa nga tsintsitsi itsyo;

khulwekhuuba bari mwaboone ise ndi mu mutaambo,

mbaawo isaambo isi mulikho munjeetamo ta.

22Manya ikhabawo uyo yeesi isi ise isabile indi ambe shiwaanwa?

Namwe yeesi isi inomeele indi abukule khu buyiindifu bweewe,

akulilile khukhuumbonisa ise?

23Manya ikhabawo uyo isi ise inomeele ndi

ambonese khukhwaama mu makhono k’omusiku?

Namwe uyo isi ise inomeele indi

ambonese khukhwaama khu bunyali bwooyo uwumiinikhilisa ise?

24Mbaawo buubi ta!

Nashiryo imboolele sheesi ise noonakile!

Kane ise isile busa indekeerese.

25Ilomo indayi s’itsiina umuundu yeesitsana ta!

Ne iwe mbaawo shilayi sheesi ulikho uloma,

namwe mbaawo sheesi ulikho uŋoonamo ta.

26Iwe wambaasa uri unyala waaŋoona ise mu byeesi ise inoma?

Namwe iwe wambaasa uri byeesi ise ndikho inoma sibilimo kumuŋaawo ta?

27Inywe mubonekhana munyala mwakhupa ni khaakokha,

khuukhalawo oba naanu niye utsya khuyila umufuubi abe umukulwa weewe.

Naluundi munyala mwaakulisa n’umusaale weenywe umweene.

28Ne ari inywe ni mundoleelele ise mu moni mwase;

ni nase singane imbaboolele inywe shishiindu she bubeeyi nga ndi mu moni tsyeenywe ta.

29Ise ndikho inoomba ndi inywe ni mwaakamise awo!

Lekhela awo khukhuumbaatsilisa ise busa!

Ise s’indikho ni kumusaango ta.

Byeesi indikho inganikha bili bya ŋali.

30Inywe mwambaasa muri ise inyala nakanikha bye bubeeyi?

Ise s’inyala namanya oba iliwo kumutaambo namwe ta?