Swahili Bible2

4

Tsinganikha tsitsinyoowa akari a Yobu ni basaale beewe

(4.1—14.22)

Elifasi

1Lwanyuma Elifasi abe uwaama i Temani, wenyusa mukhanwa waareeba ari:

2“Yobu, inakhukanikhayo khaalomo, kane ukhalale?

Khulwekhuuba ise sinyala neloosela khuusila busa ta.

3Bona, iwe waleekela babaandu baakali,

waayisamo kamaani mu baandu baakali.

4Bakali babaaba nga baawetsekheleele kamaani sibashinyalisa khukhwiima ta,

ne iwe wabeesaatsakamo kamaani.

5Ne bona ari shakhwoolile khus’iwe,

naluundi s’ulikho wokesanisa bubwikhaliilikhi ta;

iwe waayeekhile, waaweelemo ni kamaani khaale.

6Iwe kamaani koowo koosi kaama mu khwisaaya Wele,

ni nashiryo uli ni khuuba ni kamaani mu byeesi iwe wiyikina.

7Iwe yambaasa nga uloleelela bibiindu biikhale bye amataayi,

ubone oba yaabatsakayo umuundu umukhosefu uwafunatsakakho bihangafu!

8Ise naabona ndi babaandu babaakhola bye bubwoonaki bye angaaki naabi,

bareera bihangafu naluundi nabo babeene bafuna bihangafu.

9Wele abafuuwa busa kumuukha baafwa,

niye abamalawo khulwe liirima lyeewe.

10Baboonaki babuutsa busa nga tsitalanyi,

ne Wele amenyulaka kameeno kaabwe,

waabakhola baayuna busa.

11Bafwa busa nga tsitalanyi tsitsikhali ni she khukhwiira tsyaalya ta,

ilala tsifwa waakila tsiinyana tsatsyo tsaasalanisibwa.

12Ari iliwo ilomo isi ise nawulila mu mbola busa,

ise nakiwulila mu shimoonyo busa.

134.13: Yob 33.15Ise nakiwulila mu shilo nga indikho nambaasa khu bye khuubonekhelwa,

mu mbuka isi babaandu baaba nga bali mu lilo lye kamaani.

14Ise naba ni khuurya khuukali ni khukhwiyembeelela,

waakila kumubili kwase kwoosi kwanikina busa.

15Khaabewo khaanyifu khawuutsa nga khaambira ise mu moni,

waakila ise buuri bwamaamba.

16Aabawo shishiindu nga sheemikhile awo shaasilile busa,

ne nga s’enyala namanya nga oba nisho shiina ta.

Aabawo khuuyuna khuukali, nio lwanyuma ise naawulila liikono nga liloma liri:

17Umuundu anyala khuuba umukhosefu mu moni tsya Wele?

Umuundu anyala waaba nga s’alikho kumusaango mu moni tsy’omubuumbi weewe?

18Wele s’eyikina ikhaaba baraambi beewe be mwikulu ta;

ikhaba baamalayika niye abona ari iliwo byeesi bakhoolelesa ta.

19Ari iwe wambaasa uri anyala weyikina umuundu uuli shibuumbe shishaama mwiiloba busa,

uli busa nga isilili isi bakhaandakilila yaafwiila busa mu lifukhuulu?

20Umuundu anyala khuuba umulamu kumutikhinyi,

ne waafwa nga mbaawo ushimanyakho ta, nga ni angoloobe ashiili khukhwoola ta.

21Ibyo byoosi byeesi umuundu aba ni nabyo bimurusibwakho waarama busa,

afwa, nga s’aali ni kamakhula ta.”