Swahili Bible2

40

1Kila Umukasya eloosela areeba Yobu ari,

2Yobu, ari iwe unyala waakamisa khuukhaandisana ni nase,

Wele, Umunyali uwa byoosi?

Noola iwe ushiikana khuukhaandisana, ari intsilemo khubone!

Yobu elamo

3Kila Yobu elamo Umukasya, nga aloma ari:

4Ne bona ise ndi uwe kumukaso mukyeekhe naabi,

ise inyala naakhwiilamo iwe, Wele, indishiina?

Ise naakamisiile awo, singane inome luundi taawe.

5Ise naakanikhile luukali naabi,

siingane inganikhe luundi taawe.

Umukasya elamo Yobu

6Nio lwaanyuma Umukasya weetsila mu mbewo

iye kamaani waakanikha isi Yobu nga aloma ari:

7Ari iwe yiima khu ngaaki ube umunyindaalifu nga umusaani;

wiilemo bireebo byeesi ise intsya khukhureeba.

8Ari iwe ulikho uloma uri ise niye ulikho buwaangafu,

nio umanyise uri iwe s’uulikho ni kumusaango kwoositsana ta?

9Iwe uli ni kamaani nga kakaase, Wele?

Liikono lyoowo linyala lyaakuula nga lilyase?

10Noola shili shiryo, yiinyukha khu ngaaki wiimikhe

mu lukoosi ni shiriifwa shoowo;

wibowe shiriifwa ni khuukhuruuya.

11Iwe eentsa abo babeniinisa angaaki;

bookesanise liirima lyoowo lye kamaani,

ukile beeleyo bekhuune basile busa.

12Iwe eentsa buli mutweela uwiniinisa angaaki,

umwiise aasi eleyo ekhuune asile busa,

naluundi ukhaandakilile baboonaki buli oosi isi bali.

13Basiikhe boosi ubakukhuulile aasi mwiiloba;

ubabowe bamenye imakoombe.

14Nio lwanyuma nase kane ikhuruuye iwe,

nase ifukiilise ndi iwe unyala waafuura mu khusoolana.

15Iwe loleelela kuusolo kwe kamaani kweesi balaanga bari Behemosi,

kweesi ise nabuumba nga ni nakhubuumba iwe,

nakwo kulya bunyaasi nga ikhaafu.

16Uli ni khuumanya uri kamaani kaakwo kanyoolikhana mu shisiintsa shangaaki,

kamaani kaakwo kali mu mikotyo kikiibotokheleele iinda.

17Kwinyusa kumushiinga kwakwo kwoomaana busa nga kuusaala ku kedali,

ni kimikotyo kye biikele byakwo kili kye kamaani naabi.

18Kuli ni kamakuumba kakaakhuna busa nga buroonzi,

ni biikele byakwo bili busa nga kimitaliimbo kye biibya.

19Nikwo kuli kukuunyoowa mu bibuumbe byase byoosi!

Uwakubuumba yenyene niye unyala wawaamba luurima khuukwiibwakala.

20Buunyaasi bweesi nikwo kulya butsowa mu bikoongo,

mweesi biisolo bibiindi bimenya.

21Nikwo kumenya aasi we kuusaala kwe kamawa,

naluundi kweebisa mu makhalaamba kakaali mu shireende.

22Kimisaala kye kamawa ni kimisaala kikiindi kikiitsowa aambi ni kameetsi,

nimwo mweesi kwiikama kumuumu.

23Abe luluutsi lwakheetsula, nikwo sikurya ta;

abe luluutsi Yorudaani lwakhasalasala lwakwoola muumoni,

nikwo kurama nga sikwiinaanayo ta.

24Unyala khuuraambisa kumulobo waakuwaamba nga kwaboone?

Namwe unyala khuukuwuna kumulobo mu moolu waakuwaamba?