Swahili Bible2

41

141.1: Zab 74.14; 104.26; Isay 27.1Iwe unyala khuuwaamba ikoonya nga uraambisa kumulobo kukuuwaamba tsinyeeni?

Namwe unyala waabowa luulimi lwayo nga uraambisa kumukosi?

2Iwe unyala waakibowa kumukosi mu moolu kaayo,

namwe waaruundura tsiisaya tsyayo nga uraambisa kumulobo?

3Iwe wambaasa uri niyo inyala yaakhwikoontselela iwe iri ukilekhe itsye?

Inyala yaakhwikoontselela iwe iri ukiwaambile shiisa?

4Iwe wambaasa uri niyo inyala yaakhola ikwangwaani ni nawe,

iri kane ibe umwakaanisi woowo buulamu bwayo bwoosi?

5Iwe unyala waakibowa waakinyaayisa nga uwinyaayisa khaanywiinywi?

Namwe unyala waakibowa kumukosi waakikhweesa,

uri nio babaakaanisi boowo b’ekhaana baloleelele?

6Babaaloba tsinyeeni banyala khukhaabisanila buukusi bweesi bakikula,

namwe banyala bakireemakamo bakiikabanana?

7Iwe unyala khuuwuna lihaafu lyayo nga uraambisa

kamafumo keesi baraambisa khukhwiira tsinyeeni,

namwe waawuna kumurwe kwayo nga uraambisa liifumo ilyo?

8Ne waakitiilakho busa uri, s’uunyala waakhakakho weelakho luundi ta;

naluundi s’uulibilila buusoolo bweesi ubiramo ta;

9Mbaawo umuundu yeesi uuli ni kumwiyikino kwe khuukiwaamba ta,

khulwekhuuba buli ukibonakho akwa busa aasi khulwe buuri.

10Mbaawo umuundu uloma ari ali umurafu unyala khukisoyasoya ta;

ne oba nga shili shiryo, naanu unyala wakhaandisa ise?

11Buli umuundu yeesi uwuntsibwakala,

ise imuwula mu busoolo ni kamaani ke angaaki naabi.

Khulwekhuuba buli shishiindu shishiili khu shibala shili shishase.

12Khayo ise ikhuboolele iwe bibiwaamba khu bikele bye koonya,

ni kamaani keesi ili ni nako, ni buboofu bwayo.

13Naanu unyala waakibaakakho liihaafu lyayo,

namwe naanu unyala wengisa tsiintsala mweesi lihaafu lyefunyakila?

14Naanu uuli ni kamaani unyala wekulawo tsiisaya tsyayo?

Kameeno kaayo konyene kakila umuundu waaba ni buuri.

15Kamakhakayu kakaali khu mukoongo khwayo niko kakaakila yeekana,

khulwekhuuba kaayiwaamba atweela naluundi kaayoma nga libaale.

16Buli likhakayu lyaayiwaamba khu liindi,

ikhaba imbewo yonyene senyala yengilamo ta.

17Buli lilibira lyaayihaamba khu liindi,

koosi kali atweela busa nga mbaawo shishikawukhanisamo ta.

18Nga yaasimuule, kamame kalakala;

naluundi tsiimoni tsyabesema nga inyaanga n’iirura khu lusike.

19Kumulilo kutindiima naluundi buunoro

butamuukha khukhwaama mukhanwa mwayo.

20Lisuusi liliili nga ilyo lilituukha nga boosha kamaandu,

lituukha khukhwaama mukhanwa mwayo.

21Kumuukha kweesi niyo iheela kulimo bukhafu buunyala bwawaambisa kamaanda;

ni kumulilo kutindiima khukhwaama mukhanwa mwayo.

22Ili ni likosi lye kamaani naabi,

waakila buli shishikibira ibweeni shititukha khulwe khuurya.

23Tsinyama tsye kumubili kwayo tsyaakhuna,

tsyahandalala busa nga shiibya, mbaawo unyala waatsikhala ta.

24Niyo ili ni bunyindaalifu, mu mwooyo kwayo imbaamo buuri ta,

yaakhuna ili busa nga luusisi.

25Nga yeenyukhile khu ngaaki,

ikhaaba abo babaali baanyindaalifu baterema:

bakobolelayo kimikoongo khulwe khuurya.

26Mbaawo she busoolo shishinyala sharaambisibwa khukiibwakala ta;

khalube luurima, namwe liifumo, namwe kumusakhu,

khwiibyo byoosi mbaawo shishiinyala shamukholakho shishiindu shoosi ta.

27Abe shishiindu shaakhaba she shiibya,

ne niyo ishiiyila busa khuuba nga liikhalaamba;

ikhaba buroonzi ifuuntsakilila busa nga ufuuntsakilila

shisaala shishabola khaale.

28Abe waakhalasa bufumo bwe buyiingo sibunyala bwaakila niyo yaatitukha ta;

abe waakhalasa kamabaale kafwaana busa nga ukholowa likhuutsi.

29Imiimbo yakhaba imboofu irye, ili busa nga likhuutsi;

waakhakholowa liifumo seshikiwambakho ta.

30Kamakhakayu ke muunda aasi kaayokiya nga bikholoontsyo bye tsinyuungu;

nga kwikhuruura kuŋuula aasi afwaana busa nga isi basiinyile ni kuusaala.

31Kushusaŋana kameetsi ke mu nyaantsa kafwaana busa nga kakaali khuututuba;

kukila kameetsi kasaantsa nga kamafura ke tsiinyanyi khu mulilo.

32Nga kutsya kulekha luufulo khu meetsi lulikho lumulikha busa,

yafwaana uri inyaantsa yoosi ili iye liifulo liwaanga.

33Mbaawo shibuumbe shoosi khu shibala sheesi unyala waakileekhaasakho ta;

kuli shibuumbe shishikhali ni khuurya ta.

34Biisolo bibiindi byoosi, mbaawo sheesi nikwo kubibalamo ta;

nikwo kuli ni kamaani kwawula bisolo byoosi.